1 Lyawa A̱sula̱ a̱ 'yon,

lyawa e bete'we n'yuwatan ma̱ yi,

lyawa aza a na a 'yuwan niyi

a suma a̱ ma̱ka̱ka̱n ma̱ yi.

2 Cine vu revei upepu

u tsi ivula̱ mikyon,

lyawa vi ivula̱ le ne.

Cine abaji a mani'in

ma̱ tsu jeruwe e elime a akina,

lyawa o kototo a̱za̱ e iwuya

a̱ ma̱ka̱ka̱n ma̱ A̱sula̱.

3 Amma lyawa a̱za̱ a̱ a̱ɓula̱ a yuwan ma̱za̱nga̱,

waru a yuwan mere a̱ ma̱ka̱ka̱n ma̱ A̱sula̱,

lyawa a shunwa na̱

ma̱za̱nga̱ na̱ mere ma̱ a̱bunda̱!

4 I canaa A̱sula̱ ishipa,

i canaa ala a̱ yi ica,

i ciɓala za na tsu katsa e eleshe.

A̱sulazuva a ɗa aala a̱ yi,

waru i yuwan ma̱za̱nga̱ elime a̱ yi!

5 A̱sula̱ a ɗa dada vu mkpa'an

za na tsi idanasa nruna̱,

A̱sula̱ za na ri nden uba̱ta̱ wa Akiza a̱ yi.

6 U tsu ca ta̱ aza a̱ ri nu u'wa shi uba̱ta̱ wu nde,

u tsu uta̱a̱ ta̱ aza a na a̱ ri o u'wa

reve u ca le ulyuwu we elime.

Amma aza a na a̱ ri na aciyogbamu

a̱ ta̱ da̱nu e iɗa i na i ri babu za.

7 A̱sula̱, a mantsa ma na vu ronoyi a ama a̱ wu aaɗanga,

a mantsa ma na vu toniyi na̱ a̱tsumona, Wivuwun

8 uvaɗi u jinga̱ɗa̱ ta̱,

a̱vu zuva yuwan iro'i, ✝

adama o uta̱wu wa̱ A̱sula̱ a Sinai

o uta̱wu wa̱ A̱sula̱ a Isra'ila.

9 A̱sula̱, vu ca ta̱ iro'i ya̱ a̱bunda̱,

a̱vu vu lapula agadu a̱ wu

a na a̱ da̱na̱i a̱tsuma̱lima̱.

10 Ama a̱ wu a̱ da̱nu ta̱ a̱tsuma̱ e iɗa'a,

waru a̱tsuma̱ a̱ a̱bunda̱ e isa'ani ya̱ wu,

vu tsu zamiya ta̱ alambi ili i na a cigai.

11 A̱sulazuva a ca ta̱ udammu,

a̱vu a̱ma̱ci a̱ a̱bunda̱ a tara ikaka'a a̱ tyo ba̱ta̱ ro.✝

12 A̱vu a damma,

<<Ngono na̱ a̱soja e le a suma ta̱ keɗu!

A̱ma̱ci a na a̱ ri a 'wa

a̱ ta̱ e ne'eshe itana

i na a̱ pura̱i uba̱ta̱ o uvon.

13 Hali fo na̱ a̱ɗu na i ri nden

a̱tsuma̱ e iɓolo e ikyon,

i ta gura pupala aciya̱ɗu

ni itana i zinariya na̱ azurufa,

cine evelu a muɗa a tsu pupala yi.>>

14 Mantsa ma na Mogono me Ili Suru

me bete'wei ngono e iɗa'a

u to o'wo va damma mini ma atayan

mo oco ta̱ a̱tsuma̱ a Zalumo.

15 Masasan ma̱ Bashan, masasan ma A̱sula̱,

a̱vu masasan mo o uga'an,

masasan ma Bashan.

16 Adama a̱ nye i ɗa vu ri a̱ a̱ka̱nla̱ na̱ tsushu'un,

a̱vu masasan mo o uga'an,

masasan ma na A̱sula̱ a ɗangwai

mo o'wo uba̱ta̱ wu nden ma̱ yi,

uba̱ta̱ u na A̱sulazuva a̱ da̱nu babu ukotu?

17 Ikeke yi ido ya̱ A̱sula̱ ukpakukupa kupa ɗa,

oɓolo nu ukpakukupa ukpakukupa,

A̱sulazuva a̱ cipa̱ ta̱ diga a Masasan ma Sinai

a̱ tyo a̱ a̱a̱'isa̱ Akiza a̱ yi.

18 A mantsa ma na vu kumbai zuva,

vu tarai aza a na a̱ shi e remei,

vu ka̱ra̱ ne le ugeru ugeru,

vu ushi ta̱ ne'e gbain gbain va̱ a̱bunda̱

diga e ekere a vaɗilima̱,

hali fo na̱ diga e ekere

a̱za̱ o 'ya̱susa̱n wu ugbozu.

Na amayun A̱sulazuva A̱sula̱

a̱ ta̱ da̱nu uba̱ta̱'a̱.

19 Ica a̱ tyo uba̱ta̱ wa̱ A̱sulazuva,

a̱ tyo uba̱ta̱ wa̱ A̱sula̱ za vi iwawi i tsu,

za na a tanusu a̱tsuma̱lima̱ a̱tsu

wa ana'an na̱ nfa'an suru. Wivuwun

20 A̱sula̱ a̱tsu, A̱sula̱ a ɗa

za na tsu wawa,

diga uba̱ta̱ wa̱ A̱sulazuva zagbain a ɗa,

za tsu la'a diga o ukwa̱.

21 Amayun A̱sula̱ oto o ɓoso

aci a n'yuwatan ma̱ yi,

u minjira okoluwo aza a na

a lyuwusa elime o unusu u le.

22 A̱sulazuva a damma ta̱,

<<N ta̱ ta̱wa̱to le diga Bashan,

n ta̱ ta̱wa̱to le diga a̱ru'un a mala,

23 adama yi za̱'wa̱ ana a̱ ɗu

a̱tsuma̱ a mpasa mu n'yuwatan nɗu,

hali na musa̱n n ɗu

ma̱a̱ tsura̱ akunda e le fo.>>

24 A̱sula̱, ama suru e ene ta̱

cu'un vu mmalu wu ulyuwu we elime a̱ wu,

cu'un vu mmalu ma̱ A̱sula̱ mogono ma̱ va̱,

a̱ tyo Uba̱ta̱ wa Akiza.

25 Ndobiya n ɗa elime,

Ndaniya waru o tono,

a̱tsuma̱ e le a̱ da̱na̱ ta̱ na̱ muwun me esheli

a wa'asa aganga.

26 Cuwai A̱sula̱ a̱tsuma̱ a̱ba̱jini e iɓolo,

cuwai A̱sulazuva a̱tsuma̱ e iɓolo,

ya aza a Isra'ila.

27 Apa ugundo wa̱ Banyami,

u na u la'ai uka̱la̱mu a̱tsuma̱ e le

o ronoso le aɗanga,

she azagbain a Yahuda

oɓolo na azagbain a̱ Zebulun

oɓolo na azagbain a Nafutali o tono.

28 A̱sula̱, vu roco ucira wa̱ wu,

vu roco ucira wa̱ wu

cine vu rocoyi nu ufaru.

29 Adama a na A̱a̱'isamapaɗa a̱ wu

a na a̱ ri a̱tsuma̱ a̱ Urishelima,

ngono n ta̱ ta̱wa̱a̱ wu na̱ ne'e ɗe.

30 Vu ɓara nɗa n na n ri a̱ tsushu'un na̱ a̱tsu,

nama na tsu pa'an

apumpu o una̱ wu uɗolu.

Vu ɓara oɓolo e inan i ndolo

aza a na a̱ ri nden a̱tsuma̱ a̱ ma̱dindim,

hali she na̱ a̱ ta̱wa̱ elime a̱ wu

na̱ meje'en ma̱ lipu

a casu wu azurufa.

Vu bete'we nɗa n na n cigai uvon!

31 Azagbain a̱ ta̱ ta̱wa̱ diga Masar,

Kush fo ta̱ ta̱wa̱to aciya̱yi uba̱ta̱ wa̱ A̱sula̱.

32 Canayi A̱sula̱ ishipa a̱ɗu ozo o tsugono tsu uvaɗi,

cayi A̱sulazuva ica.Wivuwun

33 Canai ishipa a̱ tyo uba̱ta̱ wu za na

tsu kumba zuva diga ufaru,

a̱yi na u tsu ɓara

na̱ a̱ba̱jini o uɗyo.

34 I yuwan adanshi o ucira wa̱ A̱sula̱,

za na tsugbain tsa̱ yi tsa̱ ri aci a Isra'ila,

za na ucira wa̱ yi u ri zuva.

35 A̱sula̱, a̱vu ili ya asalama a ɗa

a̱tsuma̱ o uba̱ta̱ wa Akiza a̱ wu.

A̱sula̱ a Isra'ila a tsu ca ta̱ ucira nu ukadu,

a̱ tyo uba̱ta̱ wa ama a̱ yi.

Ica a̱ tyo uba̱ta̱ wa̱ A̱sula̱!