1 A̱sulazuva Mogono me ili suru!

N te e icigi ya̱ A̱a̱'isa̱mapaɗa a̱ wu lon.

2 Ɗe ɗa n cigai n da̱na̱!

A̱sulazuva n ta maluwa mo ukowo wa̱ a̱ a̱a̱'isa̱ a̱ wu.

Na̱ ma̱za̱nga̱ ma̱ a̱bunda̱ ma ɗa ma cana ishipa

a̱ tyo a̱ A̱sula̱ a wuma.

3 Ko matali ma̱ tsura̱ ta̱ u'wa,

ko manunu ma̱ ta̱ ni nkinda adama aciya̱yi,

uba̱ta̱ u na wa̱a̱ da̱nu na̱ muwun ma̱ yi,

uba̱ta̱ zuzu na̱ masa'a ma̱ wu,

A̱sulazuva Mogono me ili suru,

Mogono ma̱ va̱ na̱ A̱sula̱ a̱ va̱.

4 A̱za̱ a̱ ma̱za̱nga̱ a ɗa aza a na a̱ ri nden o u'wa wa̱ wu,

mantsa suru a ta yuwusan wu ishipa yi ica.

5 A̱za̱ a̱ ma̱za̱nga̱ a ɗa, aza a na a̱ tsura̱i ucira diga uba̱ta̱ wa̱ wu,

aza a na majiyan me le a̱ ka̱ra̱ a̱ ya̱wa̱ Sihiyona.

6 Mantsa ma na a̱ ka̱ra̱la̱i o Uka̱ri u babu mini,

a̱ ka̱mba̱to yi ta̱ uba̱ta̱ wu n ɓula n mini,

cine mini mo ufaru, ma̱ tsu ɓa̱ru ba̱ta̱ na̱ ɗolu.

7 A̱ ta̱ da̱shishi ucira,

hali she na̱ za suru roco aciya̱yi

elime a̱ A̱sula̱ a̱ Sihiyona.

8 A̱sulazuva, A̱sula̱ Mogono me ili suru, uwwa avasa a̱ va̱,

vu zuwaa mu atsuvu A̱sula̱ a Yakubu!

9 A̱sula̱ vu ka̱lyuwa̱ a̱a̱ra̱ga̱ a̱ tsu mogono,

vee ene iliyali yi za na vu tawai.

10 Urana uta̱ o u'wa wa̱ wu,

u la'a ta̱ rana ukpakukupa uba̱ta̱ u ro.

Uta la'a mu n da̱na̱ za vi ipiri o una̱ntsu wu u'wa wa̱ A̱sula̱

a na ma̱a̱ da̱nu, o ogodo a̱za̱ e iwuya.

11 Adama a na A̱sulazuva A̱sula̱, a̱yi ɗa urana na̱ a̱a̱ra̱ga̱ a̱ tsu,

u tsu ta̱wa̱ ta̱ na aba'un, ni isa'ani na̱ tsugbain.

Babu ili i sa'ani, i na A̱sulazuva u tsu putsaa,

aza a na a yuwusan mmalu, na amayun o okolo ele.

12 A̱sulazuva Mogono me ili suru,

za ma̱za̱nga̱ ɗa vuma na zuwai okolo a̱ yi uba̱ta̱ wa̱ wu.