1 A̱ɗu ama a̱ va̱, poloi atsuvu ulobonu o uritosu u va̱,

i ka̱mbuwa̱ ugbozu e ili i na maa dansa.

2 N ta yuwaan ɗu adanshi ni iroci,✝

n damma ili i na i ri usokowu diga o ufaru,

3 ili i na tsu uwwai waru tsu revei,

ili i na nkaya n tsu n damma ntsu.

4 Tsoo sokowo muwun n tsu ili i nda shi,

tsu ta damma limatan ve elime linga na da̱na̱i ica ya̱ A̱sulazuva,

nu ucira wa̱ yi na̱ linga va asalama a na u yuwain.

5 U ca ta̱ udammu na̱ wila̱ e ekere a aza a Isra'ila,

aza a na e le ɗa ugundo wa Yakubu,

aza a na u dammai nkaya n tsu

o rito muwun nle,

6 tsa̱ra̱ limatan ve elime reve le,

hali na̱ muwun n na koto a matsain shi

ele fo o rito muwun n le.

7 Ne ɗa a zuwa okolo e le uba̱ta̱ wa̱ A̱sula̱,

e icina na̱ linga va̱ yi shi,

amma a ta a yuwan tsutoni nu udammu wa̱ yi.

8 O o'wo tsa a nkaya nle

aza a aciyogbamu na̱ limatan vu u'ya̱susa̱n a aci shi,

aza a na okolo e le a̱ ri uba̱ta̱ wa̱ A̱sula̱ shi,

aza a na okolo e le a yuwaan A̱sula̱ a̱ɓula̱ shi.

9 Ko na wo o'woi ali o uvon a Ifiramu a̱ ta̱ na̱ tan na aya,

a vadala ta̱ a suma o urana wu uvon.

10 A yuwan tsutoni na̱ nzuwulai ma̱ A̱sula̱ shi,

a̱vu a 'yuwan a yuwan wuma u le a̱tsuma̱ a̱ wila̱ wa̱ yi.

11 A 'yuwan ta̱ a cuwan na̱ linga na u yuwain,

na̱ linga va asalama na u roco nle.

12 U yuwan ta̱ linga va asalama elime a nkaya nle,

e iɗa ya Masar a̱ lyuci va Zowa.✝

13 U ne'eshen ta̱ mala a̱vu u pasa ne e le pe,

u zuwa ta̱ mini me isawan uba̱ta̱ u ta̱, cine vu revei aganga.✝

14 U ronoo le ta̱ aɗanga ne eleshe nu urana

ne ekan diga akina ayin suru.✝

15 Wu ɓatsa ta̱ atali a̱ a̱tsumona

waru u ca le ta̱ mini ma̱ a̱bunda̱, she damma mala.✝

16 U zuwa ta̱ mini mo uta̱ diga a aatali a na u ɓatsai,

u zuwa ta̱ mini me yene tsu uɗolu.

17 Amma a lyuwa ta̱ elime a yuwusan yi unusu,

a̱ 'ya̱sa̱sa̱a̱n Mogono ma̱ A̱sula̱ a aci ɗe a̱tsumona.

18 Gayin ɗa a̱ lyungwa̱i A̱sula̱,

o una̱ wi izami yi ilyalya i na aa uwwusa maluwa.✝

19 A̱vu a yuwaan A̱sula̱ adanshi a vama

a dansa, <<A̱sula̱ a ta gura foɓoo tsu a̱buki a̱ a̱tsumona?

20 Ko na wo o'woi u faba ta̱ aatali,

a̱vu mini mo uta̱,

hali ɗolu shiwan lon,

u ta gura lyuwato tsu?

U ta gura ca ama a̱ yi inama?>>

21 Ana A̱sulazuva a uwwa nle, a̱vu u yuwan upan lon,

u lyunguwa̱a̱ ugundo wa Yakubu na akina,

na amayun, upan wa̱ yi u 'yon ta̱ a aci aza a Isra'ila,

22 adama a na a̱ usu A̱sula̱ shi,

ko a zuwa okolo u ta a wawa le shi.

23 Amma A̱sula̱ a yuwan ta̱ adanshi na̱ zuva,

reve u zuwai u kpa̱tu'wa̱ tsu na̱ntsu,

24 a̱vu ilyalya yo oco tsi iro'i adama a ama a̱ yi,

ilyalya i na e ɗeyi <<mana>>,

u ca le ta̱ ishina diga zuva.✝

25 Reve a tama cu'un vi ilyalya i na nlingata ma̱ A̱sula̱ ntsu tamusa,

u lyunguwa̱ le ta̱ ni ilyalya ya̱a̱ a̱bunda̱

na a gura lyuwa biti.

26 A̱ tyo ɗe, reve u zuwa upepu wa asana u lapa diga zuva,

reve waru u zuwa upepu wu uyagi u lapa a̱tsuma̱ o ucira wa̱ yi.

27 Reve upepu'u u ta̱wa̱a̱ na̱ nnunu ma̱ a̱bunda̱,

cine vu revei wuyun wu nge'en m mala.

28 A̱sula̱ a zuwa ta̱ nnunu ndolo o oco

e memere mo uva̱la̱ta̱ u le,

uka̱nda̱ruwu no ogodo e le suru.

29 Reve a tama a̱ cuwa̱n cine a cigai,

adama a na u ca le ta̱ ili i na a̱ ri o utsa̱n.

30 Amma kafu a̱ cuwa̱n,

a̱ yi ubuwu a̱ na̱ le,

31 ɗaɗa upan wa̱ A̱sula̱ a̱ riya̱a̱ nle.

Reve wu una aza a na a la'ai ucira a̱tsuma̱ e le,

oɓolo no o olobo a Isra'ila.

32 Na̱ ne suru, reve aa lyuwa elime na̱ mayan mo unusu.

Na̱ linga va asalama na u yuwain suru, a ca okolo shi.

33 Adama o ndolo a ɗa u zuwai wuma u le u kotoi pere,

waru na addama acina le a̱ tsu la̱pa̱ kuwa̱ shi.

34 A mantsa ma na A̱sula̱ o unai ozo o ro le biti,

a̱vu akapi'i a zami yi a̱ ka̱mba̱ uba̱ta̱ wa̱ yi no okolo a̱ta̱.

35 A cuwan ta̱ na A̱sula̱ a ɗa, a̱ da̱na̱i Aatali o Upa'atan ule,

na Mogono ma̱ A̱sula̱ ma ɗa Za vi Iwawi i le.

36 Amma a̱vu a yuwusan yi una̱ wu uyo'o

a yuwusaan yi epen.

37 Okolo e le aa yuwusan yi tsutoni shi,

a̱ ri na̱ a̱ɓula̱ a nzuwulai ma̱ yi shi.

38 Na̱ ne suru, a̱yi za na tse ene iliyali i ɗa,

u yuwan ta̱ gafura vu nusu le,

agba u kototo le shi.

Mantsa na̱ a̱bunda̱ u tsu kaɓa ta̱ asuvu o upan wa̱ yi,

agba u zuwa upan wa̱ yi suru u puna̱ shi.

39 U cuwan ta̱ na e le lipu na̱ mpasa ɗa goon,

upepu u na wa lapusa na tsu ka̱mba̱ shi.

40 A̱ 'ya̱susa̱a̱n yi ta̱ a aci na̱ a̱bunda̱ a̱tsuma̱ a̱tsumona,

reve a̱ lungusa̱ yi okolo!

41 Na̱ a̱bunda̱ a̱ lyungwa̱ ta̱ A̱sula̱,

reve a zuwa Za va Akiza a Isra'ila a yuwan a̱tsumola̱ngu.

42 A cuwan nu ucira wa̱ yi shi,

nu urana u na u wawa nle

diga e ekere a n'yuwatan nle,

43 na u yuwain linga va asalama ni iroci

e iɗa ya Masar a̱ lyuci va Zowa shi.

44 U ka̱mba̱to ta̱ ɗolu va Masar mpasa,

a gura sowo mini mo ɗolu le shi.✝

45 U lyunguwa̱a̱ le ta̱ fo no oɓolo a ayun

aza a na a ca nle a̱tsuma̱lima̱,

no opoɗo a na a̱ lungusa̱i iɗa i le.✝

46 U ca ta̱ apapari itana ya̱ a̱ɗuma̱ i le,

akyun waru umatsun wa̱ a̱ɗuma̱ e le.✝

47 U lungusa̱ ta̱ ataci a̱ ina̱bi e le na atayan,

ɗanga vu ubiri le ni iro'i ya atayan.✝

48 Wu una ta̱ inan i le na atayan,

iliyamunga i le na̱ tsata.

49 U tsuwa̱a̱n le ta̱ upan wu usuɗuwu wa̱ yi,

na asuvu usuɗu na addama,

no oɓolo a nlingata ma̱ A̱sula̱ a̱za̱ o ukototosu.

50 U foɓoo ta̱ upan wa̱ yi ure.

U lyawa le wuma shi,

agba u tsuwa̱n le ta̱ mɓa̱la̱.

51 Wu ga̱la̱ ta̱ muwun ma ali mu ufaru wa aza a Masar suru,

umatsun wu ufaru u na a matsain

a̱tsuma̱ o ucira u le o ogodo a Ham.✝

52 Amma wu uta̱a̱ ta̱ ama a̱ yi tso oɓolo e ikyon,

reve u kuru ne le a̱ a̱tsumona tsi iliyamunga.✝

53 U kuru ta̱ ne le gbaga, adama she a uwwa wovon wan,

amma a̱vu mala ma lyuwa n'yuwatan nle.✝

54 Ne ɗa u ta̱wa̱to nle o utyo wi iɗa ya akiza a̱ yi,

a masasan ma na u lyuwai nu uvon na aciya̱yi.✝

55 U gba̱ra̱ ta̱ nɗa elime e le,

a̱vu u ne'eshen le iɗa'a wo o'wo le agadu,

a̱vu u zuwa gundo va Isra'ila a da̱nu a 'wa le.✝

56 Amma a̱vu a̱ lyungwa̱ A̱sula̱,

a̱vu a̱ 'ya̱sa̱a̱n Mogono ma̱ A̱sula̱ a aci,

a yuwan tsutoni nu udammu wa̱ yi shi.✝

57 Cine vu revei nkaya nle

ne ɗa a̱ da̱na̱i nu ulambu wa amayun

nu ulambu wa̱ a̱ɓula̱,

tsu utan u na u la̱nga̱i.

58 A zuwa yi ta̱ u yuwan upan na̱ ba̱ta̱ va̱ a̱ga̱nda̱ le,

a̱vu a zuwa yi tsushu'un na̱ a̱ma̱li e le.

59 Ana A̱sula̱ a uwwa nle, u yuwan ta̱ upan lon,

ɗaɗa gba u 'yuwain aza a Isra'ila suru suru.

60 U lyuwa ta̱ oogodo a̱ nda̱na̱ta̱ ma̱ yi a̱tsuma̱ a̱ Shilo,

oogodo a na u shuwa̱i a̱tsuma̱ a ama.✝

61 U lyawa ta̱ n'yuwatan n le a usa Aakpati a Nzuwulai,

iroci yu ucira wa̱ yi na̱ tsugbain tsa̱ yi.✝

62 U lyawa ta̱ matsun me pe'eni maa lyuwa a ama a̱yi,

u yuwan ta̱ upan lon na agadu a̱yi.

63 Uvon u lyuwa ta̱ muwun mo olobo n le,

reve esheli e le a lamba ali.

64 O una ta̱ fo nan ganu e le na̱ matsun me pe'eni,

agba a lyawa a̱ma̱ci e le shon shi.

65 Reve Zagbain 'yon ngashi nlavu n ɗa u shi a yuwusan,

tsa vali vu uvon na 'yoyin diga usowu u masayan ma̱ ina̱bi.

66 U gba̱ra̱ ta̱ n'yuwatan ma̱ yi,

a̱vu u zuwa le a uwwa wono u na u ri n koto shi.

67 Ɗaɗa gba u 'yuwain limatan va̱ Isuhu,

agba u ɗangwa ugundo wa Ifiramu shi.

68 Amma u ɗangwa ta̱ ugundo wa Yahuza,

Masasan ma̱ Sihiyona, za na u cigai.

69 U suwa ta̱ Uba̱ta̱ wa Akiza a̱yi,

cine vu revei u'wa wa̱ yi ɗe zuva,

za vu ucira za na waru shuwa̱i tsu uvaɗi hali hali.

70 U ɗangwa ta̱ Da̱wuda aagbashi a̱yi,

a̱vu u tawai uba̱ta̱ wa aguɓa e ikyon.✝

71 U tara yi ta̱ diga uba̱ta̱ wa aguɓa e ikyon na̱ mukyokyon,

adama wo o'wo za na o rono ama a̱yi a Yakubu aɗanga, Isra'ila agadu a̱ yi.

72 Da̱wuda rono le ta̱ aɗanga no okolo a̱ ta̱,

nu uguru u ɗa u rono nle aɗanga.