1 N ta̱ e icigi ya̱ a̱ A̱sulazuva,

adama a na wu uwwa ta̱ uɗyo u va̱

wi izami yi ikambishi.

2 N ta̱ ɗe a ala a̱ yi a wuma u va̱ suru

adama a na u tsu zuwaa mu ta̱ atsuvu.

3 Meleshe mo o ukwa̱ ma̱ nla̱ mu ta̱,

usa̱n wa a aason u katala mu ta̱.

Addama na̱ a̱tsumola̱ngu a cina mu ta̱.

4 A̱vu n ɗe a ala a̱ A̱sulazuva,

<<A̱sulazuva, wawa mu!>>

5 A̱sulazuva za vi isa'ani na̱ a̱ɓula̱ a ɗa,

A̱sula̱ a̱ tsu za vi iliyali ɗa.

6 A̱sulazuva a̱ ta̱ ka̱lyuwusa̱,

za na ka̱ɗa̱to yi aciya̱yi.

Mantsa ma na n shi addama,

u wawa mu ta̱.

7 Ka̱mba̱ vu von,

okolo a̱ va̱,

adama a na A̱sulazuva,

a yuwaan wu ta̱ isa'ani lon.

8 Adama a na A̱sulazuva a wawa ta̱,

wuma u va̱ diga o ukwisa̱,

esu a̱ va̱ diga a aɓara,

ana a̱ va̱ diga o uta̱ɗa̱tsa̱sa̱.

9 Adama n wala a̱ ma̱ka̱ka̱n ma̱ A̱sulazuva,

o uvaɗi wa aza a wuma.

10 Ko na n dammai,

<<Mu uwwa ta̱ lipu lon.>>

N ta̱ u ɓanu na̱ amayun a̱ va̱.

11 O urupulu u va̱ n damma ta̱,

<<Ama suru a̱za̱ e epen a ɗa.>>

12 Nye maa ca A̱sulazuva,

adama e isa'ani i na

u yuwaan numu suru?

13 N ta̱ 'ya̱sa̱n mokotto me ili yo oso yi iwawi

a̱vu n ɗe ala a̱ A̱sulazuva.

14 N to shiton nzuwulai n va̱

uba̱ta̱ wa̱ a̱ A̱sulazuva,

a̱ ma̱ka̱ka̱n ma ama a̱ yi suru.

15 A̱sulazuva a tara ta̱ wuma

wa̱ a̱za̱ a̱ a̱ɓula̱ ili isa'ani lon.

16 Na amayun, A̱sulazuva,

a̱mu aagbashi a̱ wu a ɗa,

a̱mu aagbashi a̱ wu a ɗa

mawun ma aagbashi a̱ wu a ka,

a̱vu ɗa vu ba̱ɗa̱ numu diga a akani.

17 N ta ca kucci

vu ugodyusho uba̱ta̱ wa̱ wu,

a̱vu n ɗe a ala a̱ A̱sulazuva.

18 N to shiton nzuwulai n va̱

uba̱ta̱ wa̱ a̱ A̱sulazuva,

a̱ ma̱ka̱ka̱n ma a ama a̱ yi suru.

19 O ukowo wu u'wa wa̱ A̱sulazuva,

a̱ memere ma̱ Urishelima.

Cuwai A̱sulazuva!