1 Amayun, A̱sula̱ za vi isa'ani ɗa e ekere aza a Isra'ila,

aza a na okolo e le a̱ ri cece.

2 Amma n shi ta̱ n yuwan zuzu na moo uta̱a̱ okolo,

waru uzuwu wo okolo a̱ va̱ o koto ta̱,

3 adama a na n yuwain tsushu'un na̱ a̱za̱ o uvaɗu

mantsa ma na me enei a̱za̱ e iwuya a lyuwusa elime.

4 Babu ili i na ya̱ ɓa̱la̱ le,

lipu le ta̱ gbaga.

5 Oo sowuso a̱tsuma̱lima̱ tsa akapi a ama shi,

waru a̱ ri ni ili i na ya̱a̱ ɓa̱la̱ le tsa akapi a ama shi.

6 Adama o ndolo uvaɗu u ɗa wo o'wo le iliyinlu,

reve o otowo aciyele u'ya̱susa̱n ugbozu.

7 Okolo e le a̱ ta̱ tapu ni iwuya

majiyan me iwuya i le u ri nu utyo shi.

8 A ta yuwusaan ozo o ro ulamu adansa iwuya a aci e le,

a̱tsuma̱ adanshi o uvaɗu u le u ɗa oo ɓongishi ozo o ro.

9 A ta dansa iwuya e ekere A̱sula̱ a na a̱ ri zuva,

waru adanshi e iwuya i le o uvaɗi ma̱ɓula̱.

10 Adama o ndolo ama a̱ A̱sula̱ a̱ ka̱mba̱ ta̱ uba̱ta̱ u le,

a̱ ususu ili i na a dansa suru.

11 A̱za̱ e iwuya a̱ tsu damma ta̱,

<<Cine A̱sula̱ ee reve?

Mogono ma̱ A̱sula̱ ma̱ ta̱ nu urevu?>>

12 Apa cine a̱za̱ e iwuya a̱ ri,

mantsa suru asuvu e le a̱ ta̱ nden,

utsuru u le waru a̱ da̱shishi.

13 Amayun, pere ɗa n guza̱i aciya̱va̱ cece,

pere ɗa n sa'ai ekere a̱ va̱ o ulambu wu unusu.

14 Adama a na vu ta casu mu a̱tsuma̱lima̱ urana suru,

usana suru vu ta casu mu oforo.

15 Na̱ shi n damma, <<N ta yuwan adanshi tsa̱ le,>>

n shi ta̱ a wina ama a̱ wu.

16 Amma na n yuwain ukadu u na mee reve ili i nda suru

wo o'wo mu ta̱ usa̱n lon,

17 she na n uwai a̱ a̱a̱'isa̱ a̱ A̱sula̱,

ɗaɗa n revei cine a̱za̱ e iwuya oo koso.

18 Amayun, vu zuwa le ta̱ uba̱ta̱ u na u ri ederi,

vu zuwa ta̱ a̱ riya̱ a̱ tyo uba̱ta̱ wu ukototosu kpa̱ra̱.

19 Ka̱lyuwa̱, cine o kototo nle nu uta̱,

wovon u kototo le ta̱ suru suru.

20 Cine alavu a̱ tsu ka̱ra̱ a mantsa ma na vuma juwain,

ne ɗa a̱vu Zagbain voo kototo le a mantsa ma na vu 'yoyin.

21 Mantsa ma na okolo a̱ va̱ a̱ la̱nga̱i,

waru ugbozu u va̱ u 'yoyin,

22 mo o'wo ta̱ ulo za na revei ili shi,

mo o'wo ta̱ cine vu revei nama vu una a̱ ma̱ka̱ka̱n ma̱ wu.

23 Na̱ ne suru n to oɓolo na̱ a̱vu kuci,

vu guza̱ ta̱ ukere usa'ani u va̱.

24 Vu toni mu ta̱ na̱ a̱sa̱la̱ a̱ wu,

o ukosu vu ta tara mu a̱ tyo uba̱ta̱ u tsugbain.

25 Zane ɗa n ri na̱ a̱yi ɗe zuva na ka̱ra̱i a̱vu?

Waru uvaɗi u ri ni ili i na n cigai na ka̱ra̱i a̱vu shi.

26 Lipu va̱ no okolo a̱ va̱ a ta gura o o'wo babu ucira,

amma A̱sula̱ a ɗa ucira wo okolo a̱ va̱

na agadu a̱ va̱ hali hali.

27 Aza a na a̱ ri alanga na̱ a̱vu a̱ ta̱ kuwa̱,

vu to kototo aza a na a̱ ri na amayun shi e ekere a̱ wu.

28 Amma a̱mu gba, u la'aa mu ta̱ n da̱na̱ zuzu na̱ A̱sula̱.

N zuwa wu ta̱ A̱sulazuva Zagbain vo o'wo upa'atan u va̱

n ta damma linga na vu yuwain suru.