1 Aba'un za va̱ a̱ A̱sulazuva ɗa,

aatali o upa'atan u va̱,

za na ritoi ekere a̱ va̱, a yuwan uvon,

akatsu a̱ va̱ waru adama a̱ nla̱ngi.

2 Za na a̱yi ɗa icigi i va̱

na̱ uɓaɓu wu ucira u va̱,

upa'atan u va̱ ni iwawi i va̱,

a̱a̱ra̱ga̱ a̱ va̱ uba̱ta̱ u na n tsu pa'an,

za na tsu zuwa nɗa za̱la̱ va̱.

3 A̱sulazuva, nye i ɗa vaɗilima̱ ri

hali na vu ri aɗa a̱ yi?✝

Ko nye i ɗa mawun ma vuma hali na vu ri

a majiyan ma̱ yi?

4 Vaɗilima̱ tsa̱ wivuwun tsa ɗa,

rana va̱ yi tsu ululu u na wa̱a̱ ka̱ra̱sa̱ ɗa.

5 A̱sulazuva, kpa̱tu'wa̱ zuva va wu,

a̱vu vu cipa̱,

ju'wa̱n nsasan,

adama o uta̱a̱ mikyon.

6 Zuwa imaɗatsu yi ikana u bete'we n'yuwatan,

tewin aya a̱ wu vu zuwa e bete'we ni ilaɗi.

7 Vu canana ukere wa̱ wu diga zuva,

vu papa mu waru vu wawa mu,

diga a̱ mini ma gbain,

ne e ekere o omocin,

8 aza a na na̱ le ri tapu na̱ e epen,

a yuwusan akucunu e epen.

9 A̱sula̱, n ta canaa wu ishipa i sa'avu,

na̱ kumburu va a'yin kupa,

n ta canaa wu ishipa yi ica.

10 A̱vu za na tsu ca ngono ulyuwu wa aci,

za na wawai aagbashi a̱ yi Da̱wuda,

diga a matsun me pe'eni mo ukwisa̱.

11 Papa mu a̱vu vu wawa mu,

diga e ekere o omocin,

aza a na na̱ le ri tapu na̱ epen,

aza a na a yuwusan akucunu epen.

12 Lyawa olobo a̱ tsu a̱tsuma̱ o tsulolobo tse le,

o o'wo tsa ɗanga na kungwai nu ucira,

lyawa esheli a̱ tsu,

o o'wo tsa atsura,

a na e she'ein adama o lobonoto,

ukobu u mogono.

13 Lyawa mpon n tsu n shiwan,

na̱ cu'un vi itana yu uɗuma̱ suru.

Ikyon i tsu waru a̱ da̱shi a̱bunda̱,

nu ukpakukupa,

nu ukpakukupa kupa a̱tsuma̱ a atsusa a̱ tsu.

14 Lyawa inan i tsu i yuwan a̱bunda̱ lon,

she a̱a̱tsuma̱ o uta̱ le ko a̱ puwa̱n wan.

She a uwwa mesun mo a̱tsumola̱ngu,

a̱tsuma̱ e re tsu wan.

15 A̱za̱ a̱ ma̱za̱nga̱ a ɗa,

aza a na a̱ ri na̱ cu'un vu nden ndolo'o.

A̱za̱ a̱ ma̱za̱nga̱ ɗa

aza a na A̱sulazuva a ɗa A̱sula̱ e le.