1 Canayi A̱sulazuva ishipa i sa'avu,

adama a na u yuwan ta̱ linga va asalama!

Ucira wu ukere wa̱ yi,

nu ucira wu ukere wa akiza a̱ yi,

u tsura̱ ta̱ ulyuwu wa aci.

2 A̱sulazuva a lyawa ta̱ e reve

ni iwawi ya̱ yi,

reve u roco a̱ɓula̱ a̱ yi esu a nɗa.

3 U cuwan ta̱ ni icigi ya̱ yi

i na i tsu vadala shi,

na̱ a̱ɓula̱ a̱ yi

a̱ tyo uba̱ta̱ wa ama a Isra'ila.

Ama o uvaɗi suru,

e ene ta̱ iwawi ya̱ A̱sula̱ a̱ tsu.

4 I yuwan yisaali i ma̱za̱nga̱

a̱ tyo uba̱ta̱ wa̱ A̱sulazuva,

a̱ɗu uvaɗi ma̱ɓula̱!

I ɓosho ni ishipa i ma̱za̱nga̱,

na̱ mesun me e itana i tsuwe'e!

5 Canayi A̱sulazuva ica ni igaraya,

ni igaraya i 'ya̱sa̱n uɗyo wi ishipa yu uyo'o!

6 Ivula̱i abulu na avana,

i yuwan yisaali i ma̱za̱nga̱

a̱ ma̱ka̱ka̱n ma̱ A̱sulazuva Mogono.

7 Lyawa mala ma yuwan

ma̱gugwa̱ ma̱ ma̱za̱nga̱,

ni ili i na i ri pe a̱tsuma̱ a̱yi suru.

Uvaɗi waru na aza a na a̱ ri

na̱ nden a̱tsuma̱ a̱yi.

8 Lyawa ɗolu ɓasa ekere e le,

lyawa agaɗi a cana ishipa i ma̱za̱nga̱ oɓolo,

9 lyawa a cana ishipa

a̱ ma̱ka̱ka̱n ma̱ A̱sulazuva.

Adama a na u ta̱ lo a̱ ta̱wa̱

u ge'eto uvaɗi.

U ta̱ ge'eto ama o uvaɗi suru

na amayun na̱ a̱ɓula̱.