1 I godyoo A̱sulazuva,

i ɗe a ala a̱ yi,

i lyawa nɗa n reve linga va̱ yi.

2 I canaa yi ishipa,

i cuwa yi,

i damma linga va asalama a̱ yi suru.

3 I yuwan uvaɗu na ala a akiza a̱ yi,

lyawa okolo aza a na a zama A̱sulazuva

a yuwan ma̱za̱nga̱.

4 I zami A̱sulazuva nu ucira wa̱ yi,

i zami urewesu wa̱ yi kuci.

5 I cuwan na̱ linga va asalama a na u yuwain,

ni iroci ya asalama a̱ yi,

nu uge'etosu u na u dammai.

6 A̱ɗu ugundo wa Ibrahim aagbashi a̱ yi,

a̱ɗu muwun ma Yakubu,

aza a na u ɗangwai.

7 A̱yi ɗa A̱sulazuva A̱sula̱ a̱ tsu,

uge'etosu wa̱ yi u ta̱ uba̱ta̱ suru o uvaɗi.

8 U ta cuwusan na akucunu a̱ yi a babu ukotu,

na̱ nzuwulai n na u yuwayin gundo ukpakukupa,

9 na akucunu a na u yuwayin Ibrahim,

na̱ nzuwulai a̱ tyo ya Ishiyaku,

10 na u shitoyin uba̱ta̱ wa Ishiyaku

wo o'wo ili i na a yuwan,

uba̱ta̱ wa Yakubu tsa akucunu a na a̱ ri babu ukotu,

11 adansa <<A̱vu ɗa maa ca iɗa ya Ka'ana

wo o'wo agadu a̱ wu.>>

12 Mantsa ma na a̱ da̱na̱i ama wa'a,

omocin a̱tsuma̱ a̱ yi,

13 a̱ da̱na̱ ta̱ e igaru diga iɗa i nda a̱ tyo e iɗa i ndeɗe,

diga o tsugono tsa nda a̱ tyo o tsugono tsa̱ ndeɗe.

14 U lyawa ozoro a tsugba le shi,

u ɓara̱ ta̱ ngono waru adama e le,

15 adansa,

<<She i ju'wa̱n aza a na n ɗangulai wan,

ko i yuwaan ama̱sula̱ a̱ va̱ i iwuya wan.>>

16 U zuwa ta̱ ambulu a̱ ta̱wa̱ e iɗa'a,

reve waru a̱ lungusa̱

uba̱ta̱ u na ilyalya i le ya̱a̱ ta̱wusa̱.

17 U lyungu ta̱ vuma ro elime e le,

Isuhu vuma na a winai tsa aagbashi.

18 A amaton ta̱ ana a̱ yi na̱ malapa,

reve a zuwaa yinlu ya̱ yi rumu,

19 hali mantsa ma na ili i na u dammai i shiwain,

she mantsa ma na adanshi A̱sulazuva

o uta̱a̱ niyi babu unusu.

20 Mogono ma̱ lyungu ta̱ a̱ ba̱ɗa̱ yi,

zagbain va akapi a ama

a zuwa ta̱ a lyawa yi fa̱a̱n.

21 U zuwa yi ta̱ wo o'wo zagbain vu u'wa'a,

u yuwan tsugbain tsi ili i na u ri na̱ a̱yi suru,

22 u yuwan na̱ ngono ma̱ yi suru cine u cigai,

u rito ta̱ mbara ugbozu.

23 Ɗaɗa Isra'ila uwai a Masar,

Yakubu waru u da̱na̱ tso mocin e iɗa ya Ham.

24 A̱sulazuva a zuwa ta̱ ama a̱ yi

a yuwan a̱bunda̱ lon,

u yuwan le ta̱ a̱bunda̱ a na a la'ai

n'yuwatan n le a̱bunda̱.

25 U vadala ta̱ okolo e le

a 'yuwan ama a̱ yi,

waru a suɗato agbashi a̱ yi.

26 U lyungu ta̱ aagbashi a̱ yi Musa,

oɓolo na̱ Haruna,

aza a na u ɗangwai.

27 A yuwan ta̱ ili ya asalama a̱yi,

reve a yuwan ulinga wa asalama

e iɗa ya Ham.

28 U lyungu ta̱ irumbu

reve u zuwa iɗa i rumba̱na̱.

Adama a na aza a Masar a yuwan tsutoni

na adanshi a̱ yi shi.

29 U ka̱mba̱to ta̱ mini me le mpasa,

reve u zuwa mugula nle n kuwa̱.

30 Iɗa i le i shiwan ta̱ no opoɗo,

hali nu ukobu u mogono me le.

31 U yuwan ta̱ adanshi,

reve oɓolo ayun a shiwan,

reve ikurukuta i shiwan iɗa'a ma̱ɓula̱.

32 U lyunguwa̱a̱ le ta̱ na atayan diga zuva,

na̱ imaɗatsu e iɗa'a ma̱ɓula̱.

33 Wu faba ta̱ ataci e le na̱ ɗanga vu biri,

reve u kototo a akapi

a ɗanga vi iɗa'a suru.

34 U yuwan ta̱ adanshi,

reve apapari a̱ ta̱wa̱ babu utyo,

35 reve a tama a̱vu'un a na a̱ ri e iɗa suru,

a tama itana yu a̱ɗuma̱ yi iɗa i le.

36 Wu ga̱la̱ ta̱ muwun mu ufaru mi iɗa'a suru,

muwun mu ufaru n lipu vali.

37 Wu uta̱a̱ ta̱ aza a Isra'ila,

utanuwu na̱ azurufa na̱ zinariya,

babu arambi a̱tsuma̱ e elentsu e le.

38 Masar yuwan ta̱ ma̱za̱nga̱ a na a̱ ka̱ra̱i,

adama a na wovon wa aza a Isra'ila u reme le ta̱.

39 Wu ba̱ruwa̱ ta̱ eleshe tsa apalutsu,

akina waru adama u ca ekan na ayin.

40 A pati ta̱ a̱vu a ca le nroni

reve waru a̱ cuwa̱ton le no opopofu diga zuva.

41 U kpa̱tu'wa̱ ta̱ aatali,

reve mini mo o uta̱,

e ilaɗi cine vu revei uɗolu

u tsu yene a̱ a̱tsumona.

42 Adama a na u cuwain na akucunu a akiza a̱ yi

a na u yuwayin aagbashi a̱ yi Ibrahim.

43 Wu uta̱a̱ ta̱ ama a̱ yi na̱ ma̱za̱nga̱,

aza a na u ɗangwai ni ishipa i mere.

44 U ca le ta̱ nɗa ma atakpaci,

a̱vu a̱ pura̱ utsuru wa̱ a̱tsuma̱lima̱

a na ozo o ro o sowoi.

45 Tsa̱ra̱ o toni ili i na u dammai

na̱ wila̱ wa̱ yi.

I cuwa A̱sulazuva.