1 A̱sulazuva, n te ɗewu uba̱ta̱ wa̱ wu,

ta̱wa̱ uba̱ta̱ u va̱ gogogo,

vu uwwa uɗyo u va̱, a mantsa ma na n ɗeyi!

2 Lyawa avasa a̱ va̱ o'wo,

cine vu revei ukula̱tosu wi ili i ma̱guru,✝

lyawa u'ya̱susa̱n we ekere a̱ va̱

o o'wo tsa̱ kucci vu ulivu.

3 A̱sulazuva vu zuwa mu n reme una̱ u va̱,

vi idana gan vu una̱ u va̱.

4 She vu lyawa okolo a̱ va̱ a vadala

a̱ tyo o ure wi iwuya wan,

ko n zuwa ukere o ulinga wi iwuya

oɓolo na aza a na a yuwusan iwuya wan,

she vu lyawa mu n lyuwa

a̱tsuma̱ e ilyalya yu uyo'o i le wan.

5 Lyawa vuma va̱ a̱ɓula̱ ɓara mu,

isa'ani i ɗa.

Lyawa u rono mu atsuvu,

a̱yi tsa mani'in ma ɗa a aaci a̱ va̱.

Aaci a̱ va̱ aa 'yuwan yi shi.

Suru na̱ ne avasa a̱ va̱ a̱ ta̱ a̱ nla̱ngi,

nu ulinga wi iwuya i le.

6 A mantsa ma na a variyi

a̱za̱ o tsugono tsa̱ le

diga a̱ ncilecile ma aatali,

ɗaɗa a̱za̱ e iwuya aa uwwa adanshi a̱ va̱,

a̱vu e reve amayun a ɗa.

7 A ta damma, <<Cine a tsu luma reve a ɓatsa iɗa,

ne ɗa etele a̱ tsu a bazai uba̱ta̱ wu nden wa̱ a̱kwa̱kwa̱.>>

8 Amma esu a̱ va̱ a̱ ta̱ uba̱ta̱ wa̱ wu,

Mogono ma̱ A̱sulazuva,

uba̱ta̱ wa̱ wu u ɗa maa zama upa'atan,

she vu lyawa wuma u va̱,

a̱tsuma̱ e meleshe wan.

9 Vu yuwaan mu mapari

na̱ maza ma na a azuyi adama a̱ va̱,

na̱ maza ma̱ a̱za̱ e iwuya.

10 Lyawa a̱za̱ e iwuya a̱ riya̱

a̱tsuma̱ e igolo i le,

amma a̱mu gba n ka̱ra̱ gbaga.