1 Vu ntsaa ta̱ a cuwa wu A̱sula̱,

a̱tsuma̱ a̱ Sihiyona,

ya̱'a̱ wu ɗa tso o shiton akucunu a̱ tsu.

2 A̱vu na vaa uwwusa avasa,

vaɗilima̱ suru ta̱ ta̱wa̱ ya̱'a̱ wu.

3 A mantsa ma na nusu la'ai ucira u tsu,

vu yuwaan tsu gafura vu nusu tsu.

4 A̱za̱ a̱ ma̱za̱nga̱ a ɗa aza a na vu ɗangwai,

a̱vu vu ta̱wa̱to le zuzu

tsa̱ra̱ a̱ da̱nu o ukowo wa̱ wu!

Tsu cuwa̱n ta̱ ni ili i sa'ani yu u'wa ya̱ wu,

na̱ a̱za̱ a̱ A̱a̱'isamapaɗa a akiza a̱ wu.

5 Vu usu tsu na̱ linga va asalama va̱ a̱ɓula̱,

A̱sula̱ za vi iwawi i tsu.

A̱vu ɗa uzuwu wo okolo o uvaɗi ma̱ɓula̱,

hali fo na aza a na

a̱ ri ɗe o upasalai u mala.

6 Za na yuwain nsasan nu ucira wa̱ yi,

wotowu na̱ a̱ra̱ga̱ o ucira.

7 A̱vu ɗa vi isawatoin ma̱gugwa̱ ma mala,

ni ilama yi ikeɗu i le

oɓolo na̱ yisali yi nɗa.

8 Aza a na a̱ ri nden o ukosu wu uvaɗi

a ta uwwusa wovon

wi iroci yi linga va asalama a̱ wu.

Diga asana a̱ tyo a̱livu

vu ta zuwusa le a̱ 'ya̱sa̱sa̱n uɗyo u ma̱za̱nga̱.

9 Vu ta̱ e idanasa iɗa

ana va̱a̱ lyungusa̱a̱ yi ni iro'i,

waru vu tsu zuwai ta̱ ulobono lon.

Muko'o ma̱ A̱sula̱ n shiwan ta̱ na̱ mini,

tsa̱ra̱ a ca ama itana yu uɗuma̱,

adama a na ne ɗa vu foɓoi.

10 Vu tsu ca ta̱ a̱ɗuma̱ mini,

vu tsu re'weto ta̱ ikeɗu,

wo o'wo pati ni iro'i,

reve fo vu zuwaa ili i na a̱ cu'wa̱in aba'un.

11 A̱sula̱, adama e isa'ani ya̱ wu,

a̱ tsura̱ ta̱ lyushi sa'ani

hali fo ikeke ya̱ wu i shunwa

a̱ ka̱ra̱ o moco.

12 Anlya a̱tsumona a shunwa ta̱ lon,

nsasan n ɓa̱ru ta̱ na̱ ma̱za̱nga̱.

13 Uba̱ta̱ wa aguɓa a̱ a̱rumbu

u shunwa ta̱ no oɓolo e ikyon.

Waru ka̱ri shunwa ta̱

ni itana yu uɗuma̱,

a̱ 'ya̱susa̱n uɗyo wi ishipa

adama a̱ ma̱za̱nga̱.