1 A̱sulazuva,

vu yuwan nla̱ngi na aza a na a yuwusan nla̱ngi na̱ a̱mu,

vu yuwan uvon na aza a na a yuwusan uvon na̱ a̱mu.

2 Vu tara a̱a̱ra̱ga̱ ni itana yu uvon ya̱ wu,

vu ta̱wa̱ vu kamba mu!

3 'Ya̱sa̱n ibata ya̱ wu na̱ aɓau a̱ wu zuva,

vu geshe aza a na oo tono mu.

Lyawa mu uwwa wu a dansaa mu,

<<A̱mu ɗa iwawi ya̱ wu.>>

4 Lyawa aza a na a zama wuma u va̱,

a uwwa wono waru a ca le wono.

Lyawa aza a na o foɓusoo mu iwuya,

a̱ ka̱mba̱ a̱ca̱pa̱ a̱vu a̱ ra̱pula̱!

5 Lyawa le o'wo cine owopo a na upepu u tsu pura̱,

a mantsa ma na malingata ma̱ A̱sulazuva mo losuso le a̱ a̱ka̱ra̱.

6 Lyawa vu zuwa ure u le wo o'wo irumbu,

wo o'wo ederi,

a mantsa ma na malingata ma̱ A̱sulazuva ma̱ ri a gbagbusa le.

7 Babu ili i ro ɗaɗa azuwaa numu maza,

waru babu ili i ro ɗaɗa a̱ ka̱pa̱ numu a̱a̱ka̱ri,

adama a̱ tsura̱ wuma u va̱.

8 Lyawa ukototosu u riya̱a̱ le babu urevu,

lyawa maza ma na azuyi u reme le,

lyawa a̱ riya̱ a̱tsuma̱ a̱a̱ka̱ri a na a̱ ka̱pa̱i a̱vu u kototo le.

9 Wuma u va̱ u ta yuwan ma̱za̱nga̱ a̱ tyo uba̱ta̱ wa̱ A̱sulazuva,

n ta yuwan mere a na u wawa numu.

10 Wuma u va̱ suru u ta damma A̱sulazuva,

<<Zane ɗa ri tsa̱ wu!

Vu wawa ta̱ alambi,

e ekere aza a na a la'a nle ucira,

alambi na aza a na a cigai ikambi,

e ekere aza a na a yuwusaan le ikpa'a.>>

11 Aza a na a yuwusan adanshi e epen a̱ 'ya̱sa̱a̱n mu ta̱,

e ece mu ta̱,

e ili i na n revei adama a̱ yi shi.

12 A tsupaa mu ta̱ ni iwuya

o una̱ wi isa'ani i na n yuwaan nle,

mo o'wo ta̱ ubanakun adama o wovon.

13 A̱mu gba mantsa ma na a̱ ri ubanakun,

n tsu oto ta̱ itana ya̱ a̱tsumola̱ngu,

n tsu ca ta̱ aciya̱va̱ a̱tsuma̱lima̱ na akuli.

N yuwan ta̱ avasa aaci a̱ va̱ uka̱ɗa̱towu.

14 N tsu uta̱ ta̱ a yuwusan a̱tsumola̱ngu,

ngashi n lamba ta̱ i'utsa̱ i va̱ ko vuma va̱.

N tsu ka̱ɗa̱to ta̱ aaci a̱ va̱ a̱ tyo e iɗa a̱ a̱tsuma̱lima̱,

e mesun ngashi za na lambai mma va̱ yi.

15 Amma ana n ta̱ɗa̱tsa̱i,

reve o ɓoloto a uwa ma̱za̱nga̱,

n'yuwatan n va̱ o ɓoloto ta̱ adama a̱ va̱ babu a̱mu urevu,

a̱vu a yuwusan izo'oshi yu ulamu babu lyawa.

16 Ngashi aza a na a uwwusa wovon wa̱ A̱sula̱ shi,

ɗaɗa a yuwusaan numu ulamu,

adama e ima̱ i va̱,

a̱vu a̱ ka̱ra̱ a magaga ma anga e le.

17 A̱sulazuva,

hali mantsa ma ne ma ɗa va̱a̱ da̱na̱ a̱ka̱nla̱ ele?

Vu wawa mu e ekere ele,

vu wawa wuma u va̱ e ekere e ikamu i nda!

18 N to roco ma̱za̱nga̱ a̱ ma̱ka̱ka̱n mo oɓolo a ama a̱bunda̱,

a̱ ma̱ka̱ka̱n ma ama a̱bunda̱ a ɗa ma cuwa wu.

19 She vu lyawa aza a na a 'yuwan numu a̱za̱ e epen,

a yuwan ma̱za̱nga̱ a aci a̱ va̱ wan,

she vu lyawa aza a na a 'yuwan numu agba n yuwaan le ili i ro shi,

a yuwan ma̱za̱nga̱ adama a̱ a̱tsuma̱lima̱ a̱ va̱ wan.

20 A tsu yuwan adanshi asuvu nden shi,

o una̱ u ndolo a tsu yuwusan ta̱ adanshi e epen,

a aci aza a na a cigai nden ma alafiya.

21 A̱vu a̱ kpa̱tu'wa̱ na̱ le a aci a̱ va̱ a dansa,

<<Ee! Ee!

Tse ene wu ta̱ ne esu a̱ tsu!>>

22 A̱sulazuva vee ene ta̱,

she vu rungwa̱ wan!

A̱sulazuva she vu yuwan alanga na̱ a̱mu wan.

23 'Yon, vu kamba mu!

A̱sula̱, A̱sulazuva a̱ va̱

vu usaa mu ili i na i ri za va̱!

24 A̱sulazuva A̱sula̱ a̱ va̱,

roco le ulambu wu unusu u va̱ a̱tsuma̱ a̱ a̱ɓula̱ a̱ wu,

she vu lyawa le a yuwan ma̱za̱nga̱ a aci a̱ va̱ wan.

25 She vu lyawa le a jiyan o okolo adansa,

<<Ee! Tsundolo tsa ɗaɗa tsu cigai!>>

Ko a na va lyawa le adamma,

<<Tsu kototo yi ta̱.>>

26 Lyawa aza a na a yuwusan ma̱za̱nga̱ adama a̱tsuma̱lima̱ a̱ va̱,

a uwwa wono reve a lamba ugbozu u le suru suru.

Lyawa aza a na a̱ 'ya̱sa̱sa̱n aci adansa a la'a mu ta̱,

a ca le wono, o'wo ili yi izo'oshi.

27 Amma vu ca ma̱za̱nga̱ ma̱ a̱bunda̱,

a̱ tyo uba̱ta̱ wa aza a na e isawaan numu.

Lyawa le adansa kuci, <<A̱sulazuva zagbain ɗa,

adama a na u ta uwwusa uyo'o,

u kamba aagbashi a̱yi!>>

28 Eelentsu a̱ va̱ a ta yuwan adanshi a̱ a̱ɓula̱ a̱ wu,

waru u yuwaan wu ica urana ma̱ɓula̱.