1 A̱tsuma̱ a Yahuda e reve ta̱ A̱sula̱,

ala a̱ yi a̱ ta̱ na̱ tsugbain a̱tsuma̱ a Isra'ila.

2 U shuwa̱ ta̱ oogodo a̱ yi a̱tsuma̱ a Salem,

uba̱ta̱ u na u ri nden a̱tsuma̱ a̱ Sihiyona.

3 Ɗe ɗa wu kuɗai aya akina a n'yuwatan,

na̱ a̱a̱ra̱ga̱ oɓolo na̱ mutsun mu pe'eni, ni itana yu uvon i le. Wivuwun

4 A̱sula̱, tsugbain tsa̱ wu nu ucira wa̱ wu a la'a ta̱ tsugbain tsa̱ nsasan,

uba̱ta̱ u na vu lyuwai a aci a n'yuwatan ma̱ wu!

5 O una ta̱ ali e le na a gurai uvon,

reve aza a na o una nle a̱ pura̱ itana yu uvon i le.

Agba babu za na gura yuwain ulinga ni itana yu uvon ya̱ yi.

6 A̱sula̱ a Yakubu, a tsuɓari tsa̱ wu

ido oɓolo na akumbi e ido a̱ riya̱ ta̱ a̱ kuwa̱.

7 A̱vu ɗa goon aa uwwa wovon!

Zane ɗa a gura isawan a̱ ma̱ka̱ka̱n ma̱ wu,

a mantsa ma na vu ri o upan?

8 Diga zuva a uwwa ta̱ ugana wu uge'etosu u na vu paɗai,

iɗa yu uwwa ta̱ wovon, reve u rungwa̱ kpen.

9 A yuwan ta̱ ne a mantsa ma na a̱vu A̱sula̱ vu 'yoyin na vaa paɗa ugana,

adama vu wawa aza a na o sowuso a̱tsuma̱lima̱ a̱tsuma̱ o uvaɗi. Wivuwun

10 Amayun, upan wa̱ wu a aci a vaɗilima̱

u tsu ta̱wa̱a̱ wu ta̱ ni ica,

akapi a ama a na a la'ai diga o upan wa̱ wu

o to o'wo wu gbakala.

11 Yuwayin A̱sulazuva A̱sula̱ a̱ ɗu akucunu

waru i shiton le.

Lyawa nɗa n na n ri nden uka̱nda̱ruwu na̱ a̱yi suru

a̱ ta̱wa̱a̱ Za na a uwwusa wovon na̱ ne'en.

12 U ka̱ɗa̱to ta̱ a̱za̱ o tsugono,

ngono mu uvaɗi n ta uwwusa wovon wa̱ yi.