1 A̱sulazuva,

adama o ucira wa̱ wu u ɗa mogono maa yuwusan ma̱za̱nga̱,

U ta yuwusan ma̱za̱nga̱ lon adama a na vu wawa niyi!

2 Vu ca yi ta̱ ili i na okolo a̱ yi a cigai,

vu kuɗa̱ a̱ usu ili i na u patiyi shi.

3 Vu ta̱wa̱a̱ yi ta̱ na aba'un a sa'ani,

vu katala ta̱ aaci a̱ yi no okokolo a zinariya.

4 U pati wu ta̱ wuma, a̱vu vu ca yi,

vu ca yi ta̱ wuma na̱ rana va̱ a̱bunda̱ hali hali.

5 Tsugbain tsa̱ yi tsa̱ ta̱ mgbain,

adama e ikambishi ya̱ wu,

vu ca yi ta̱ tsugbain na̱ a̱ɓula̱.

6 Vu zuwa ta̱ wo o'wo za va aba'un hali hali,

na vu ri oɓolo na̱ yi u yo'onoto yi ta̱ okolo.

7 Ana wo o'woi mogono'o ma zuwa ta̱ ucira wa̱ yi uba̱ta̱ wa̱ wu,

A̱sulazuva Mogono Zagbain,

e ekere e icigi ya̱ wu i na i tsu vadala shi,

mogono mo ndolo ma̱ ri n jinga̱ɗa̱ shi.

8 Ekere a̱ wu e te reme,

n'yuwatan ma̱ wu suru,

ukere usa'ani wa̱ wu uta̱ reme,

aza a na a 'yuwan nuwu.

9 Vu ta̱ lyuwa le cine vu revei a akina a malya,

mantsa ma na vu uta̱i.

A̱sulazuva,

a̱tsuma̱ o upan wa̱ wu vu ta̱ soɗu le,

waru akina a ta lyuwa le.

10 Mogono ma̱ ta̱ kototo muwun n le,

na̱ limatan le suru.

11 Ko na̱ a̱ shi o foɓoo wu iwuya,

ko na̱ a̱ shi o foɓoo wu addama,

aa lyuwa aci shi.

12 Adama a na vu ta zuwa le a vadala reve a suma,

mantsa ma na vu tewiyin aya a̱ wu.

13 A̱sulazuva,

lyawa a ca wu tsugbain adama o ucira wa̱ wu,

tsu ta cana ishipa tsu cuwa tsugbain tsa aala a̱ wu.