1 Ta̱wa̱i tsu canayi ishipa i ma̱za̱nga̱

a̱ tyo uba̱ta̱ wa̱ A̱sulazuva,

lyawa tsu yuwain yisaali i ma̱za̱nga̱,

a̱ tyo a Aatali e iwawi i tsu.

2 Lyawa tsu ta̱wa̱i a̱ ma̱ka̱ka̱n ma̱ yi

nu ugodyusho,

tsu yuwain ishipa i ma̱za̱nga̱

ni ishipa yi ica uba̱ta̱ wa̱ yi!

3 Adama a na A̱sulazuva, A̱sula̱ a gbain a ɗa,

Mogono ma gbain ma na ma la'ai musula̱ suru.

4 Ncilecile yi nsasan a̱za̱ a̱ yi a ɗa

waru za̱la̱ vu uvaɗi suru u ta̱ e ekere a̱ yi.

5 Mala za va̱ yi ɗa,

a̱yi ɗa u yuwan niyi,

waru ekere a̱ yi a ɗa

a yuwain iɗa yu u'yewu.

6 Ta̱wa̱i, tsu ka̱ɗa̱toi

tsu yuwaan niyi a̱ga̱nda̱,

lyawa tsu kingyoyi,

a̱ ma̱ka̱ka̱n ma̱ A̱sulazuva

za na yuwan ntsu!

7 Adama a na a̱yi ɗa A̱sula̱ a̱ tsu,

a̱tsu waru ama a na waa guɓusa ɗa,

oɓolo e ikyon i na wa̱a̱

ka̱lyuwusa̱ na aciya̱yi.

Ana'an na̱ yu uwwa uɗyo wa̱ yi,✝✝

8 she i yuwan okolo o ugbamu,✝

cine nkaya nɗu n yuwain ɗe Meriba* wan,

na̱ cine a yuwain,

o urana u ndolo a Masa* a̱tsumona wan,

9 uba̱ta̱ u na nkaya nɗu

n lyungwa̱ numu,

ko na wo o'woi ene ta̱

ili i na n yuwain esu e le.

10 A'wan amunga o ndolo,

n da̱na̱ ta̱ o upan na ama'a.

Reve n damma,

<<Ama a nda a̱za̱ o ulambu u tsutoni a ɗa,

adama a na a 'yuwan ta̱

a yuwan tsutoni nu udammu u va̱!>>

11 N kucina ta̱,

a̱tsuma̱ o upan u va̱ n damma,✝

<<A uwa a wivuwun u va̱ shi!>>