1 M puro ta̱ ikambishi ya̱ A̱sulazuva,

na ankuri,

reve u polo atsuvu wu uwwa ipati i va̱.

2 Wu uta̱a̱ mu ta̱ a̱tsuma̱

a̱ a̱a̱ka̱ri e meleshe,

a̱tsuma̱ olo'o na̱ yilyo'o.

Reve u zuwa ana a̱ va̱

zuva va aatali uba̱ta̱ u na

n gura isawain ulobonu.

3 U zuwa ta̱ n cana ishipa i sa'avu,

ishipa yi ica ya̱ A̱sula̱ a̱ tsu.

Ama na̱ a̱bunda̱ e te ene

ili ya nda a̱vu a uwwa wovon,

a̱vu a zuwa okolo e le

uba̱ta̱ wa̱ A̱sulazuva.

4 Za ma̱za̱nga̱ ɗa

za na zuwai ucira wa̱ yi

uba̱ta̱ wa̱ A̱sulazuva,

za na a uwwusa maluwa

ma aza a na a̱ 'ya̱susa̱n a aci shi,

ko u ɓolo a aci

na aza na aa yuwusaan musula̱ a̱ga̱nda̱ shi.

5 A̱sulazuva A̱sula̱ a̱ va̱,

linga va̱ wu va asalama

ta̱ a̱bunda̱ lon!

Ili i na vu foɓoo ntsu,

u la'a ta̱ ucira u na e kece!

Ko na̱ shi n ciga n yuwan adanshi e le,

ko n ca alabari e le,

a̱bunda̱ e le a la'a ta̱

ucira u na e kece.

6 Vu ciga kucci vu ne'en shi,

na̱ kucci vu ukula̱tosu shi,

vu ciga a ca wu

kucci vu ukula̱tosu,

vi iliyamunga zuva masa'a shi

ko ne'en adama a matawa mo unusu shi.

Amma vu ca mu ta̱

atsuvu a na ma uwwa wu.

7 Ɗaɗa n dammai, <<Apa mu, n ta̱wa̱ ta̱,

cine u ri uɗanu

adama aɗa a̱ va̱ a̱tsuma̱ a aatagada.

8 A̱sula̱ a̱ va̱ n ciga ta̱,

n yuwan ili i na vu cigai lon,

n guza̱ ta̱ uritosu wa̱ wu

a̱tsuma̱ okolo a̱ va̱.>>

9 A̱sulazuva n damma ta̱

linga va̱ a̱ɓula̱ a̱ wu suru

a̱tsuma̱ e iɓolo ya ama,

vu reve ta̱ n kpa̱to

una̱ u va̱ shi.

10 N guza̱ alabari e iwawi ya̱ wu

adama a aciya̱va̱ goon shi,

n tsu yuwan ta̱ adanshi a̱ a̱ɓula̱ a̱ wu

ni ikambi ya̱ wu mantsa suru.

N tsu rungwa̱ kpen

a̱tsuma̱ e iɓolo ya a ama a̱ wu shi

amma n tsu yuwan ta̱ adanshi e icigi ya̱ wu

i na i tsu vadala shi

na̱ a̱ɓula̱ a̱ wu.

11 A̱sulazuva n reve ta̱ vu kuɗa̱

e ene iliyali i va̱ shi!

Amma icigi ya̱ wu i na i tsu vadala shi

na̱ a̱ɓula̱ a̱ wu

a ta yuwaan mu mapari

mantsa suru.

12 Addama icu'un icu'un

a̱ ka̱nda̱ruwa̱ mu ta̱,

hali na a̱ ri n kece shi!

Nusu va̱ la'a ta̱ ucira u va̱,

hali na maa gura e ene shi.

A la'a ta̱ a̱nji a aaci a̱ va̱ a̱bunda̱,

hali okolo a̱ va̱ a kuɗa.

13 A̱sulazuva vu wawa mu,

vu jika̱ vu kamba mu!

14 Vu zuwa aza a na

a zama o una mu

a lyuwa aci aciyele a̱ ra̱pula̱.

Vu zuwa aza a na a̱ ri a̱ ma̱za̱nga̱

adama a̱tsuma̱lima̱ a̱ va̱,

a̱ ka̱mba̱ na̱ wono.

15 Vu zuwa aza a na o zo'osuso mu

a lamba ili i na a damma adama o wono!

16 Vu zuwa aza a na a̱ ta̱wusa̱ uba̱ta̱ wa̱ wu

a yuwan ma̱za̱nga̱ na̱ mere!

Vu zuwa aza a na a cigai iwawi ya̱ wu,

mantsa suru a damma, <<A̱sulazuva zagbain ɗa!>>

17 A̱sulazuva n ri nu ucira shi

agba n ri na̱ za na

a kamba mu shi,

vu ta̱wa̱ uba̱ta̱ u va̱ gogo.

A̱vu ɗa za na a kamba mu

na̱ za vi iwawi i va̱.

A̱sulazuva she lungusa̱ mantsa wan!