1 A̱sula̱ a̱ va̱! A̱sula̱ a̱ va̱!

Adama nye vu vari numu?✝

Nye i zuwai iwawi ya̱ wu i yuwain alanga na̱ a̱mu?

Nye i zuwai vu rungwa̱i mesun ma addama a̱ va̱?

2 A̱sula̱ a̱ va̱!

N shon ta̱ nu urana,

agba vu usu mu shi.

N shon ta̱ na ayin,

agba n tsa̱ra̱ okolo nven shi.

3 Na̱ ne suru a̱vu za va akiza ɗa,

na Isra'ila a yuwusaan ica.

4 Nkaya ntsu n zuwa ta̱ ucira u le ya̱'a̱ wu,

a zuwa ta̱ ucira u le ya̱'a̱ wu,

agba vu wawa le ta̱.

5 Ya̱'a̱ wu ɗa a̱ 'ya̱wa̱i na̱ mesun me e le,

a̱vu vu wawa le.

Ya̱'a̱ wu ɗa a zuwai ucira u le,

agba vu ca le wono shi.

6 A̱mu vuma ɗa shi,

aazun a ɗa n ri goon,

ili yu ulamu ni ili i na ama a goroi.

7 Aza a na ene numu suru,✝

a tsu yuwaan mu ta̱ ulamu,

a tsu goro mu ta̱, reve a gbaɗatsasa aci e le.

8 A tsu damma ta̱,

<<Ashe vu zuwa ucira wa̱ wu uba̱ta̱ wa̱ A̱sulazuva shi?✝

To, lyawa u wawa wu!

Lyawa A̱sulazuva aa wawa wu,

nna̱ waa uwwusa uyo'o wa̱ wu!>>

9 Na̱ ne suru,

a̱vu ɗa vu uta̱a̱ numu a̱a̱tsuma̱ a mma va̱,

a̱vu ɗa vu zuwa numu n zuwai okolo a̱ va̱ ya̱'a̱ wu,

a̱mu a apusa maani ma mma va̱.

10 Diga a mantsa ma na a matsa numu n zuwa ta̱ ucira u va̱ ya̱'a̱ wu.

A̱vu ɗa A̱sula̱ a̱ va̱, diga urana u na a matsa numu.

11 She vu yuwan alanga na̱ a̱mu wan,

adama a na addama a̱ ta̱ lo zuzu,

waru babu za vi ikambishi.

12 N'yuwatan n va̱ n ka̱nda̱ruwa̱ mu ta̱ cine vu revei ogono e inan,

tso ogono e inan yu ucira ya atsusa a Bashan.

13 A̱ kpa̱tu'wa̱ ta̱ na̱ le, cine vu revei ikamu,

i na i ri a̱ ma̱gugwa̱,

a zama a kakara mu.

14 Ucira u va̱ u koto ta̱,

u lyawa mu ta̱ cine vu revei mini ma na mo ocoi.

Etele a̱ va̱ suru a kasa ta̱ na̱ a̱la̱ta̱ a̱ va̱,

tsi ishiki wu ujeruwu,

ucira wo okolo a̱ va̱ a lyawa mu ta̱.

15 Ucira u va̱ u koto ta̱ tsa ayimba,

eelentsu a̱ va̱ a kaɓa ta̱ o una̱ u va̱.

Vu lyawa mu ta̱ a̱tsuma̱ a̱ ma̱buta̱,

waru vu lyawa mu ta̱ tsa za na kuwa̱i.

16 Oɓolo a̱za̱ e iwiya a̱ ka̱nda̱ruwa̱ mu ta̱,

cine vu revei oɓolo a̱ musa̱n.

A yazalan ta̱ e ekere a̱ va̱ oɓolo na̱ a ana a̱ va̱.

17 N ta gura kece etele a̱ va̱ suru.

N'yuwatan n va̱ n zuwaa mu ta̱ esu,

a̱ ka̱lyuwusa̱ mu zuva zuva.

18 A yuwan ta̱ mazuwa ma agita adama o utugu u va̱,✝

reve e ne'eshe utugu u va̱ a̱tsuma̱ ele.

19 A̱sulazuva, she vu yuwan alanga na̱ mu wan!

Vu jika̱ naa vaa kamba mu, a̱vu za vu ucira!

20 Vu wawa mu o una̱ u matsun me pe'eni,

vu wawa wuma u va̱ e ekere a̱ musa̱n nda.

21 Vu wawa mu o una̱ wi ikamu nda!

Vu wawa mu e ekere a avana a yacin vu una!

22 N ta damma a̱za̱ a̱ va̱ adama aala a̱ wu,✝

n ta cuwa wu a̱tsuma̱ oɓolo a ama.

23 A̱ɗu na yaa uwwusa wovon wa̱ A̱sulazuva, cuwa niyi!

Ugundo wa Yakubu suru ca niyi tsugbain!

'Ya̱sa̱in aala a̱yi zuva a̱ɗu ugundo wa Isra'ila suru!

24 Adama a na u tsu lyawa aza a na a̱ ri nu ucira shi,

ko na wa̱ kuɗa̱ e idana a̱tsuma̱lima̱ ele shi.

U tsu soko urewesu wa̱ yi uba̱ta̱ u le shi,

amma u tsu uwwa le ta̱ mantsa ma na e ɗeyi izami yi ikambi.

25 A̱vu ɗa ufaru wi ica i va̱,

a̱tsuma̱ a̱ a̱ba̱jini e iɓolo ya ama a̱ wu.

N ta̱ shiton akucunu a̱ va̱,

elime aza a na a uwwusa wovon wa̱ wu.

26 Alambi a ta lyuwa hali a̱ cuwa̱n,

aza a na a zama e reve A̱sulazuva,

a ta cuwa yi.

Lyawa okolo ele a̱ da̱na̱,

na̱ ma̱za̱nga̱ hali hali.

27 Ama o ukosu wu uvaɗi suru a ta cuwan,

reve a̱ ka̱mba̱ uba̱ta̱ wa̱ A̱sulazuva,

ama o umatsun wu uvaɗi suru,

a̱ ta̱ ka̱ɗa̱to a yuwan yi a̱ga̱nda̱.

28 Adama a na tsugono tsa̱ ta̱ e ekere a̱ A̱sulazuva,

waru u ta yuwusan tsugono a aci a nɗa.

29 A̱za̱ o utsuru a̱tsuma̱ o uvaɗi suru a̱ ta̱ ka̱ɗa̱to wa̱ yi,

oɓolo na aza a na a̱ ka̱mba̱ ma̱buta̱ suru,

oɓolo na aza a na a gura guza̱ wuma ule shi,

a̱ ta̱ kingyo elime a̱yi.

30 Limatan nna ma̱a̱ ta̱wa̱,

ta yuwaan yi a̱ga̱nda̱.

Muwun nna a matsa,

aa ta uwwa adama aɗa A̱sulazuva.

31 Ele fo aa ta yuwan adanshi adama aɗa a̱ A̱sulazuva,

e ekere aza a na o koto a matsain shi,

a ta damma le ana,

A̱sulazuva a ɗa a yuwain iwawi i nda.