Alef.

1 A̱za̱ a̱ ma̱za̱nga̱ a ɗa,

aza a na re le ri mejege,

aza na o toniyi wila̱ wa̱ A̱sulazuva.

2 A̱za̱ a̱ ma̱za̱nga̱ a ɗa,

aza a na e icinai ni ili i na u yuwain shi,

aza a na a zamishi yi no okolo e le suru.

3 A tsu yuwan unusu shi,

waru a ta a mmalu

o ure wa̱ A̱sulazuva.

4 A̱sulazuva vu zuwa ta̱,

ili i na a̱ kuru

tsa̱ra̱ tsu toni le ulobonu.

5 A̱ she a damma

n shi ta̱ na̱ a̱ɓula̱

e itoni yu udammu wa̱ wu!

6 Mantsa ma na n toniyi

udammu wa̱ wu suru,

Maa uwwa wono shi.

7 N ta cuwa wu

no okolo a̱ ta̱,

mantsa ma na

n ritoyi uge'etosu wa̱ a̱ɓula̱ a̱ wu.

8 N ta yuwan tsutoni

nu udammu wa̱ wu,

she vu vari mu

suru suru wan.

Bet.

9 Cine ulobo waa gura guza̱

aciya̱yi ulobonu?

She nu u kuru

idanshi ya̱ A̱sulazuva.

10 N zami wu ta̱ no okolo a̱ ta̱,

she vu lyawa mu n takatsuwa

o udammu wu wan!

11 N zuwa ta̱ idanshi ya̱ wu okolo a̱ va̱,

tsa̱ra̱ n yuwaan wu unusu wan.

12 A̱sulazuva aba'un za va̱ wu ɗa,

rito mu udammu wa̱ wu.

13 Nu una̱ u va̱ u ɗa maa damma uge'etosu

u na wu uta̱i o una̱ wa̱ wu suru.

14 N ta yuwusan ma̱za̱nga̱

ni itoni yi ili i na vu yuwain,

ula'awu nu utsuru wa̱ a̱bunda̱.

15 N tsu yuwusan ta̱ majiyan

mee e ili i na vu zuwai na̱ a̱ kuru,

waru n rito re va̱ wu.

16 N ta yuwusan ma̱za̱nga̱

nu udammu wa̱ wu,

mee icina na adanshi a̱ wu shi.

Gimel.

17 Vu yuwaan aagbashi a̱ wu isa'ani,

tsura̱ n da̱na̱ wuma

n yuwan tsutoni na adanshi a̱ wu.

18 Kpa̱tu'wa̱ esu a̱ va̱

tsura̱ me ene,

ili ya asalama

a̱tsuma̱ a̱ wila̱ wa̱ wu.

19 A̱mu mocin ɗa o uvaɗi,

she vu soko udammu wa̱ wu

uba̱ta̱ u va̱ wan!

20 Ookolo a̱ va̱ a̱ ta̱ tapu,

na̱ a̱bunda̱ a maluwa

mo uge'etosu wa̱ wu mantsa suru.

21 Vu tsu ɓara ta̱ aza aciyogbamu,

aza a na a yuwayin una̱,

aza a na a 'yuwain

a̱ kuru udammu wa̱ wu.

22 Wawa mu diga o wono

nu ulamu u le,

adama a na n yuwan ta̱ tsutoni

ni ili i na vu zuwai a̱ kuru.

23 Ko na wo o'woi azagbain,

m ɓolo a aci e le

adama a tama inama i va̱,

aagbashi a̱ wu a̱ ta̱ da̱na̱ a majiyan

mo o udammu wa̱ wu.

24 Ili i na vu zuwai a̱ kuru

o yo'ono to mu ta̱ ookolo,

e le ɗa ili ya̱ a̱sa̱la̱ a̱ va̱.

Dalet.

25 N yuwan ta̱ zuzu nu ukwa̱,

vu ca mu wuma u sa'avu

cine vu yuwain nzuwulai.

26 N damma ta̱ re va̱

reve vu usu mu,

vu rito mu udammu wa̱ wu.

27 Lyawa mu n reve

ili i na vu zuwai na̱ a̱ kuru,

adama n da̱na̱ a majiyan

ma linga va asalama a̱ wu.

28 Ookolo a̱ va̱ a̱ ta̱ tapu

na̱ a̱tsumola̱ngu,

vu ca mu ucira

cine adanshi a̱ wu a dammai.

29 Vu uta̱a̱ mu diga e re ve epen,

vu roco mu isa'ani

o ure u wila̱ wa̱ wu.

30 N ɗangwa ta̱ ure wa amayun,

n zuwa ta̱ okolo a̱ va̱

o uge'etosu wa̱ wu.

31 A̱sulazuva n suraa ta̱

ili i na vu zuwai na̱ a̱ kuru,

she vu lyawa mu,

mu uwwa wono wan.

32 Nu ukadu u ɗa

n toniyi udammu wa̱ wu,

adama a na vu zuwa ta̱

okolo a̱ va̱ wo o'wo fa̱a̱n.

He.

33 A̱sulazuva vu roco mu

udammu wa̱ wu,

adama n toni le a̱ tyo o ukosu.

34 Vu ca mu urevu,

adama n kuru wila̱ wa̱ wu,

waru n toni le,

no okolo a̱ ta̱.

35 Vu zuwa mu n yuwan mmalu

o ure wu udammu wa̱ wu,

adama a na a̱tsuma̱ e le ɗa

n tsu tsura̱ ma̱za̱nga̱.

36 Vu ca mu okolo a na ma yuwan

tsutoni ni ili i na vu zuwai na̱ a̱ kuru

ula'awu ni icigi yu utsuru.

37 Vu tawa esu a̱ va̱

a linga ve pere,

vu yuwaan mu isa'ani

ununa vu yuwain nzuwulai.

38 Vu shiton nzuwulai ma̱ wu

na vu yuwayin aagbashi a̱ wu,

tsura̱ a uwwa wovon wa̱ wu.

39 Tawa mu wono

u na maa uwwusa wovon,

adama a na uge'etosu wa̱ wu

u ta̱ mejege.

40 N ciga ta̱ n yuwan tsutoni

ni ili i na vu zuwai a̱ kuru,

vu wawa wuma u va̱

a̱tsuma̱ a̱ a̱ɓula̱ a̱ wu.

Vav.

41 A̱sulazuva, lyawa

icigi ya̱ wu i na i tsu vadala shi,

ni iwawi ya̱ wu

i ta̱wa̱ uba̱ta̱ u va̱,

cine vu yuwain nzuwulai,

42 tsura̱ n ka̱mbuwa̱a̱

aza a na o goro numu na adanshi a̱ va̱,

adama a na n zuwaa ta̱ adanshi a̱ wu ucira.

43 She vu tawa adanshi amayun,

diga o una̱ u va̱ wan,

adama a na n zuwa ta̱

okolo a̱ va̱ o uge'etosu wa̱ wu.

44 N ta̱ kuru wila̱ wa̱ wu mantsa suru,

hali hali hali.

45 N ta yuwan mmalu

okolo nven,

adama a na n ta̱ kurusu

ili i na vu zuwai na̱ a̱ kuru.

46 N ta damma ili i na vu yuwain,

elime o ngono,

agba maa uwwa wono shi.

47 Udammu wa̱ wu u ta casu mu ma̱za̱nga̱,

adama a na n te e icigi i le.

48 N ta casu udammu wa̱ wu tsugbain,

n te e icigi i le,

waru n ta̱ da̱na̱ a majiyan,

me ili i na vu zuwai na̱ a̱ kuru.

Zayin.

49 Cuwan na adanshi

a na vu yuwayin aagbashi a̱ wu,

na zuwa numu n zuwa ookolo.

50 Ucasu wa adanshi a na n tsu tsura̱

a̱tsuma̱ a̱tsuma̱lima̱ a̱ va̱,

a̱ yi ɗa nzuwulai ma̱ wu,

n na n tsu kambusa wuma u va̱.

51 Aza aciyogbamu o goro mu ta̱ lon,

na̱ ne suru n vadalaa

wila̱ wa̱ wu ucina̱ shi.

52 A̱sulazuva n cuwan ta̱ nu uge'etosu wa̱ wu

na vu ɗanai ɗe nu ujumu,

waru n tsura̱ ta̱

okolo nven a̱tsuma̱ e le.

53 N tsu yuwan ta̱ upan lon,

mantsa ma na me enei

a̱za̱ e iwuya a lyawai

wila̱ wa̱ wu.

54 Udammu wa̱ wu wo o'wo mu ta̱ tsi ishipa,

uba̱ta̱ u na n cu'wain suru.

55 A̱sulazuva na ayin

n tsu cuwan ta̱ na aala a̱ wu,

waru n tsu yuwusan ta̱ tsutoni na̱ wila̱ wa̱ wu.

56 A̱yi ɗa wo o'woi ulinga u va̱,

n yuwan tsutoni

ni ili i na vu zuwai na̱ a̱ kuru.

Chet.

57 A̱sulazuva, a̱vu ɗa

ili i na n ri na̱ yi,

n yuwan ta̱ nzuwulai

na mo toni adanshi a̱ wu.

58 N ta̱ e ipati ya̱ wu

no okolo a̱ ta̱,

vu yuwaan mu isa'ani

cine vu yuwain nzuwulai.

59 N petelyuwe ta̱ re va̱,

a̱vu n vadala a̱ tyo

e ili i na vu yuwain.

60 N ta̱ jika̱,

waru ma̱a̱ lungusa̱ mantsa shi,

na maa yuwan tsutoni nu udammu wa̱ wu.

61 Ko na̱ shi a̱za̱ e iwuya

a̱ nla̱ mu na amunga,

mee e icina na̱ wila̱ wa̱ wu shi.

62 N ta̱ 'yon na ayin uɓatsu

n godyo wu,

adama o uge'etosu

wa̱ a̱ɓula̱ a̱ wu.

63 A̱mu i utsa̱ ya aza a na

a uwwusa wovon wa̱ wu suru ɗa,

i utsa̱ ya aza a na o toniyi

ili i na vu zuwai a̱ kuru suru.

64 A̱sulazuva, uvaɗi u shiwan ta̱

ni icigi ya̱ wu i na i tsu vadala shi suru,

vu rito mu udammu wa̱ wu.

Tet.

65 A̱sulazuva, vu yuwaan ta̱

aagbashi a̱ wu isa'ani

o una̱ wa adanshi a̱ wu.

66 Vu ca mu ugbozu nu urevu,

adama a na n zuwaa ta̱

udammu wa̱ wu ucira.

67 Kafu vu ca mu

oforo n tsu nusan ta̱,

amma gogo n ta yuwusan

tsutoni na adanshi a̱ wu.

68 A̱vu za vi isa'ani ɗa,

a̱yi ɗa i zuwai vaa yuwusan isa'ani,

vu rito mu udammu wa̱ wu.

69 Aza aciyogbamu a ta dansa epen aciya̱va̱,

amma n toni ta̱ ili i na vu zuwai a̱ kuru,

no okolo a̱ va̱ suru.

70 Ookolo e le a gbawa ta̱,

agba a̱mu n ta̱ ma̱za̱nga̱ na̱ wila̱ wa̱ wu.

71 Oforo a na a ca numu u lobono mu ta̱,

adama a na u zuwa ta̱ n rito udammu wa̱ wu.

72 Wila̱ u na wu uta̱i diga o una̱ wa̱ wu,

ili isa'ani i ɗa uba̱ta̱ u va̱,

ula'awu na̱ ukpakukupa kupa u zinariya na̱ azurufa.

Yud.

73 Ekere a̱ wu a ɗa

a yuwan numu

a̱vu o foɓo mu,

vu ca mu urevu,

adama n rito

udammu wa̱ wu.

74 Lyawa aza a na

a uwwusa wovon wa̱ wu

a yuwan ma̱za̱nga̱

a mantsa ma na ene numu,

adama a na n zuwa ta̱ ucira u va̱

adanshi a̱ wu.

75 A̱sulazuva, n reve ta̱

a na uge'etosu wa̱ wu a̱ɓula̱ a ɗa

a̱tsuma̱ amayun a̱ wu,

vu ca mu ta̱ a̱tsuma̱lima̱.

76 Lyawa icigi ya̱ wu i na i tsu vadala shi,

i kamba mu,

cine vu yuwaayin

aagbashi a̱ wu nzuwulai.

77 Lyawa isa'ani ya̱ wu i ta̱wa̱ ya̱'a̱ va̱,

adama n da̱na̱ wuma,

adama a na wila̱ wa̱ wu u ɗa

ma̱za̱nga̱ ma̱ va̱.

78 Lyawa aza aciyogbamu

a uwwa wono,

adama a na a damma ta̱

ili i na e revei shi a aci a̱ va̱,

agba a̱mu n ta̱ da̱na̱ a majiyan,

me ili i na vu zuwai a̱ kuru.

79 Lyawa aza a na

a uwwusa wovon wa̱ wu,

aza a na e revei ili i na vu yuwain,

a̱ da̱na̱ oɓolo na̱ mu.

80 Lyawa okolo a̱ va̱

a̱ da̱na̱ na amayun,

o udammu wa̱ wu,

adama mu uwwa

wono wan.

Kaf.

81 A̱sulazuva wuma u va̱

u ta maluwa me iwawi ya̱ wu lon,

waru n zuwa ta̱ okolo a̱ va̱

a danshi a̱ wu.

82 Esu a̱ va̱ a̱ kuna̱ ta̱,

e ipiri yi nzuwulai ma̱ wu,

a̱vu n damma,<<Mantsa ma ne ma ɗa

vaa ca mu adanshi?>>

83 Ko na wo o'woi,

mo o'wo ta̱ tsa̱ tsa̱n vu ukwan

u masayan ma̱ ina̱bi ma na a variyi,

na̱ ne suru mi icina,

nu udammu wa̱ wu shi.

84 Hali mantsa ma̱ ne

aagbashi a̱ wu o puro?

Mantsa ma̱ ne vee ge'eto,

aza a na e le'eshe numu?

85 Aza aciyogbamu,

a̱ ka̱pa̱a̱ mu ta̱ a̱ka̱ri e iwuya,

aza a na aa yuwusan

tsutoni na̱ wila̱ wa̱ wu shi.

86 Udammu wa̱ wu suru

ili i na aa zuwaa ucira u ɗa,

vu kamba mu,

adama a na a 'yuwan mu ta̱

babu ufaru!

87 Ke'en ɗa shi buwai

o kototo mu o uvaɗi,

agba n lyawa

ili i na vu zuwai a̱ kuru shi.

88 Vu yuwaan mu isa'ani,

adama e icigi ya̱ wu i na i tsu vadala shi,

adama n yuwan tsutoni

ni ili i na vu yuwain, nu una̱ wa̱ wu.

Lamed.

89 A̱sulazuva, adanshi a̱ wu

a̱ ri nu ukosu shi

u shuwa̱ ta̱ ɗe zuva.

90 Amayun a̱ wu a̱ ta̱ lo

diga a mantsa a̱ tyo a mantsa,

vu shuwa̱ ta̱ uvaɗi

reve wu uwwa ushuwu.

91 Uge'etosu wa̱ wu u ta̱ lo,

hali acina ana'an

adama a na ili suru

i ta yuwusan wu a̱ga̱nda̱.

92 Na̱ shi wila̱ wa̱ wu u ɗa

u zuwa numu ma̱za̱nga̱ shi,

n shi ta̱ a̱ kuwa̱

a̱tsuma̱ a̱tsuma̱lima̱ a̱ va̱.

93 Mee e icina ni ili i na

vu zuwai a̱ kuru shi,

adama a na e ekere e le ɗa

vu wawai wuma u va̱.

94 Wawa mu,

adama a na a̱mu za va̱ wu ɗa,

adama a na n yuwan ta̱ ukadu

e itoni yi ili i na vu zuwai a̱ kuru.

95 A̱za̱ e iwuya a ta pura

o kototo mu,

amma n ta̱ da̱na̱ a majiyan

mee e ili i na vu yuwain.

96 Mee ene ta̱ ukosu wi ili biti,

agba udammu wa̱ wu

u ri nu ukosu shi.

Mem.

97 Apa cine n ri e icigi

i wila̱ ya̱ wu!

N ta majiyan ma̱ yi

urana ma̱ɓula̱.

98 Wila̱ wa̱ wu u zuwa mu ta̱

n yuwan ugbozu

ula'awu na̱ n'yuwatan n va̱

adama a na u ta̱ oɓolo na̱ mu

mantsa suru.

99 N la'a ta̱ munlu n va̱ suru urevu,

adama a na n ta majiyan

mee e ili i na vu yuwain.

100 N la'a ta̱ mbara urevu,

adama a na n ta yuwusan tsutoni

ni ili i na vu zuwai a̱ kuru.

101 N 'yuwan ta̱ iɓolo

ya̱ a̱za̱ e iwuya suru,

adama n guza̱

adanshi a̱ wu.

102 N vadalaa uge'etosu

wa̱ wu ucina̱ shi,

adama a na a̱vu ɗa

vu rito numu.

103 Cine m peɗei idanshi ya̱ wu a̱ ta̱ a̱limu lon,

ula'awu na̱ a̱limu e ishiki

o una̱ u va̱!

104 N tsura̱ ta̱ urevu,

e ili i na vu zuwai a̱ kuru,

adama o ndolo n 'yuwan ta̱,

ure wi iwuya suru.

Nun.

105 Adanshi a̱ wu fitila ɗa,

na tsu casu ekan

uba̱ta̱ u na n tyo yi biti.

106 N yuwan ta̱ akucunu,

agba ma̱a̱ ka̱mba̱ a̱ca̱pa̱ shi,

n to toni uge'etosu

wa̱ a̱ɓula̱ a̱ wu.

107 A̱sulazuva, n sowo ta̱

a̱tsuma̱lima̱ a̱bunda̱,

vu ca mu wuma u sa'avu,

ununa adanshi a̱ wu a dammai.

108 A̱sulazuva, vu usu akucunu a na n tarai

reve fo vu rito mu uge'etosu wa̱ wu.

109 Ko na wo o'woi

n tsu tarasa ta̱ wuma u va̱

e ekere a̱ va̱,

mee e icina

na̱ wila̱ wa̱ wu shi.

110 A̱za̱ e iwuya

o foɓoo mu ta̱ maza,

amma na̱ ne suru,

n lyawa itoni

yi ili i na vu zuwai a̱ kuru shi.

111 Ili i na vu yuwain ɗa

ili ya agadu a̱ va̱ hali hali,

ele ɗa ma̱za̱nga̱

mo okolo a̱ va̱.

112 N zuwa ta̱ okolo a̱ va̱

na moo toni udammu wa̱ wu,

hali ukwisa̱ u va̱.

Sameck.

113 N 'yuwan ta̱ aza a na a̱ ri na̱ na̱ re re,

amma n te e icigi i wila̱ ya̱ wu.

114 A̱vu ɗa upa'atan u va̱

na̱ a̱a̱ra̱ga̱ a̱ va̱,

n zuwa ta̱ okolo a̱ va̱

adanshi a̱ wu.

115 Kakasa yi na̱ a̱mu

a̱ɗu a̱za̱ e iwuya,

adama n kuru

udammu wa̱ A̱sula̱ a̱ va̱.

116 Vu ca mu adanshi

cine vu yuwain nzuwulai,

tsa̱ra̱ n da̱na̱ wuma,

she vu lyawa ucawu wo okolo a̱ va̱

wo o'wo pere wan.

117 Vu guza̱ mu,

adama n tsura̱ iwawi,

n ta̱ ka̱mbuwa̱

ugbozu u va̱ suru,

o udammu wa̱ wu.

118 Vu 'yuwan ta̱

aza a na a vadalaa yi

udammu wa̱ wu suru ucina̱,

adama a na a̱lumu le

epen a ɗa.

119 Vu tsu vari ta̱

aza a na a yuwusan iwuya o uvaɗi,

cine vu revei everi,

adama o ndolo a ɗa

n cigai ili i na vu yuwain.

120 Lipu va̱ ta̱ e meje'en

adama o wovon wa̱ wu,

n ta uwwusa wovon

wu uge'etosu wa̱ wu.

Ayin.

121 N yuwan ta̱ ili ya̱ a̱ɓula̱ oɓolo na amayun,

she vu lyawa mu e ekere

aza na o ɓongishi mu wan.

122 Vu lyawa aagbashi a̱ wu,

a̱ da̱na̱ gbaga,

she vu lyawa aza aciyogbamu,

o ɓongi mu wan.

123 Esu a̱ va̱ a̱ kuna̱ ta̱

a pura iwawi ya̱ wu,

e idanasa nzuwulai

ma̱ a̱ɓula̱ a̱ wu.

124 Vu kuru na̱ a̱mu aagbashi a̱ wu,

o una̱ wi icigi ya̱ wu i na i tsu vadala shi,

vu rito mu udammu wa̱ wu.

125 A̱mu aagbashi a̱ wu a ɗa,

adama o ndolo vu ca mu urevu,

adama n reve ili i na vu yuwain.

126 A̱sulazuva, mantsa ma yuwan ta̱

na va yuwan ili i ro,

adama a na a kuɗa ta̱ wila̱ wa̱ wu.

127 N ta̱ e icigi yu udammu ya̱ wu,

ula'awu na̱ zinariya,

na amayun, ula'awu na̱ zinariya can.

128 Adama o ndolo a ɗa mo tono

ili i na vu zuwai a̱ kuru,

reve n 'yuwan ure we epen suru.

Pe.

129 Ili i na vu yuwain ili ya asalama a ɗa,

adama o ndolo a ɗa okolo a̱ va̱

aa yuwusan tsutoni ne le.

130 Ucuɗuwu wa adanshi a̱ wu

u tsu ca ta̱ ekan,

reve u zuwa aza a na e revei ili shi,

a yuwan ugbozu.

131 N kpa̱tu'wa̱ ta̱ una̱ u va̱,

e ivuwusan zuva zuva

adama a maluwa

mo udammu wa̱ wu.

132 Vadala ya̱'a̱ va̱

vee ene iliyali i va̱,

cine wila̱ wa̱ wu u ri

e ekere aza a na a̱ ri

e icigi ya aala a̱ wu.

133 Idana udasuwu u va̱,

o una̱ wa adanshi a̱ wu,

she vu lyawa unusu

u lyuwa a aci a̱ va̱ wan.

134 Wawa mu

diga aza a na

e le'eshe mu,

adama n kuru

ili i na vu zuwai a̱ kuru.

135 Vu zuwa urewesu wa̱ wu

wi ikana aagbashi a̱ wu.

Reve vu rito mu

wila̱ wa̱ wu.

136 Moo oco ta̱

aɓara lon tsa̱ oko'o,

adama a na a̱ kuru,

wila̱ wa̱ wu shi.

Tsadik.

137 A̱sulazuva a̱vu,

za va̱ a̱ɓula̱ a ɗa,

waru uge'etosu wa̱ wu

mejege ma ɗa.

138 Ili i na vu yuwain

a̱za̱ a̱ a̱ɓula̱ a ɗa

waru aza a amayun a ɗa suru.

139 N tsu yuwan ta̱ a̱tsumola̱ngu lon

adama a na n'yuwatan n va̱

n 'yuwain adanshi a̱ wu.

140 A kurato ta̱

nzuwulai ma̱ wu suru,

waru aagbashi a̱ wu

a̱ ta̱ e icigi i le lon.

141 Ko na wo o'woi

a̱mu ili i ɗa shi,

waru o goro mu ta̱,

na̱ ne suru, mee e icina

ni ili i na vu zuwai a̱ kuru shi.

142 A̱ɓula̱ a̱ wu a̱ ta̱ na̱ a̱ɓula̱, hali hali,

waru wila̱ wa̱ wu amayun a ɗa.

143 Meleshe na̱ a̱tsuma̱lima̱

aa cina mu ta̱,

amma udammu wa̱ wu u ɗa

ma̱za̱nga̱ ma̱ va̱.

144 Ili i na vu yuwain

a̱za̱ a̱ a̱ɓula̱ a ɗa hali hali,

a ta casu mu urevu adama n da̱na̱ wuma.

Kof.

145 A̱sulazuva n ɗe ta̱

no okolo a̱ ta̱

vu usu mu,

waru n ta̱ kuru

udammu wa̱ wu.

146 N ɗewu ta̱,

vu wawa mu!

Waru n ta̱ kuru

ili i na vu yuwain.

147 Kafu usana n tsu 'yon ta̱ n showen wu,

adama e izami yi ikambishi,

waru n zuwa ta̱ okolo a̱ va̱

adanshi a̱ wu.

148 Ayin ma̱ɓula̱ n lantsa shi,

a majiyan ma nzuwulai ma̱ wu.

149 A̱sulazuva, vu uwwa uɗyo u va̱,

o una̱ wi icigi ya̱ wu i na i tsu vadala shi,

vu wawa wuma u va̱

o una̱ wu uge'etosu wa̱ wu.

150 A̱za̱ e ifoɓi yi iwuya a̱ ta̱ zuzu na̱ a̱mu,

waru a ta alanga nu udammu wa̱ wu.

151 Na̱ ne suru, A̱sulazuva vu ta̱ zuzu,

waru udammu wa̱ wu suru amayun a ɗa.

152 Ɗe nu ujumu n rito ta̱

diga a̱tsuma̱ e ili i na vu yuwain,

waru a̱vu ɗa vu shuwa̱ nle hali hali.

Resh.

153 Ka̱lyuwa̱ a̱tsuma̱lima̱ a̱ va̱

vu wawa mu,

adama a na mi icina

na̱ wila̱ wa̱ wu shi.

154 Vi isawaan mu

vu tsupaa mu,

vu wawa wuma u va̱

cine vu yuwain adanshi.

155 Iwawi i yuwan ta̱

alanga na̱ a̱za̱ e iwuya,

adama a na a zami

e reve udammu wa̱ wu shi.

156 A̱sulazuva, iliyali ya̱ wu

i ta̱ a̱bunda̱ lon,

vi idana wuma u va̱

o una̱ wu uge'etosu wa̱ wu.

157 Aza a na e le'eshe mu

a̱ ta̱ a̱bunda̱ lon,

amma n vadalaa

ili i na vu yuwain ucina̱ shi.

158 Mantsa ma na me enei

a̱za̱ o ulambu wa̱ a̱ɓula̱,

n tsa̱ ene ta̱ idaba i le lon.

Adama a na a̱ kuru

adanshi a̱ wu shi.

159 A̱sulazuva, ka̱lyuwa̱ cine n ri e icigi

yu udammu ya̱ wu,

vi idana mu o una̱ wi icigi

ya̱ wu i na i tsu vadala shi.

160 Idanshi ya̱ wu suru amayun a ɗa,

waru uge'etosu wa̱ wu suru,

a̱za̱ a̱ɓula̱ a ɗa hali hali.

Shin.

161 Ozo o tsugono e le'e mu ta̱

babu ufaru,

agba okolo a̱ va̱

a̱ ta̱ o wovon

wa adanshi a̱ wu.

162 N ta̱ ma̱za̱nga̱

na adanshi a̱ wu,

tsa za na tsura̱i

utsuru wa̱ a̱bunda̱ diga uba̱ta̱ wu uvon.

163 N 'yuwan ta̱ epen,

waru n ta̱ eneshe yi idaba,

amma n ta̱ e icigi

i wila̱ ya̱ wu.

164 N tsu cuwa wu ta̱

ucindere o urana suru,

adama o uge'etosu

wa̱ a̱ɓula̱ a̱ wu.

165 Aza a na a cigai

wila̱ wa̱ wu,

a̱ ta̱ na̱ asuvu nden,

agba ili yi lo na yaa zuwa le

a̱ ta̱ɗa̱tsa̱ shi.

166 A̱sulazuva, n zuwa ta̱

okolo a̱ va̱ e iwawi ya̱ wu,

waru n kuru ta̱ udammu wa̱ wu.

167 N yuwan ta̱ tsutoni

ni ili i na vu yuwain

adama a na n ciga le ta̱ lon.

168 N kuru ta̱ udammu wa̱ wu

ni ili i na vu yuwain,

adama a na vu reve ta̱ re va̱ suru.

Tav.

169 A̱sulazuva, lyawa mesun ma̱ va̱

ma rawa a̱ ma̱ka̱ka̱n ma̱ wu,

ca mu urevu

cine adanshi a̱ wu a dammai.

170 Lyawa avasa a̱ va̱

a rawa a̱ ma̱ka̱ka̱n ma̱ wu,

vu wawa mu

cine vu yuwain nzuwulai.

171 Lyawa una̱ u va̱

u shiwan ni ica,

adama a na vu rito mu ta̱

udammu wa̱ wu.

172 Lyawa elentsu a̱ va̱,

a cana ishipa ya adanshi a̱ wu,

adama a na udammu wa̱ wu suru,

a̱za̱ a̱ɓula̱ a ɗa.

173 Lyawa ukere wa̱ wu

u da̱na̱ ufoɓu,

u na wa kamba mu,

adama a na n ɗangula ta̱

udammu wa̱ wu.

174 A̱sulazuva, n ta maluwa

me iwawi ya̱ wu,

waru wila̱ wa̱ wu ili i ma̱za̱nga̱

i ɗa uba̱ta̱ u va̱.

175 Lyawa n da̱na̱ wuma

adama n cuwa wu,

Lyawa uge'etosu wa̱ wu fo

u kamba mu.

176 N puwa̱a̱n ta̱,

tsu kyon na puwa̱yin,

zami mu, a̱mu aagbashi a̱ wu,

adama a na mi icina

nu udammu wa̱ wu shi.