1 Unusu u tsu yuwan ta̱ adanshi,

na̱ a̱za̱ e iwuya pe a̱tsuma̱ o okolo,

a̱ ri na̱ wovon wa̱ A̱sula̱ shi,

ko ke'en e esu e le.

2 A̱ luma̱ ta̱ aciyele a dansa,

ili yu usokowu i le wa̱ u ta̱ alanga shi,

a na a ca le unusu shi.

3 Idanshi yu una̱ u le iwuya i ɗa

oɓolo na̱ wulumu,

a vadalaa ta̱ ugbozu ucina̱,

a̱vu a lyawa mayan me ili i sa'ani.

4 A̱ a̱ga̱da̱ nven nle,

a̱ ta̱ foɓuso iwuya,

a ca ta̱ aciyele a yuwusan unusu,

waru a tsu 'yuwan iwuya shi.

5 A̱sulazuva,

icigi ya̱ wu i na i tsu vadala shi,

u rawa ta̱ zuva,

amayun a̱ wu waru

a rawa ta̱ e eleshe.

6 A̱sulazuva,

a̱ɓula̱ a̱ wu a̱ ta̱ tsu,

nsasan m gbagbain,

uge'etosu wa̱ wu waru,

tsa̱ mala ma̱ a̱ru'un.

A̱vu ɗa va̱a̱ ka̱lyuwusa̱ ama ni inama.

7 A̱sula̱,

te ɗa iroci i tsugbain tsa̱ e icigi ya̱ wu za na tsu vadala shi!

Vaɗilima̱ tsu tsura̱ ta̱ uba̱ta̱ u na waa pa'an,

za̱la̱ vu ululu wa̱ evelu a̱ wu.

8 A tsu yuwan ta̱ a̱buki ni ilyalya ya̱ a̱bunda̱ yu u'wa ya̱ wu,

vu tsu ca le ta̱ ili yo oso,

o uɗolu wi isa'ani ya̱ wu.

9 A̱vu ɗa esu a̱ mini a na a casu wuma,

a̱tsuma̱ e ekan ya̱ wu i ɗa tse eneshe ekan.

10 Lyuwa elime ni icigi ya̱ wu,

a̱ tyo e ekere aza a na e reve nuwu,

na̱ a̱ɓula̱ a̱ wu waru,

a̱ tyo e ekere aza a amayun o okolo ele.

11 She vu lyawa ana aza aciyogbamu a dasa mu wan,

ko ekere a̱za̱ e iwuya a̱ gba̱ra̱ mu wan.

12 Ka̱lyuwa̱ cine a̱za̱ e iwuya a̱ riya̱i,

a tsugba le ta̱, agba a gura 'yon shi.