1 A̱sula̱, vee ene iliyali i va̱,

adama a na ama a zuwa mu ta̱ elime,

urana suru a ta zuwusa mu elime.

2 N'yuwatan n va̱ nta saɓusa mu urana ma̱ɓula̱,

na̱ a̱bunda̱ e le a̱ ta̱ a̱ nla̱ngi na̱ mu

o u'ya̱susa̱n wa aci le.

3 Mantsa ma na mu uwwai wovon,

n ta zuwa ucira ya̱'a̱ wu.

4 Uba̱ta̱ wa̱ A̱sula̱ a na maa cuwusa idanshi ya̱ yi,

uba̱ta̱ wa̱ A̱sula̱ a ɗa n zuwai ucira u va̱.

Maa uwwa wovon shi,

nye ɗa vaɗilima̱ aa yuwaan mu?

5 Urana ma̱ɓula̱ a ta vadalasa adanshi a̱ va̱,

a̱ ta̱ e ifoɓi i na a amaton mu kuci.

6 O ɓolo ta̱ aci upa'awun

a̱ ka̱lyuwusa̱ udasuwu u va̱,

a̱ tu ufoɓu o una mu.

7 A̱sula̱, ko ke'en

she vu lyawa le a la'a wan,

a̱tsuma̱ o upan wa̱ wu

vu ka̱ɗa̱to nɗa.

8 Vu ɗana ta̱ a̱tsuma̱lima̱ a̱ va̱,

vu kece ta̱ a̱bunda̱ a aɓara a̱ va̱,

ashe a̱ ri a aatagada a̱ wu shi?

9 Ne ɗa n'yuwatan n va̱

ma̱a̱ ka̱mba̱ na̱ a̱ca̱pa̱

a mantsa ma na n ɗe yi adama e ikambishi.

Na̱ tsun ndolo tsa ɗa me reve,

A̱sula̱ o to oɓolo na̱ mu.

10 Uba̱ta̱ wa̱ A̱sula̱ a na maa cuwusa idanshi ya̱ yi,

uba̱ta̱ wa̱ A̱sulazuva a na maa cuwusa idanshi ya̱ yi.

11 Uba̱ta̱ wa̱ wu u ɗa maa zuwusa ucira,

maa uwwa wovon shi.

Nye ɗa vaɗilima̱ a gura yuwaan mu?

12 A̱sula̱, n ta̱ shiton akucunu ana n yuwaan nuwu,

n ta̱ ta̱wa̱a̱ na̱ kucci vu ugodyusho uba̱ta̱ wa̱ wu.

13 Adama a na vu wawa mu ta̱ diga o ukwa̱,

oɓolo na ana a̱ va̱ diga o uta̱ɗa̱tsa̱sa̱,

adama n yuwan mmalu e elime a̱ wu,

a̱tsuma̱ e ekan i wuma.