1 A̱sulazuva, A̱sula̱ a Tsugbain

a yuwan ta̱ adanshi,

u ta̱ e ɗesu uvaɗi suru

diga asana a̱ tyo a̱livu.

2 A̱sula̱ a̱ te ikanasa diga Sihiyona,

lyuci vu ulobonu lon,

3 A̱sula̱ a̱tsu a̱ ta̱ lo a̱ ta̱wa̱

wa̱a̱ rungwa̱ kpen shi,

akina o ukula̱tosu a̱ ta̱ elime yi,

a̱ba̱jini a̱ wunla̱ a̱ tu uka̱nda̱ruwu na̱ a̱yi.

4 U ta̱ ɗesu zuva ni iɗa o'wo esu yi,

ene cine wa̱ ge'eto ama a̱yi.

5 Adansa,

<<Ɓolotowo numu a̱za̱ a̱ a̱ɓula̱ a̱ va̱,

aza a na a yuwain akucunu na̱ a̱mu

o una̱ wu ucasu u kucci.>>

6 Zuva ta yuwusan adanshi a̱ a̱ɓula̱ a̱ A̱sula̱,

adama a na a̱yi na aciya̱yi

a̱yi ɗa za vu uge'etosu.

7 <<Uwwai, a̱ɗu ama a̱ va̱,

n ta yuwan adanshi a̱ ɗu Isra'ila,

n ta yuwan adanshi

a na i ri nu unusu,

A̱mu ɗa A̱sula̱, A̱sula̱ a̱ ɗu.

8 M ɓara ɗu adama a̱ kucci ɗu shi,

ko kucci vu ukula̱tosu ɗu,

na ya yuwusan mu kuci shi.

9 N ciga oogono e inan

diga a 'wa ɗu shi,

ko mgbele diga

iliyamunga i ɗu shi.

10 Adama a na inama yu una suru

a̱za̱ a̱ va̱ a ɗa,

ni inan ya̱ a̱bunda̱

i na i ri a agaɗi.

11 Nnunu n na n ri

a nsasan suru,

ni ili i wuma i na i ri e iɗa

a̱za̱ a̱ va̱ a ɗa suru.

12 Ko na̱ n shi a uwwusa ambulu,

maa pati ɗu ilyalya shi,

adama a na uvaɗi,

ni ili i na i ri pe suru za va̱ ɗa.

13 N tsu tama ta̱ nama vo ogono e inan ɗa?

Ko n tsu sowo ta̱ mpasa mu mgbele?

14 I ta̱wa̱a̱ A̱sula̱ na̱ kucci

vu ugodyusho ɗu,

i shiton nzuwulai n ɗu

a̱ tyo uba̱ta̱ wa̱ A̱sulazuva Zagbain.

15 I ɗe mu o urana wa̱ a̱tsuma̱lima̱,

n ta wawa ɗu,

reve gba i ca mu tsugbain.>>

16 Amma A̱sula̱ a damma ta̱

a̱za̱ e iwuya,

<<Zane ɗa ca nɗu ucira u na

ya̱a̱ da̱na̱ a̱ ɗesu wila̱ u va̱?

Adama a̱ nye ya yuwan

adanshi a nzuwulai n va̱?

17 I 'yuwan ta̱ tsuɓari tsa̱ va̱,

a̱vu i vadalaa wila̱ u va̱ ucina̱.

18 Na̱ ye ene vivu,

i tsu ɓolo ta̱ aci na̱ a̱yi,

i tsu ɓolo ta̱ aci na̱ a̱za̱ a̱ tsipere.

19 I tsu da̱na̱ ta̱ adanshi e iwuya nu una̱ u ɗu,

elentsu a̱ ɗu waru tapu ne epen.

20 I tsu yuwusan ta̱ adanshi

a vama a aci

a̱za̱ ɗu babu lyawa,

a̱vu i lungusa̱ aala a mmaci n ɗu.

21 Ili i na i yuwain ɗa ndolo

a̱mu gba kpaku,

i yuwusan ta̱ majiyan n ta̱ tsa̱ ɗu.

Amma gogo n ta ɓara ɗu,

n damma ɗu nusu ɗu

a̱ ma̱ka̱ka̱n ma̱ ɗu.

22 Uwwai nda,

a̱ɗu na yi icinai na̱ A̱sula̱,

na̱ ne ɗa shi n ta kara ɗu mukari mukari,

babu za na a wawa ɗu.

23 Za na ta̱wa̱i na̱ kucci vu ugodyusho suru

u ca mu ta̱ tsugbain,

waru u foɓo ta̱ ure

tsa̱ra̱ n roco yi

iwawi ya̱ A̱sula̱.>>