1 A̱sulazuva zagbain ɗa,

wu ntsaa ta̱ a ca yi tsugbain lon,

a̱ lyuci va̱ A̱sula̱ a̱ tsu,

a masasan ma akiza a̱ yi.

2 Masasan ma Sihiyona ma̱ tu uga'an,

nu ulobonu wa̱ a̱ka̱nla̱ uba̱ta̱ wa̱ A̱sula̱,

lyuci gbain mo Mogono ma gbain,

za na tsu ta̱wa̱a̱ na̱

ma̱za̱nga̱ o uvaɗi suru.

3 A̱sula̱ a̱ ta̱ pe

a̱ lyuci gbain na ri nu ukari,

adama a na a̱yi na aciya̱yi

uba̱ta̱ wu upa'atan u ɗa.

4 A̱yi ɗa nda ngono n ɓoloi aci,

adama a̱ riya̱a̱ masasan ma Sihiyona nu uvon.

5 Amma ana e ene niyi,

a̱vu a uwa asalama

a uwwa wovon,

ɗaɗa a sumai.

6 Meje'en ma̱ lipu ma̱ guza̱ le ta̱,

reve o sowo a̱tsuma̱lima̱

tsa ka na ri a gan limatan.

7 Tsu upepu wa asana,

za na tsu lungusa̱

antsun a Tarshishi.

8 Cine tsu uwwai,

ne ɗa tse enei,

a̱ lyuci va̱ A̱sulazuva o oɓolo a̱ a̱soja a zuva,

a̱ lyuci va̱ A̱sula̱ a̱ tsu,

za na A̱sula̱ e geshe yi hali hali.

9 A̱sula̱, a̱tsuma̱ A̱a̱'isamapaɗa a̱ wu,

tsu ta yuwusan majiyan

me icigi ya̱ wu i na i tsu vadala shi.

10 Ama a ta yuwusan wu ica uba̱ta̱ suru,

ala a̱ wu a baza ta̱ o uvaɗi suru

vu ta yuwusan tsugono na̱ a̱ɓula̱.

11 Lyawa Masasan ma̱ Sihiyona

ma yuwan ma̱za̱nga̱,

mulyuci ma Yahuda n yuwan mere,

adama o uge'etosu wa̱ wu.

12 'Ya̱wa̱i i ka̱lyuwa̱ Sihiyona,

i ka̱nda̱ruwa̱ yi,

i kece saa vu uga'an va̱ yi.

13 I ka̱lyuwa̱ ɓaɓu vu ucira va̱ yi,

i ka̱lyuwa̱ waru kari va̱ yi,

adama i tsura̱ ili i na ya damma limatan ve elime.

14 Adama a na A̱sula̱ a nda

A̱sula̱ a tsu a ɗa hali hali,

u to ronoo tsu aaɗanga hali a̱ tyo o ukosu.