1 Weye Mndewa Mulungu, habali kokwima kutali na cheye?

Habali koifisa chipindi cha magayo?

2 Kwa magoda wanhu wotenda mbuli zihile wogaza ngayengaye na mitego yawo iwanamate.

3 Munhu yotenda mbuli zihile koitogoza madambwa ya moyo wake,

komtemela mate muhika na kombela Mndewa Mulungu.

4 Kwa magoda yake munhu yotenda mbuli zihile kolonga, "Mulungu hezavimanya"

na hamgesa Mulungu.

5 Siku zose kopata chila chinhu chiyolonda,

kuhumiza kwako kwa kutali nayo,

munhu yotenda mbuli zihile kowehula wehi wake wose.

6 Kogesa muna umoyo wake, "Habule chinhu cha kunitenda nidumbe,

sizapata magayo muna uugima wangu."

7 Mulomo wake umema maduwilo na uvwizi na ubamanyi,

kahuha kulonga mbuli ziguma ludoko na zihile.

8 Koifisa na kusepa muna ivibululu,

komkoma kwa mvisa munhu yelibule ubananzi,

meso yake yomzahila nyondenyonde yamgaze.

9 Kosepa fana simba,

kololela muladi yawagwile ngayengaye,

kowanamata kwa mtego wake na kowabulula.

10 Munhu yelibule mtazi kogwiligwa na kogwisigwa hasi,

kopotigwa kwa nguvu ya munhu yotenda mbuli zihile.

11 Munhu yotenda mbuli zihile kogesa muna umoyo wake, "Mulungu halola,

kagubika chihanga chake hawona!"

12 Inuka weye Mndewa Mulungu, winule mkono wako umtaguse munhu yotenda mbuli zihile.

Sekeuwazimize waja wogaya.

13 Habali munhu yotenda mbuli zihile komwehula Mulungu

na kogesa muna umoyo wake, "Hezanitagusa"?

14 Mbali weye kowawonela ubazi weli na magayo na manhesa,

nyondenyonde wokuhuwila weye,

weye kowataza wachiwa siku zose.

15 Bena mkono wa munhu yotenda mbuli zihile voumtagusa,

sekeyagendelele kutenda mbuli zihile.

16 Mndewa Mulungu ni mfalume wa siku zose,

wanhu wa zisi zimwenga wezawingigwa muna iisi yake.

17 Weye Mndewa Mulungu kohulika chiyopula ngayengaye,

komwing'ha moyo na komtegeleza.

18 Kowagombela wachiwa na waja wowoneligwa,

muladi munhu yeli ulongo muhala sekeyawadumbize wamwenga kaidi.