1 Za ma̱za̱nga̱ ɗa vuma na tsu kambusa

aza a na a̱ ri nu ucira shi,

A̱sulazuva a ta kamba yi

a mantsa ma addama.

2 A̱sulazuva a ta yuwan yi mapari

waru u geshe wuma wa̱ yi,

u ta zuwa yi wu uwwa uyo'o

a̱tsuma̱ e iɗa'a.

Waa lyawai e ekere

a n'yuwatan ma̱ yi shi.

3 A̱sulazuva a ta kamba yi,

a mantsa ma na u ri ubanakun,

a̱vu u yuwaan yi opocino.

4 N damma ta̱,

<<A̱sulazuva n yuwaan wu ta̱ unusu,

vee ene iliyali i va̱

vu yuwaan mu opocino!>>

5 N'yuwatan n va̱ n ta yuwusan

adanshi e iwuya a aciya̱va̱,

a dansa, <<Uranu u ne ɗa wa̱ kuwa̱

adama e icina na̱ yi?>>

6 Aza a na a̱ ta̱wusa̱ ica̱su i va̱

na aɗa e re ɗa a̱ ta̱wusa̱,

a̱tsu ɓoloto ta̱ adanshi e epen a aci a̱ va̱,

a̱vu a̱ 'ya̱wa̱ e bete'we adanshi'i uba̱ta̱ suru.

7 Aza a na a 'yuwan numu suru,

a̱ ta̱ e idami i va̱,

a majiyan n gashi n la'a ta̱ za suru iwuya.

8 A dansa, <<Ubanakun wu ukwisa̱ u ɗa yi,

waa la'a shi.>>

9 Hali ni i'utsa̱ i va̱ fo,

za na n soɗu wo yi ma̱tsa̱n,

za na tsu, tsu lyuwa ilyalya a mapara ma̱ ta̱,

u vadala ta̱ u reme tsushu'un na̱ a̱mu.

10 Amma, a̱vu A̱sulazuva,

vee e ene iliyali i va̱

vu yuwaan mu opocino,

tsa̱ra̱ n tsupa n'yuwatan n va̱.

11 N ta̱ reve na vaa uwwusa uyo'o u va̱,

adama a na a lyuwa a aci a̱ va̱ shi.

12 Vu ta kamba mu

adama a na maa yuwusan

ili i mejege,

vu ta zuwa mu a̱ ma̱ka̱ka̱n ma̱ wu hali hali.

13 Lyawa tsu cuwa yi

A̱sulazuva A̱sula̱ aza a Isra'ila,

cuwa niyi gogo na̱ hali hali!

Lyawa wo o'wo ne! Lyawa wo o'wo ne!