1 A̱sula̱, she vu rungwa̱ kpaku wan,

she vu rungwa̱ wan,

A̱sula̱, she vi isawan kpen wan.

2 Ka̱lyuwa̱ cine n'yuwatan ma̱ wu a lapusa ma̱ka̱nka̱

ka̱lyuwa̱ cine n'yuwatan ma̱ wu a̱ 'ya̱sa̱sa̱n aci e le.

3 Nu ugbozu ugbozu aa ta yuwusan ifoɓi a aci a ama a̱ wu,

o to foɓuso maza e ekere aza a na vu cigai.

4 A dansa <<Ta̱wa̱i, lyawa tsu kototo nle cece o una̱ wu nɗa,

adama she da̱shi cuwan na aala a Isra'ila wan.>>

5 No okolo a̱ta̱ a ɗa a yuwain ifoɓi oɓolo,

o ɓolo ta̱ a aci a yuwan nla̱ngi na̱ a̱vu.

6 Ele ɗa a̱za̱ Edom na aza a Isma'ila,

oɓolo na ama a̱ Mowa na aza a Hagara,

7 na ama a Geba na ama a Amon na aza a Amaleka,

na aza a Filistiya, oɓolo na ama a Taya.

8 Aza a Asuriya fo o ɓolo ta̱ aci ne ele,

tsa̱ra̱ a̱ da̱shi ugundo wa̱ Lutu ucira.

9 Vu yuwan ne ele cine shi vu yuwain na aza a Midiya,

na̱ cine shi vu yuwain na aza a Sisera na aza a Jabin o Uɗolu wa̱ Kishon,✝

10 aza a na a̱ gba̱ra̱i a̱ lyuci va En Do,

reve wo o'wo cine vu revei edemu e everi e iɗa.

11 Vu ka̱mbuwa̱ azagbain e le tsa̱ Ore na̱ Zeye,

a̱za̱ o tsugono tsa̱ a̱ yi tsa̱ Zeba na̱ Zalumuna,✝

12 aza a na a dammai, <<Lyawa tsu usai

uba̱ta̱ wa aguɓa wa̱ A̱sula̱, wo o'wo za tsu.>>

13 A̱sula̱ a̱ va̱, vu ka̱mba̱to le tsa̱ lipa̱

tso owopo uba̱ta̱ o upepu.

14 Cine akina a̱ tsu kula̱to a̱rumbu,

ko cine akina a tsu dala a masasan,

15 vu gba̱ra̱ le na̱ wunla̱ wu upepu wa̱ wu,

a̱vu vu ca le wovon nu upepu wu ucira wa̱ wu.

16 A̱sulazuva vu zuwa wono u ɓa̱ru le,

adama ama a zami aala a̱ wu.

17 Vu zuwa a uwwa wono, a da'waton le hali hali,

lyawa a̱ kuwa̱ a̱tsuma̱ o wono.

18 Vu zuwa le e reve a na a̱vu ɗa A̱sulazuva goon,

ana a̱vu ɗa goon Mogono me Ili Suru o uvaɗi ma̱ɓula̱.