1 A̱sulazuva ya̱'a̱ wu ɗa n tsura̱i,

uba̱ta̱ wu upa'atan wu ucira,

she vu lyawa mu,

mu uwwa wono wan.

Vu wawa mu

a̱tsuma̱ a̱ a̱ɓula̱ a̱ wu.

2 Vu zuwaa mu atsuvu!

Jika̱ vu wawa mu!

Lyawa vo o'wo mu

aatali o upa'atan wu ucira,

ukari wu ucira

u na waa wawa mu.

3 A̱vu ɗa upa'atan u va̱ na̱ mapari ma̱ va̱

vu ronoo mu aaɗanga cine vu yuwain nzuwulai.

4 Vu wawa mu a̱tsuma̱ a maza

ma na azuwaa numu,

adama a na a̱vu ɗa

uba̱ta̱ wu upa'atan wu ucira u va̱.

5 E ekere a̱ wu a ɗa

n zuwai wuma u va̱,✝

A̱sulazuva vu wawa mu,

A̱sula̱ a̱ a̱ɓula̱.

6 N 'yuwan ta̱ aza a na

a zuwaa yi a̱ma̱li e pere ucira,

amma a̱mu n zuwa ta̱ ucira u va̱

uba̱ta̱ wa̱ A̱sulazuva.

7 N ta yuwan mere na̱ ma̱za̱nga̱,

adama e icigi ya̱ wu i na u tsu vadala shi,

vee ene ta̱ atakaci a̱ va̱,

waru vu reve ta̱ nu usa̱n wo okolo a̱ va̱.

8 Vu lyawa mu e ekere a n'yuwatan n va̱ shi,

reve vu zuwa mu uba̱ta̱ u na u ri na addama shi.

9 A̱sulazuva vee ene iliyali i va̱,

adama a na n ta̱ pe a̱tsuma̱ a̱tsuma̱lima̱.

Esu a̱ va̱ a tsutsa ta̱ adama e mesun,

wuma u va̱ oɓolo na̱ lipu va̱ a̱ ta̱ka̱lyuwa̱ ta̱.

10 A̱tsuma̱lima̱ a jiba ta̱ rana wuma va̱,

mesun waru ma jiba ta̱ a'wan a̱ va̱,

okolo a̱ va̱ a kuɗa ta̱ adama atakaci,

hali e etele a̱ va̱ a̱ kuwa̱.

11 Mo o'wo ta̱ ili yi izo'oshi,

uba̱ta̱ wu n'yuwatan n va̱ suru,

ili i mo goro fo uba̱ta̱ wu nron mu nden n va̱,

aza a na e ene mu o ure biti a̱vu a uwa ilaɗi i va̱.

12 E icina ta̱ na̱ a̱mu va damma n kuwa̱ ta̱.

Mo o'wo ta̱ va damma aakatayimba.

13 Mu uwwa ta̱ adanshi e ke'en ke'en na̱ a̱bunda̱,

wovon u ka̱nda̱ruwa̱ mu ta̱ suru.

O ɓolo ta̱ a aci adama a̱ va̱,

a zamishi ure u na o una mu.

14 Amma A̱sulazuva n zuwa ta̱ ucira u va̱ ya̱'a̱ wu,

waru n damma ta̱, <<A̱vu ɗa A̱sula̱ a va̱.>>

15 Mantsa ma̱ va̱ ma̱ ta̱ e ekere a̱ wu

vu wawa mu e ekere a n'yuwatan n va̱,

oɓolo na aza a na a casu mu atakaci.

16 Lyawa vee ene iliyali ya aagbashi a̱ wu,

vu wawa mu a̱tsuma̱ e icigi ya̱ wu i na i tsu vadala shi.

17 A̱sulazuva she vu lyawa mu,

mu uwwa wono wan,

adama a na n showen wu ta̱.

Amma vu lyawa aza awuya a uwwa wono,

waru o von kpaku a̱tsuma̱ aason.

18 Lyawa una̱ u le u kpa̱to,

adama a na nu uvaɗu

oɓolo nu ulamu u ɗa,

a tsu yuwan adanshi

a aci ama a̱ a̱ɓula̱.

19 Te ɗa iroci ya̱ a̱bunda̱ e isa'ani ya̱ wu,

isa'ani i na vu foɓoyi aza a na a uwwusa wovon wa̱ wu.

Isa'ani i na vu rocoyi vaɗilima̱,

uba̱ta̱ wa aza a na

aa zama upa'atan ya̱'a̱ wu.

20 Vu tsu soko le ta̱ uba̱ta̱ u na vu ri,

e ekere a ama a na a yuwusan maza.

Vu tsu zuwa le ta̱ gbaga uba̱ta̱ wu nden ma̱ wu,

adama a uwwa wisulusa wa ama wan.

21 Aba'un za va̱ A̱sulazuva a ɗa!

Adama a na u roco mu ta̱

icigi ya̱ yi i na i tsu vadala shi,

a mantsa ma na a̱ ka̱nda̱ruwa̱ numu

a̱ riya̱a̱ numu nu uvon.

22 A̱tsuma̱ o wovon u va̱ n tara ta̱,

<<U tawa mu ta̱ e esu a̱ yi!>>

Na̱ ne suru wu uwwa ta̱ ipati i va̱

e izami vee ene iliyali i va̱,

a mantsa ma na n ɗe nuwu

adama e ikambishi.

23 I ciga A̱sulazuva,

suru nɗu aza a na a̱ ri e icigi ya̱ yi!

A̱sulazuva a̱ ta̱ ka̱lyuwusa̱

aza a na a̱ ri na̱ a̱ɓula̱,

waru u tsu tsupa ta̱ aza a aciyogbamu lon.

24 I da̱na̱ nu ucira no okolo o ugbamu,

a̱ɗu na suru i zuwai okolo a̱ ɗu

uba̱ta̱ wa̱ A̱sulazuva.