1 A̱sulazuva,

vu uwwa ipati i va̱ yi izami yu uge'etosu wa amayun,

vu uwwa mesun ma̱ va̱ me izami yi ikambishi,

Vu zuwaa avasa a̱ va̱ atsuvu,

adama a na babu epen o una̱ u va̱.

2 Lyawa na va yuwan uge'etosu,

uge'etosu u na wo roco

a̱mu za babu unusu ɗa,

lyawa esu a̱ wu e ene,

ili i na i ri mejege.

3 Na̱ vu ka̱lyuwa̱ okolo a̱ va̱,

vu bura mu na ayin,

a̱vu vu lyungwa̱ mu suru,

va cina ifoɓi iwuya uba̱ta̱ u va̱ shi.

N yuwan ta̱ ɗe ifoɓi,

una̱ u va̱ wa yuwan unusu shi.

4 N yuwan cine akapi a ama a yuwusan shi,

n yuwan ta̱ tsutoni na adanshi o una̱ wa̱ wu,

n toni re va̱ a̱za̱ o u'ya̱susa̱n wu ugbozu shi.

5 N ta a mmalu a̱tsuma̱ o ure wa̱ wu mantsa suru,

waru n vadala shi.

6 N ta yuwusan avasa uba̱ta̱ wa̱ wu A̱sula̱,

adama a na a̱vu ɗa za na a̱ usu mu.

Lyawa vu uwwa mu,

vu zuwaa adanshi a̱ va̱ atsuvu.

7 Vu roco a̱ba̱jini asalama e icigi ya̱ wu,

icigi ya̱ wu i na i tsu vadala shi,

a̱vu na vu tsu wawa aza a na a zamishi upa'atan,

aza a na a zama a pa'an o ukere usa'ani wa̱ wu,

diga e ekere a n'yuwatan n le.

8 Vi idana mu cine vu revei mawun ma̱ lyusu ma̱ wu,

vu soko mu za̱la̱ vu ululu ve evelu a̱ wu,

9 diga uba̱ta̱ wa ama a vama na a zama o kototo mu,

na̱ diga e ekere a n'yuwatan n va̱ n na n ka̱nda̱ruwa̱ numu.

10 A̱tsuma̱ okolo e le, e tse ene iliyali shi,

a̱tsuma̱ o una̱ u le waru she adanshi aciyogbamu.

11 A zuwaa mu ta̱ esu, gogo a̱ ka̱nda̱ruwa̱ mu ta̱,

a̱ tu ufoɓu, o polo mu e iɗa.

12 A̱ ta̱ tsi ikamu,

a zama na a kakara mu,

a̱ ta̱ tsi ikamu yu ucira i na i ri uva̱pu.

13 'Yon A̱sulazuva!

Vu riya̱a̱ n'yuwatan n va̱ nu uvon,

vu lyuwa le.

Vu wawa mu e ekere a̱za̱ e iwuya,

na̱ matsun me pe'eni ma̱ wu.

14 A̱sulazuva,

vu wawa mu diga e ekere a ama,

na̱ diga e icu'un ya ama o uvaɗi a nda,

e ekere e ili i na a̱ ri na̱ yi.

Vu ge'eto le ni ili i na vu foɓo nle.

Lyawa muwun n le fo n gada ifoɓi'i suru,

hali a̱ tyo a̱ muwun ntsukaya nle.

15 A̱mu gba, n ta̱ ene urewesu wa̱ wu,

adama a na a̱mu za babu unusu ɗa.

A mantsa ma na n 'yoyin a nlavu,

a̱ ma̱ka̱ka̱n ma̱ wu n ta shiwan na̱ ma̱za̱nga̱.