1 Canaa yi A̱sulazuva ishipa i sa'avu,

canaa yi A̱sulazuva ishipa,

a̱ɗu uvaɗi ma̱ɓula̱!

2 Canai ishipa uba̱ta̱ wa̱ A̱sulazuva,

i cuwa ala a̱ yi!

Urana suru i damma alabari

e iwawi ya̱ yi.

3 Dammai tsugbain tsa̱ yi

a̱tsuma̱ a nɗa,

na̱ linga va asalama va̱ yi

uba̱ta̱ wa ama suru.

4 Adama a na A̱sulazuva zagbain ɗa,

wu ntsaa ta̱ a ca yi tsugbain lon,

waru u rawa ta̱ a uwwa wovon wa̱ yi,

ula'awu na̱ musula̱ suru.

5 Adama a na musula̱ mu nɗa suru a̱ma̱li a ɗa,

amma A̱sulazuva a ɗa a yuwain zuva.

6 Tsugbain na̱ a̱ɓula̱,

a̱ tu uka̱nda̱ruwu na̱ a̱yi,

ucira na̱ tsugbain,

a̱ ta̱ a̱ a̱a̱'isa̱ a̱ yi.

7 I cuwa A̱sulazuva,

a̱ɗu a ama o uvaɗi.✝

I cuwa tsugbain tsa̱ yi

nu ucira wa̱ yi!

8 I cuwa tsugbain tsa ala a̱ A̱sulazuva,

a̱vu i uwa o ukowo wa̱ a̱a̱'isa̱ a̱ yi,

nu une'e u na i ta̱wa̱a̱ yi.

9 I kingyo elime a̱ A̱sulazuva,

adama a tsugbain tsa akiza a̱ yi.

I je'en lipu a̱ ma̱ka̱ka̱n ma̱ yi,

a̱ɗu uvaɗi ma̱ɓula̱!

10 I damma nɗa suru,

<<A̱sulazuva Mogono ma ɗa!>>

U shuwa̱ ta̱ uvaɗi,

waru wa̱ jinga̱ɗa̱ shi.

U ta yuwaan ama

uge'etosu wa̱ a̱ɓula̱.

11 Lyawa zuva yuwan ma̱za̱nga̱,

lyawa uvaɗi u yuwan mere,

lyawa mala ma yuwan

ma̱gugwa̱ ma̱ ma̱za̱nga̱,

ni ili i na i ri pe a̱tsuma̱ a̱yi suru.

12 Lyawa atsusa suru

a yuwan ma̱za̱nga̱,

oɓolo ni ili i na i ri pe a̱tsuma̱ a̱yi suru!

A̱vu fo ɗanga va̱ a̱rumbu suru,

a cana ishipa i ma̱za̱nga̱,

13 a̱ ma̱ka̱ka̱n ma̱ A̱sulazuva!

Adama a na u ta̱ lo a̱ ta̱wa̱,

u ta̱ lo a̱ ta̱wa̱ u ge'eto uvaɗi.

U ta̱ ge'eto ama o uvaɗi suru,

na amayun na̱ a̱ɓula̱.