1 A̱sulazuva*, a̱vu ɗa uba̱ta̱ wu nden n tsu,

diga a mantsa a̱ tyo a mantsa mo ro.

2 Kafu a yuwan nsasan,

kafu vu yuwan uvaɗi,

a̱vu ɗa A̱sula̱ a na a̱ ri

nu ufaru ko ukosu shi.

3 Vu ka̱mba̱to ta̱ vaɗilima̱ ma̱buta̱,

a dansa, <<Ka̱mba̱i ma̱buta̱ a̱ɗu muwun ma ama.>>

4 Adama a na a'wan ukpakukupa✝ uba̱ta̱ wa̱ wu,

u ta̱ tsu urana uta̱ u na u ka̱ra̱i ɗe,

ko mantsa wa'a na ayin.

5 Vu kototo ta̱ vaɗilima̱ babu usa̱n,

wuma u le u ta̱ tsa alavu,

waru a̱ ta̱ cine vu revei

anlya nu usana.

6 Ko na wo o'woi u tsu

ɓoso ta̱ yipa̱lu nu usana,

amma nu ulivu u tsu

kpanla ta̱ reve u 'yewe.

7 O kototo tsu ta̱

a̱tsuma̱ o upan wa̱ wu,

waru tsu da'wan ta̱

adama asuvu o usuɗu wa̱ wu.

8 Vu gere ta̱ nusu tsu

a̱ ma̱ka̱ka̱n ma̱ wu,

nusu vu usokowu tsu

waru vu zuwa le ta̱ elime a̱ wu.

9 Rana tsu suru a̱ ka̱ra̱ ta̱

a̱tsuma̱ o upan wa̱ wu,

tsu koto ta̱ a'wan a̱ tsu na̱ ma̱nga̱.

10 A̱bunda̱ a'wan a̱ tsu

a̱a̱ ka̱ra̱ kupocindere shi,

nna̱ tsu buwa nu ucira kupakunla̱.

Na̱ ne suru ili i na

a'wan o ndolo a̱a̱ ta̱wusa̱a̱ tsu

a̱yi ɗa a̱tsuma̱lima̱ na̱ a̱tsumola̱ngu,

a̱ tsu koto ta̱ babu usa̱n,

waru za tsu koto ta̱.

11 Zane ɗa aa gura reve

ucira wu upan wa̱ wu?

Zane revei cu'un va̱ a̱ba̱jini o wovon

u na upan wa̱ wu wa̱a̱ ta̱wa̱a̱?

12 Vu roco tsu a na

rana wuma tsu wa'a a ɗa a̱ ri,

adama tsu da̱na̱ na̱ majiyan.

13 A̱sulazuva, hali mantsa ma̱ ne ma ɗa va̱a̱ da̱na̱ o upan?

Vu vadala diga o upan wa̱ wu,

vee ene iliyali ya agbashi a̱ wu!

14 Vu cuwa̱ton tsu nu usana,

ni icigi ya̱ wu i na i tsu vadala shi,

tsa̱ra̱ tsu yuwan ishipa na̱ ma̱za̱nga̱,

tsu yuwan mere a rana wuma tsu.

15 Vu yo'onoto tsu okolo

tsa̱ a̱bunda̱ a rana na vu caa ntsu a̱tsuma̱lima̱,

tsa̱ a̱bunda̱ a'wan a na tse enei a̱tsuma̱lima̱.

16 Lyawa agbashi a̱ wu ene

linga gbagbain va̱ wu,

na̱ tsugbain tsa̱ wu

e ekere a̱ muwun nle.

17 Lyawa isa'ani yi Zagbain A̱sula̱ a̱ tsu

u da̱nu oɓolo na̱ a̱tsu.

Vu zuwaa linga ve ekere a̱ tsu aba'un.

Amayun, vu zuwaa linga ve ekere a̱ tsu aba'un.