1 A̱sulazuva a ɗa ekan a̱ va̱

ni iwawi i va̱,

wovon wa zane ɗa maa uwwa?

A̱sulazuva a ɗa upa'atan u va̱,

wovon wa zane ɗa maa uwwa?

2 Mantsa ma na a̱za̱ e iwuya

a̱ riya̱a̱ numu,

tsa̱ra̱ o una a̱mu,

a̱ ta̱ ta̱ɗa̱tsa̱ a̱vu a̱ riya̱.

3 Ko na̱ shi o oɓolo a̱ a̱soja

a̱ ka̱nda̱ruwa̱ mu,

okolo a̱ va̱ a da'wan shi.

Ko na̱ shi a̱ riya̱a̱ mu ta̱ nu uvon,

na̱ ne suru n ta̱ da̱na̱ na asuvu nven.

4 M pati ta̱ A̱sulazuva ili i ta̱,

apa ili i na m patiyi,

n ciga ta̱ n da̱nu

o u'wa wa̱ A̱sulazuva,

a wuma u va̱ suru,

tsa̱ra̱ n da̱na̱ e eneshe

tsugbain tsa̱ yi,

waru n zami urewesu wa̱ yi

a̱ A̱a̱'isamapaɗa a̱ yi.

5 Adama a na a̱tsuma̱ a rana va̱ a̱tsuma̱lima̱,

u to soko mu a̱tsuma̱ oogodo a̱yi,

u to soko mu o ululu

wa akiza oogodo a̱yi,

reve u zuwa mu zuva

va aatali o uga'an.

6 Adama n tsura̱ ulyuwu wa a aci

e ekere a n'yuwatan

n na n ka̱nda̱ruwa̱ numu,

o oogodo a̱yi ɗa maa ca kucci

nu uɗyo u ma̱za̱nga̱

n ta cana a̱vu n yuwaan A̱sulazuva tsuwe'e.

7 A̱sulazuva, vu uwwa uɗyo u va̱,

a mantsa ma na n ɗeyi,

vee e ene iliyali i va̱

vu uwwa mu.

8 A̱sulazuva vu damma ta̱,

<<Ta̱wa̱ uba̱ta̱ u va̱,>>

N ta̱ gba a̱ ta̱wa̱ uba̱ta̱ wa̱ wu.

9 She vu tawa urewesu wa̱ wu uba̱ta̱ u va̱ wan!

She vu lo aagbashi a̱ wu a̱tsuma̱ o upan wan!

A̱vu ɗa za vi ikambi i va̱,

she vu lyawa mu ko vu vari mu wan,

A̱sula̱ za vi iwawi i va̱!

10 Ko na̱ shi dada va̱ na̱ mma va̱ a vari mu,

A̱sulazuva a̱ ta̱ e idana mu.

11 A̱sulazuva vu roco mu re va̱ wu.

Vu rono mu aaɗanga o ure u mejege,

adama a na n'yuwatan n va̱

n ta pura n riya̱.

12 She vu vari mu e ekere a n'yuwatan n va̱

aza a na aa yuwusan adanshi e epen a aci a̱ va̱,

a̱ 'ya̱susa̱n ugbozu u va̱ wan.

13 A̱mu n ta̱ nu uzuwu wo okolo,

n te ene isa'ani ya̱ A̱sulazuva,

pa o uvaɗi wa aza a wuma.

14 Vu zuwa okolo uba̱ta̱ wa̱ A̱sulazuva,

vu da̱na̱ nu ugbamu wo okolo a̱vu vu kaɓa asuvu!

Amayun, vu zuwa okolo uba̱ta̱ wa̱ A̱sulazuva.