1 A̱sulazuva,

vu poloo adanshi a̱ va̱ atsuvu,

waru vu uwwa ma̱nga̱ mo okolo a̱ va̱.

2 Mogono ma̱ va̱ A̱sula̱ a̱ va̱!

Vu uwwa mesun ma̱ va̱ mee izami yi ikambishi.

Adama a na e ekere a̱ wu ɗa maa yuwusan avasa.

3 Nu usana vu tsu uwwa ta̱ avasa a̱ va̱.

Urana a̱ ma̱ɓa̱tsa̱a̱ waru n tsu ta̱wa̱ ta̱ ni ipati i va̱,

waru m puro usuwu wa̱ wu.

4 Adama a na a̱vu

A̱sula̱ ɗa na uwwusa uyo'o wi iwuya shi.

Waru vu tsu lyawa a̱za̱ e iwuya,

a̱ ta̱wa̱ elime wu shi.

5 Aza aciyogbamu,

aa gura e isawan a̱ ma̱ka̱ka̱n ma̱ wu shi,

vu 'yuwan ta̱ aza a na a yuwusan iwuya.

6 Vu tsu kototo ta̱ aza a na a yuwusan epen,

Vu ta̱ e nda tsugya va aza a na o ocosu mpasa oɓolo na̱ a̱za̱ a̱ wulumu.

7 Agba a̱mu,

e ekere e icigi ya̱ wu i na i tsu vadala shi,

n ta uwa a̱tsuma̱ o u'wa wa̱ wu,

n yuwan a̱ga̱nda̱ a̱tsuma̱ A̱a̱'isamapaɗa a akiza a̱ wu,

a̱vu n kingyo n yuwan wu a̱ga̱nda̱ a̱tsuma̱ A̱a̱'isamapaɗa a̱ wu.

8 A̱sulazuva, vu rono mu aaɗanga a̱tsuma̱ a̱ a̱ɓula̱ a̱ wu.

Adama a na n'yuwatan n va̱ n yuwan ta̱ a̱bunda̱.

Vu roco mu ure wa̱ wu a alanga e eteshe tsa̱ra̱ n toni.

9 Na̱ le ri na amayun shi,✝

okolo ele tapu ɗa u ri na̱ majiyan mo ukototosu,

waru a̱la̱kutsu e le ason ɗa,

elentsu ele fo idanshi ye epen ɗa.

10 A̱sula̱! Lyawa le a tanu nusu le,

vu zuwa ifoɓi iwuya i le i ka̱mba̱ aciyele.

Vu gba̱ra̱ le diga elime a̱ wu,

adama a̱bunda̱ a̱ nusu le,

adama a na a̱ 'ya̱sa̱a̱n nuwu a aci.

11 Amma lyawa aza a na a pa'asan ya̱'a̱ wu,

a yuwan ma̱za̱nga̱.

Lyawa le a̱ da̱na̱ e ishipa i ma̱za̱nga̱.

Vu pala le ne evelu a̱ wu,

adama a̱za̱ e icigi yaa aala a̱ wu,

a yuwan ma̱za̱nga̱ adama a̱ wu.

12 A̱sulazuva,

na amayun, vu zuwaa ta̱ a̱za̱ a̱ a̱ɓula̱ aba'un!

Isa'ani ya̱ wu i ta̱ oɓolo ne ele tsa̱ a̱a̱ra̱ga̱.