1 I godyoo A̱sulazuva,

adama e isa'ani ya̱ yi,

adama a na icigi ya̱ yi i na i tsu vadala shi

i ta̱ lo hali hali.

2 Lyawa aza a na A̱sulazuva

a tsupayi a damma,

ele na a wawai

diga e ekere a n'yuwatan,

3 aza a na u ɓolotoi diga a nɗa,

diga asana na̱ a̱livu, ugana nu uyagi.

4 Aza a Isra'ila a̱ da̱na̱ ta̱

e igaru a̱tsumona,

a̱ tsura̱ ure a̱ 'ya̱wa̱

a̱ lyuci na a̱ da̱nu shi.

5 A uwwusa ta̱ ambulu na akuli,

hali a̱ ciga ma̱kuwa̱a̱.

6 A̱vu e showen A̱sulazuva

adama a̱tsuma̱lima̱ e le,

ɗaɗa u wawa nle

a addama e le.

7 U toni ta̱ ne ele nu ure u na wuntsayi

a̱ tyo a̱ lyuci uba̱ta̱ u na a̱a̱ da̱nu.

8 Lyawa le o godyowo A̱sulazuva

adama e icigi ya̱ yi i na i tsu vadala shi,

na̱ linga va asalama a̱ yi uba̱ta̱ wa ama,

9 adama a na u tsu ca ta̱

ama na a̱ ri na akuli mini,

waru u cuwa̱ton aza a

ambulu ni ili i sa'ani.

10 Aza a Isra'ila a̱ da̱nu ta̱ e irumbu

no o ululu wu ukwisa̱,

agbashi a̱tsuma̱ a̱tsuma̱lima̱ na akani,

11 adama a na a̱ 'ya̱sa̱a̱n ta̱ adanshi a̱ A̱sula̱ a aci,

a̱vu o goro a̱sa̱la̱ o Mogono ma̱ A̱sula̱.

12 A̱vu A̱sulazuva a zuwa le

ulinga wu usa̱n lon,

a̱vu a̱ riya̱,

agba babu za na a kamba le.

13 A̱vu e showen A̱sulazuva

adama a̱tsuma̱lima̱ e le,

ɗaɗa u wawa nle

a addama e le.

14 A̱vu wu uta̱a̱ le a̱tsuma̱ e irumbu

no o ure wu ukwa̱

reve wu kasa akani e le.

15 Lyawa le o godyowo A̱sulazuva

adama e icigi ya̱ yi i na i tsu vadala shi,

na̱ linga va asalama a̱ yi uba̱ta̱ wa ama,

16 adama a na wu kuɗa ta̱

na̱ntsu vi irumushili

reve fo wu kuɗa

irumu i megeshe vu na̱ntsu.

17 Aza a Isra'ila o o'wo ta̱ olo

adama aciyogbamu e le,

a̱vu o sowo awuya

adama a̱ nusu le.

18 Waru a buwa a maluwa me ilyalya shi,

hali a rawa zuzu nu ukwa̱.

19 A̱vu e showen A̱sulazuva

adama a̱tsuma̱lima̱ e le,

ɗaɗa u wawa nle

a addama e le.

20 A̱vu u lyungu danshi va̱ yi,

a̱vu u yuwaan le opocino,

a̱vu u wawa le diga o ukototosu.

21 Lyawa le o godyowo A̱sulazuva

adama e icigi ya̱ yi i na i tsu vadala shi,

na̱ linga va asalama a̱ yi uba̱ta̱ wa ama,

22 lyawa le a ca kucci vu ugodyusho,

waru a damma linga va̱ yi

ni ishipa i ma̱za̱nga̱.

23 Ozo o ro a̱ da̱na̱ ta̱ a mmalu

a mala a antsun,

a yuwusan atsulu na awina

a̱ mini ma gbain.

24 E ene ta̱ linga va̱ A̱sulazuva,

na̱ linga va asalama a̱ yi a̱ mini,

25 u yuwan ta̱ adanshi

a̱vu upepu wu ucira u 'yon,

u 'ya̱sa̱n ikeɗu i mala,

26 a̱ 'yon ta̱ zuva

reve a̱ riya̱ uba̱ta̱ wa̱ a̱ru'un

okolo e le a kuɗa ta̱

adama a̱ a̱tsuma̱lima̱.

27 A̱vu a̱ ka̱ra̱ a̱ ta̱ɗa̱tsa̱sa̱ a takalyusa

cine vu revei aza a na a̱ ri usowu,

nu ugbozu u le suru

e reve ili i na a yuwusan shi.

28 A̱vu e showen A̱sulazuva

adama a̱tsuma̱lima̱ e le,

ɗaɗa wu uta̱a̱ nle a addama e le.

29 U zuwa ta̱ upepu wu ucira'a wi isawan kwin

oɓolo ni ikeɗu i mini i mala.

30 A yuwan ta̱ ma̱za̱nga̱

a na uba̱ta̱ u fa̱la̱i,

a̱vu u tyewoto le a̱ nge'en m mala.

31 Lyawa le o godyowo A̱sulazuva

adama e icigi ya̱ yi i na i tsu vadala shi,

na̱ linga va asalama a̱ yi uba̱ta̱ wa ama,

32 lyawa a ca yi tsugbain

e iɓolo ya ama,

waru a cuwa yi a̱tsuma̱

e iɓolo ya azagbain.

33 U ka̱mba̱to ta̱ ɗolu

o o'wo a̱tsumona,

esu a̱ mini waru iɗa yu u'yewu,

34 iɗa yu umili waru iɗa ya akpaɗi

adama e iwuya ya aza a na a̱ ri na̱ nden pe.

35 U ka̱mba̱to ta̱ a̱tsumona o o'wo ɗolu

iɗa yu u'yewu waru esu a̱ mini.

36 A̱vu u lyawa aza a ambulu a̱ da̱nu pe,

a̱vu a̱ shuwa̱ lyuci na a̱a̱ da̱nu pe.

37 A̱ tsu cu'wa̱n ta̱ a̱ɗuma̱ a̱ inabi a atsusa

a̱vu a matsan ulobonu.

38 U zuwaa le ta̱ aba'un

a̱vu a yuwan a̱bunda̱ lon,

u lyawa iliyamunga i le i ka̱mba̱ a̱ca̱pa̱ shi.

39 A mantsa ma na a̱bunda̱ e le e jebe yi

reve n'yuwatan n le n ka̱ɗa̱to le

ni ɓongishi i iwuya na̱ a̱tsuma̱lima̱,

40 reve A̱sula̱ a ca aza a na o ɓongi yi

ama a̱ yi'i wono,

a̱vu u lyawa le a̱ da̱na̱ e igaru

a̱tsumona uba̱tu u na babu ure.

41 Agba u 'ya̱sa̱n ta̱ alambi

a̱tsuma̱ a̱tsuma̱lima̱ e le

a̱vu waru u da̱shi limatan le a̱bunda̱

cine vu revei o oɓolo e inan.

42 A̱za̱ a̱ a̱ɓula̱ a̱ tse ene ta̱

a̱vu a yuwan ma̱za̱nga̱,

amma a̱za̱ e iwuya suru

a̱ tsu ɓa̱ru ta̱ na̱ le.

43 Za na ri nu ugbozu suru,

lyawa u zuwa atsuvu e ili i nda

waru u ka̱mbuwa̱ ugbozu

e icigi ya̱ A̱sulazuva a na a tsu vadala shi.