1 A̱sulazuva, uwwa avasa a̱ va̱,

lyawa mesun ma̱ va̱ ma̱a̱ ta̱wa̱ uba̱ta̱ wa̱ wu.

2 She vu sokowo mu urewesu wa̱ wu

a mantsa ma na n ri pe a̱tsuma̱lima̱ wan!

Vu poloo mu atsuvu a̱ wu

a mantsa ma na n ɗeyi,

vu usu keɗu!

3 Adama a na rana va̱ ta a mmalu

cine vu revei mikyon,

etele a̱ va̱ a̱ ta̱ ma̱kula̱

cine vu revei akina.

4 Ookolo a̱ va̱ a banakan ta̱,

reve u kpanla cine vu revei anlya,

hali n kuɗa̱ a uwwa maluwa me e ilyalya.

5 Adama a̱ ma̱nga̱ ma̱ a̱bunda̱ ma̱ va̱

n ramba ta̱ hali mo o'wo etele can.

6 N rotso ta̱ vori vu una,

cine vu revei vori o okongo.

7 N tsa asa ta̱ wuma,

n tso o'wo ta̱ a̱ nde'en

cine vu revei manunu zuva vu ukwa̱'a̱.

8 N'yuwatan n va̱ n tee isulusa mu urana ma̱ɓula̱.

Aza a na a yuwusaan mu ulamu

a̱ ka̱mbuwa̱ ta̱ ala a̱ va̱ ili ya avandaru.

9 Adama a na n ta lyuwusa okomo tsi ilyalya,

reve m ɓolo ili yo oso a̱ va̱ na aɓara.

10 Adama o upan na asuvu usuɗuwu a̱ wu a ɗa,

vu tara numu a̱vu vu vari mu.

11 Rana va̱ ta mmalu

cine vu revei ululu wu ulivu,

m kpanla ta̱ tsa anlya.

12 Amma a̱vu, A̱sulazuva,

vu ta̱ lo babu ukotu,

a ta cuwan na ala a̱ wu

diga a mantsa a tyo mantsa.

13 Vu ta̱ 'yon ve ene iliyali ya̱ Sihiyona,

adama a na mantsa ma ɗa ma na voo roco isa'ani uba̱ta̱ wa̱ yi,

mantsa'a ma rawa ta̱.

14 Adama a na agbashi a̱ wu

a ta maluwa ma atali a̱ wu,

a̱ ta̱ e enishe iliyali i ma̱buta̱ ma̱ yi.

15 A̱sulazuva, nɗa n ta uwwa wovon wa ala a̱ wu,

ngono mu uvaɗi suru n ta uwwa wovon u tsugbain tsa̱ wu.

16 Adama a na A̱sulazuva a ta suwisa Sihiyona,

reve u roco tsugbain tsa̱ yi.

17 U ta uwwa avasa aza a na a̱ ri nu ucira shi,

wa̱a̱ kuɗa̱ zuwaa le atsuvu shi.

18 Lyawa a ɗana ili i nda

adama aza a na a̱ ri lo a̱ ta̱wa̱ a̱ca̱pa̱,

tsa̱ra̱ aza a na koto a matsain shi

a̱ ta̱wa̱ a cuwa A̱sulazuva.

19 <<A̱sulazuva a̱ ka̱lyuwa̱ ta̱ diga ɗe a̱a̱'isa̱ a̱ yi,

diga zuva ɗaɗa u ka̱lyuwa̱i uvaɗi,

20 tsa̱ra̱ wu uwwa ma̱nga̱ ma aza a na a̱ ri o u'wa wa ali,

u wawa aza a na a paɗaa yi ugana wu ukwisa̱.>>

21 Tsa̱ra̱ a ca udammu

wa ala a̱ A̱sulazuva

a̱tsuma̱ a̱ Sihiyona,

ica ya̱ yi waru a̱tsuma̱ a̱ Urishelima,

22 a mantsa ma na ama na̱ a̱za̱ o tsugono o ɓolotoi

tsa̱ra̱ a yuwaan A̱sulazuva a̱ga̱nda̱.

23 Wu kuɗa ta̱ ucira u va̱ o ure,

reve u jiba rana va̱.

24 Ɗaɗa n dammai,

<<A̱sula̱ a̱ va̱, she vu tara wuma u va̱ gogo wan,

a na wo o'woi koto n kutsa shi!

A̱vu na a'wan a̱ wu a̱ ri diga mantsa a tyo mantsa.

25 Ɗe nu ujumu vu shuwa̱ ta̱ ikyun yu uvaɗi,✝

zuva waru ulinga we ekere wu a ɗa.

26 A̱ ta̱ puwa̱n,

a̱vu gba vu ta̱ lo,

o to kporo cine vu revei itana i wotosu.

Cine vu revei a̱tugu a ɗa

vaa vadala le waru a̱ ta̱ puwa̱n.

27 Amma a̱vu vu tsu vadala shi,

a'wan a̱ wu o koto shi.

28 Muwun ma agbashi a̱ wu a̱ ta̱ da̱nu

a̱ ma̱ka̱ka̱n ma̱ wu gbaga,

limatan le ta bala a̱ ma̱ka̱ka̱n ma̱ wu.>>