1 A̱sulazuva Mogono ma ɗa!

Lyawa uvaɗi u yuwan ma̱za̱nga̱,

lyawa nɗa m memere ma mala fo n za̱nga̱na̱.

2 Eleshe ni irumbu pici,

a palai ta̱,

a̱ɓula̱ nu uge'etosu wa amayun,

a ɗa ikyun i tsugono tsa̱ yi.

3 Akina a̱ ta̱ elime a̱ yi,

a̱ kula̱tosu n'yuwatan ma̱ yi,

nna n ri uka̱nda̱ruwu na̱ a̱yi.

4 Imaɗatsu ya̱ yi, i ta̱ e ikanasa uvaɗi,

uvaɗi we ene ta̱ reve u jinga̱ɗa̱.

5 Nsasan mu jeruwe ta̱,

tsa abaji e ishiki,

a̱ ma̱ka̱ka̱n ma̱ A̱sulazuva,

a̱ ma̱ka̱ka̱n ma Zagbain vu uvaɗi suru.

6 Zuva ta adanshi a̱ a̱ɓula̱ a̱ yi,

nɗa suru me ene ta̱ tsugbain tsa̱ yi.

7 Aza a na aa yuwusaan ruma a̱ga̱nda̱ suru

a uwwa ta̱ wono,

ne ɗa fo aza a na a yuwusan uvaɗu na̱ a̱ma̱li.

Musula̱ suru a̱ ta̱ kingyo a̱ ma̱ka̱ka̱n ma̱ yi.

8 A̱sulazuva, ama a Sihiyona a uwwa ta̱,

reve a yuwan ma̱za̱nga̱,

reve mulyuci ma Yahuda,

n yuwan mere,

adama o uge'etosu wa amayun a̱ wu.

9 A̱vu A̱sulazuva,

a̱vu ɗa vu la'ai tsugbain a̱tsuma̱ o uvaɗi suru,

vu la'a ta̱ musula̱ suru tsugbain.

10 Lyawa aza a na a cigai A̱sulazuva

a 'yuwan iwuya.

U tsu yuwan ta̱ mapari

uba̱ta̱ waa ama a̱ a̱ɓula̱ a̱ yi,

a̱vu u wawa le e ekere a̱za̱ e iwuya.

11 Ekan a̱ ta̱ e ikanasa a̱za̱ a̱ a̱ɓula̱,

ma̱za̱nga̱ waru, uba̱ta̱ wa aza a amayun o okolo.

12 I yuwan ma̱za̱nga̱ a̱ɗu a̱za̱ a̱ɓula̱,

adama e ili i na A̱sulazuva a yuwain!

I cuwan ili i na za va a Akiza a yuwain,

a̱vu i godyoo yi.