1 A̱sula̱ tsu uwwa ta̱ na atsuvu a̱ tsu,

nkaya n tsu n damma tsu ta̱,

linga na vu yuwain a mantsa me le,

a mantsa ma na ma̱ ka̱ra̱i.

2 Cine a̱vu na aciya̱wu

vu gba̱ra̱i aza a na e revei A̱sula̱ shi,

a̱vu vu shuwa̱ nkaya ntsu e iɗa i le.

Cine vu ge'eto yi nɗa n ro

a̱vu vu zuwa a ama a̱ wu abala.

3 Na̱ matsun me pe'eni me le ma ɗa,

a lyuwai iɗa'a nu uvon shi,

nu ucira u le u ɗa

a lyuwai a aci iɗa'a shi,

amma nu ucira wa̱ wu u ɗa,

na vu roco nle vu to oɓolo ne e le,

o rocosu vu ta̱ e icigi i le.

4 A̱vu ɗa Mogono ma̱ va̱ na̱ A̱sula̱ a̱ va̱.

Vu ca ta̱ a ama a̱ wu

aza a Isra'ila ulyuwu wa aci.

5 Nu ucira wa̱ wu u ɗa

tsu kototoi n'yuwatan n tsu.

Na a ala a̱ wu a ɗa tsu dasai

aza a na a yuwusan nla̱ngi na̱ a̱tsu.

6 N zuwa ucira u va̱

o utan u va̱ shi,

matsun me pe'eni ma̱ va̱

ma̱a̱ ta̱wa̱a̱ mu

nu ulyuwu wa aci shi.

7 Amma vu wawa tsu ta̱

e ekere a n'yuwatan ntsu,

waru vu ca ta̱ aza a na a cigai

e ene tsu shi wono.

8 E ekere a̱ A̱sula̱ a ɗa

tsaa yuwusan afalu mantsa suru,

waru tsu ta cuwa a ala a̱ wu hali hali.

9 Amma gogo vu vari tsu ta̱,

reve vu zuwa a ca tsu wono,

vu buwa o uta̱sa̱ na̱ a̱soja a̱ tsu shi.

10 Vu zuwa tsu ta̱ tsu sumaa

n'yuwatan n tsu,

aza na a 'yuwan ntsu

a̱vu a̱ pura̱ itana i tsu.

11 Vu zuwa ta̱ tso o'wo

tsi ikyon i na a paɗa,

reve vu bete'we tsu a̱tsuma̱ a nɗa.

12 Vu wina ta̱ ama a̱ wu ni ikebe ke'en,

vu tsura̱ ili i na i uwa nuwu shi.

13 Vu lyawa ta̱ nron mu nden n tsu

n yuwaan tsu ulamu,

tso o'wo ta̱ ili yi izo'oshi

ni ili ya adanshi uba̱ta̱ wa aza a na

a̱ ri uka̱nda̱ruwu na̱ a̱tsu.

14 Vu lyawa tsu ta̱ tso o'wo

ili yi iroci a̱tsuma̱ a nɗa,

ama a̱ ka̱ra̱ ta̱ o ulamu

a lumgbatsasa tsu aci.

15 Mantsa suru n ta̱ pe a̱tsuma̱ wono,

wono u ɓa̱ru mu ta̱ uba̱ta̱ suru.

16 Adama aza adanshi e pere

oɓolo na̱ a̱za̱ o ulamu,

na adama a n'yuwatan

aza a na a cigai a tsupa.

17 Ili i ndolo i cina tsu ta̱ suru,

ko na wo o'woi tsi icina na̱ a̱vu shi,

ko tsu kuɗa akucunu a̱ wu shi.

18 Okolo a̱ tsu a vadala diga uba̱ta̱ wa̱ wu shi,

ana tsu a lyawa ure wa̱ wu shi.

19 Na̱ ne suru vu 'yuwan ta̱

a kamba a̱ tsu,

a̱vu vu lyawa tsu

e ekere a̱ musa̱n mu una,

vu lyawa tsu ta̱

a̱tsuma̱ e irumbu pici.

20 A damma tsi icina ta̱

na ala a̱ A̱sula̱ a̱ tsu,

ko a damma tsu yuwaan ta̱

ma̱sula̱ mo ro a̱ga̱nda̱,

21 vu shi ta̱ e reve,

adama a na vu reve ta̱

majiyan mo okolo a̱ tsu suru.

22 Adama a̱ wu a ɗa

o unusa tsu mantsa suru,

a̱ ka̱mba̱to tsu ta̱

cine vu revei ikyon i na a paɗa.

23 'Yon A̱sulazuva!

Nye i zuwai vu ri a nlavu?

'Yon! She vu vari tsu suru suru wan.

24 Nye i zuwai vu sokoyi urewesu wa̱ wu?

Adama nye vi icinai

na̱ a̱tsuma̱lima̱ a̱ tsu?

Adama nye vi icinai

nu ule'e u na a yuwusan tsu?

25 O polo tsu ta̱ e iɗa,

a̱vu a lyawa tsu nven a̱ ma̱buta̱.

26 'Yon vu kamba tsu,

vu wawa tsu

adama e icigi ya̱ wu i na i tsu vadala shi.