1 A̱sula̱, vu wawa mu

adama a na mini

ma rawa mu ta̱ a̱ yinlu.

2 N liɓa ta̱ a̱tsuma̱ a̱ yilyo'o ya̱ a̱ru'un,

uba̱ta̱ u na babu uba̱ta̱ u na a zuwa ana.

N uwa ta̱ a̱ mini ma̱ a̱ru'un,

ikeɗu i mini i la'a ta̱ ucira u va̱.

3 N kuna̱ ta̱ e mesun me izami yi ikambishi,

hali uɗyo u va̱ u fula,

esu a̱ va̱ a tsutsa ta̱,

e izami ya̱ A̱sula̱ a̱ va̱.

4 Aza a na a 'yuwan numu babu unusu,

a la'a ta̱ a̱bunda̱ a̱nji aaci a̱ va̱,

aza a na a 'yuwan numu

babu unusu a̱ ta̱ a̱bunda̱,

ele na a zama o kototo mu ne epen.

A zuwa mu ta̱ n ka̱mbuwa̱

ili i na mi iva̱i shi nu ucira.

5 A̱sula̱, vu reve ta̱ tsulo tsa̱ va̱,

waru unusu u va̱ u ri usokowu

a̱ ma̱ka̱ka̱n ma̱ wu shi!

6 She vu lyawa aza a na a zuwai

ucira u le ya̱'a̱ wu,

a uwwa wono adama a̱ va̱ wan.

A̱sulazuva, A̱sulazuva o oɓolo a̱ a̱soja a zuva,

lyawa aza a na a zama wu,

a uwwa wono adama a̱ va̱ wan,

a̱ A̱sula̱ aza a Isra'ila.

7 Adama a na n kaɓa ta̱ asuvu

na̱ tsuzo'o adama a̱ wu,

waru wono u ɓa̱ru ta̱ urewesu u va̱.

8 A̱mu mocin ɗa e ekere a̱za̱ a̱ va̱,

mocin e ekere a̱ muwun ma̱ a̱na̱wun n va̱.

9 Adama a na icigi i na

maa yuwusaan u'wa wa̱ wu,

wu una mu ta̱,

waru wisulusa wa aza a na a̱ ri e isulusa wu

a̱ ta̱ riya̱sa̱ aci a̱ va̱.✝

10 Mantsa ma na n shoyin a̱vu n yuwan akuli,

ko n 'yuwan n ciga

n kaɓa asuvu nu ulamu,

11 mantsa ma na mo otoyi

itana ya̱ a̱tsumola̱ngu,

ama a̱ tsu ka̱mba̱to mu ta̱ ili yi izo'oshi.

12 Aza a na a̱ ri nden eden

a̱ ta̱ e idami i va̱,

mo o'wo ta̱ ili yi ishipa

e ekere o ososowi.

13 Amma a̱mu, n yuwan ta̱ avasa

a̱ tyo ya̱'a̱ wu A̱sulazuva,

a mantsa ma na ve enei wuntsa nuwu,

a̱tsuma̱ e icigi ya̱ wu i na i tsu vadala shi,

vu usu mu ni iwawi ya amayun a̱ wu.

14 Vu wawa mu a̱tsuma̱ o yilyo'o,

she vu lyawa mu n liɓa wan,

vu wawa mu e ekere aza a na a 'yuwan numu,

vu papa mu diga a̱tsuma̱ a̱ mini ma̱ a̱ru'un.

15 She vu lyawa ikeɗu i mini

i kpa̱to mu wan,

ko mala ma lyuwa mu wan,

ko n liɓa a̱tsuma̱ aason wan.

16 A̱sulazuva, vu usu mu,

a̱tsuma̱ e icigi ya̱ wu i na i tsu vadala shi,

a̱tsuma̱ a̱ba̱jini e iliyali ya̱ wu

vu vadala ya̱'a̱ va̱.

17 She vu sokowo aagbashi a̱ wu

urewesu wa̱ wu wan.

Vu usu mu keɗu,

adama a na n ta̱ pe

a̱tsuma̱ a addama.

18 Rawa zuzu vu wawa mu,

vu wawa mu adama a n'yuwatan n va̱.

19 Vu reve ta̱ cine

aa yuwusaan mu ulamu,

na̱ cine aa casu mu wono,

na̱ cine o zo'osuso mu,

n'yuwatan n va̱ suru a̱ ta̱ elime a̱ wu.

20 Ookolo a̱ va̱ a kuɗa ta̱

adama a wisulusa u na aa yuwusaan mu,

agba n ri na̱ za na a kamba mu shi,

n zuwa ta̱ okolo adama n tsura̱ ikambishi,

agba babu.

N zuwa ta̱ okolo a na a ca mu adanshi,

agba n tsura̱ shi.

21 A̱ tsuwa̱a̱n ta̱ ilyalya i va̱ yaza,

reve fo a ca mu

masayan ma̱ ina̱bi ma alamu

a mantsa ma na

ma uwwusa akuli.✝

22 Lyawa apada e le wo o'wo le maza,

lyawa asuvu a̱ nden e le

wo o'wo le ure wa̱ a̱risa̱.

23 Lyawa esu e le a̱ rumba̱na̱

hali a̱ kuɗa ene ure,

waru ucina̱ u le wo o'wo uka̱nzu hali hali.

24 Vu tsuwa̱a̱n le upan wa̱ wu,

lyawa upan wu usuɗuwu wa̱ wu,

u la'a ucira u le.

25 Lyawa uba̱ta̱ wu nden nle

wo o'wo okongo,

she vu lyawa nanza da̱nu

a̱tsuma̱ ogodo le wan.✝

26 Adama a na a ta suɗatosu

aza a na vu ge'eto yi,

waru a ta yuwusan adanshi

a aci a̱ aza a na

vu uwwato yi usa̱n.

27 Vu da̱shi le oforo

e ekere a̱ nusu le,

she vu lyawa le

a uwwa uyo'o,

a̱tsuma̱ e iwawi ya̱ wu wan.

28 Lyawa a̱ kimusa̱ ala e le

a̱tsuma̱ a aatagada a wuma,

waru she e kece le

a̱tsuma̱ o ugeru wa̱ a̱za̱ a̱ a̱ɓula̱ wan.

29 N ta̱ pe a̱tsuma̱ a̱ mɓa̱la̱ na̱ a̱tsuma̱lima̱,

A̱sula̱, lyawa iwawi ya̱ wu i papa mu.

30 N ta cuwa aala a̱ A̱sula̱ a̱tsuma̱ e ishipa,

a̱vu n ca yi tsugbain nu ugodyusho.

31 Ili i nda i ta zuwa

A̱sulazuva a uwwa uyo'o,

ula'awu na̱ nan,

ula'awu no oogono a nan

na avana a̱ yi no okotsu.

32 Alambi e te ene a̱vu a uwwa uyo'o,

a̱ɗu na i ri e izami ya̱ A̱sula̱

lyawa okolo a̱ ɗu a̱ ushi adanshi!

33 A̱sulazuva a tsu uwwa ta̱ avasa

a̱za̱ e izami yi ikambishi,

waru u tsu rungwa̱ ama a̱ yi

a na e remei shi.

34 Lyawa uvaɗi na̱ zuva cuwa yi,

mala ni ili i wuma

i na i ri a̱tsuma̱ e le suru!

35 Adama a na A̱sula̱

a ta wawa Sihiyona,

reve waru u suwisa

ilyuci ya Yahuda.

Ɗaɗa ama a̱ da̱nu ɗe

a̱vu a usa uba̱ta̱'a̱.

36 Muwun ma agbashi a̱ yi n ta guza̱ yi,

aza a na waru a̱ ri e icigi ya ala a̱ yi

a̱ ta̱ da̱nu pe a̱tsuma̱ a̱ yi.