1 A̱sulazuva, A̱sula̱ e iwawi i va̱, urana na ayin n ta̱wa̱ ta̱

na̱ mesun ma̱ va̱, a̱ ma̱ka̱ka̱n ma̱ wu.

2 Lyawa avasa a̱ va̱ a rawa a̱ ma̱ka̱ka̱n ma̱ wu,

vu poloo mesun ma̱ va̱ atsuvu!

3 Adama a na wuma u va̱ u ta̱ tapu na addama,

wuma u va̱ u ta̱ zuzu nu ukwa̱.

4 E kece mu ta̱ a̱tsuma̱ aza a na a̱a̱ ka̱ra̱ a̱ tyo a aason,

mo o'wo ta̱ tsa vuma na ri nu ucira shi.

5 A kasa mu ta̱ oɓolo nu ukwa̱,

cine vu revei aza a na o unai, a na a̱ ri nven a aason,

aza a na a buwai a na a cuwan ne ele shi,

aza a na a kasai, ni ikambishi ya̱ wu.

6 Vu vari mu ta̱ a̱a̱ka̱ri a̱ a̱ru'un,

uba̱ta̱ u na u la'ai a̱ru'un ni irumbu.

7 Upan wa̱ wu u ta̱ a̱bunda̱ a aci a̱ va̱,

hali u la'a ucira u va̱ tse e ikeɗu i mini.

8 Vu zuwa ta̱ n'utsa̱ n va̱ n suma mu,

vu zuwa mu ta̱ mo o'wo ili yi idaba e ekere e le.

A̱ ɓa̱ru mu ta̱ n ri n cine maa gura uta̱ shi.

9 Esu a̱ va̱ e inda ulobonu shi,

adama a̱bunda̱ a̱tsuma̱lima̱.

A̱sulazuva, n ta̱ e ɗewu va̱ wu usana suru,

a̱ 'ya̱susa̱n ekere a̱ va̱ a̱ tyo uba̱ta̱ wa̱ wu.

10 Vu tsu roco ta̱ a̱kwa̱kwa̱, linga va asalama a̱ wu?

Ko aza a na a̱ kuwa̱i ɗe, a̱ tsu 'yon ta̱ a yuwaan wu ica?

11 A tsu yuwan ta̱ adanshi e icigi ya̱ wu a̱tsuma̱ a aason?

Ko amayun a̱ wu uba̱ta̱ wu ukototosu?

12 A̱ tse ene ta̱ ili ya asalama a̱ wu, a̱tsuma̱ e irumbu?

Ko linga va̱ a̱ɓula̱ va̱ wu, e iɗa ya̱ a̱kwa̱kwa̱?

13 A̱sulazuva, n showen wu ta̱ adama e ikambishi,

usana suru avasa a̱ va̱ a̱ ta̱ 'ya̱wusa̱ ya̱ wu.

14 A̱sulazuva, adama a̱ nye ɗa vu vari numu?

Adama a̱ nye vu tawai urewesu wa̱ wu uba̱ta̱ u va̱?

15 Diga a̱mu o ulobo n ta̱ na̱ a̱tsuma̱lima̱,

hali n shi n ciga ma̱kuwa̱a̱.

Vu zuwa ta̱ wovon wa̱ wu u reme mu,

uba̱ta̱ una n vadalai biti.

16 Upan wa̱ a̱bunda̱ u la'a ta̱ ucira u va̱

wovon wa̱ wu u kototo mu ta̱.

17 A̱ ka̱nda̱ruwa̱ mu ta̱, tsi ikeɗu i mini urana ma̱ɓula̱,

a̱ ka̱nda̱ruwa̱ mu ta̱ uba̱ta̱ suru.

18 Vu zuwa ta̱ n'utsa̱ n va̱ na aza a na a ciga numu a suma mu,

irumbu i ɗa goon i'utsa̱ i va̱.