1 A̱ɗu a̱za̱ o tsugono,

i ta casu udammu u na u ri mejege gba?

I ta yuwusaan vaɗilima̱

uge'etosu wa amayun gba?

2 Suru suru, o okolo a̱ ɗu

i ta̱ foɓuso ulambu wa̱ a̱ɓula̱!

Ne ekere a̱ ɗu ɗa ya̱a̱ foɓuso

u'ya̱susa̱n wu ugbozu a̱tsuma̱ o uvaɗi.

3 Diga pe a̱a̱tsuma̱ a ɗa,

a̱za̱ e iwuya a tsu lyawa ure u mejege.

Babu na a matsan le,

a̱za̱ e epen a lyawa ta̱ ure u mejege.

4 Tsukono tsa̱ le tsa̱ ta̱ tsa̱ tsukono tso yo,

tsa̱ ruku na ulai atsuvu a̱ yi,

5 na tsa̱ kuɗa̱ a uwwa uɗyo

wu za na a yuwusaan yi a̱guma̱.

Ko ishipa yi za

tsu tsuboci.

6 A̱sula̱, vu kuɗa

anga a̱ na̱ le!

A̱sulazuva, vu foɗo

anga e ikamu!

7 Lyawa a̱ puwa̱n

tsa mini ma na me yeneshe,

mantsa ma na o ronoi tan le,

lyawa aya e le o mongolo.

8 Lyawa o o'wo tsa̱ ma̱tsa̱n mo ookoto

ma na ma̱ tsu jeruwe wo o'wo ederi

a mantsa ma na a̱ ri a mmalu,

tsa̱ mereɓu ma na a matsain ukwa̱,

she e ene ekan wan.

9 Kafu e reve o kototo le ta̱ tsa a awanda

A̱sula̱ a̱tsuma̱ o upan wu usuɗuwu wa̱ wu

vu kototo le, ele u ubuwu wuma.

10 A̱za̱ a̱ a̱ɓula̱ a ta yuwan ma̱za̱nga̱

a mantsa ma na e enei a tsupusaa le.

Na amantsa ma na

o kototoi n'yuwatan le suru suru.

11 A mantsa mo ndolo ma ɗa a ama a damma,

<<Amayun hali n gogo a buwa ta̱ a tsupusaa a̱za̱ a̱ɓula̱,

na amayun A̱sula̱ o tu lo na e ge'etosu uvaɗi.>>