1 N showen ta̱ A̱sula̱ adama e ikambishi,

n showen ta̱ A̱sula̱ adama wu uwwa mu.

2 A rana va̱ a̱tsuma̱lima̱ a̱ va̱ n zami ta̱ Zagbain,

na ayin n 'ya̱sa̱n ta̱ ekere a̱ va̱ zuva a avasa,

amma suru na̱ ne,

wuma u va̱ u tsura̱ asuvu nden shi.

3 N cuwan ta̱ na̱ a̱vu A̱sula̱ reve mi ivuwan ogbolo.

Na n ri a majiyan, reve okolo a̱ va̱ a kuɗa. Wivuwun

4 Vu lyawa mu n lantsa shi.

N dama ta̱ hali n lamba a yuwan adanshi.

5 N cuwan ta̱ na̱ rana na ka̱ra̱i ɗe,

na a'wan a̱ a̱bunda̱ a na a̱ ka̱ra̱i ɗe nu ujumu.

6 N cuwan ta̱ ni ishipa i na n tsu yuwusan na ayin,

n yuwusan ta̱ majiyan me le, a̱vu n zami urevu.

7 N damma ta̱, <<Ko Zagbain ta kasa na̱ a̱mu hali hali?

Wa̱a̱ da̱shi roco mu isa'ani waru shi?

8 Hali icigi ya̱ yi i na i tsu vadala shi i puwa̱n ta̱ hali hali?

Hali nzuwulai ma̱ yi n kuɗa̱ ta̱ a shiwan mantsa suru?

9 Ko A̱sula̱ e icina ta̱ naa wo roco iliyali?

Ko a̱tsuma̱ o upan wa̱ yi woo roco isa'ani shi?>> Wivuwun

10 Ɗaɗa n dammai, <<Ili i na i la'a suɗuwa numu lon a̱yi ɗa

ukere u Mogono ma̱ A̱sula̱ ma lyawa ta̱ ikambi i va̱.>>

11 N ta cuwan na̱ linga va̱ A̱sulazuva.

Amayun, n ta cuwan na̱ linga va asalama na vu yuwain ɗe nu ujimu.

12 N ta̱ da̱na̱ a majiyan ma linga na vu yuwain suru,

e petelyuwushe linga gbagbain na vu yuwain suru.

13 A̱sula̱, re va̱ wu aza a akiza a ɗa.

Ma̱sula̱ ma̱ ne ma ɗa ma̱ ri mgbain tsa̱ A̱sula̱ a̱ tsu?

14 A̱vu ɗa A̱sula̱ a na a yuwusan linga va asalama,

vu roco ta̱ ucira wa̱ wu a̱tsuma̱ a ama.

15 Nu ukere wu ucira wa̱ wu u ɗa vu tsupayi ama a̱ wu,

limatan va Yakubu na̱ Isuhu.Wivuwun

16 A̱sula̱, ana mini me ene nuwu wu uwwa ta̱ wovon,

reve mini ma̱ a̱ru'un me je'en.

17 Eleshe o oco ta̱ mini,

a̱vu zuva yuwan tsata,

aya a̱ wu a maɗatsa ta̱ uba̱ta̱ suru.

18 A uwwa ta̱ uɗyo u tsata tsa̱ wu a̱tsuma̱ a̱ lipa̱,

waru imaɗatsu ya̱ wu yi ikana ta̱ uvaɗi suru.

Uvaɗi u je'en ta̱ a̱vu u jinga̱ɗa̱.

19 Ure wa̱ wu u ka̱ra̱la̱i ta̱ a mala,

ure wa̱ wu u ka̱ra̱la̱i ta̱ a̱ mini ma gbain,

na̱ ne suru ene uzuɓa̱ wa̱ wu shi.

20 Vu rono ta̱ ama a̱ wu aɗanga tsa za va aguɓa,

e ekere a Musa na̱ Haruna.