1 Mulungu, niwonele ubazi,

kwa ichimu cha ulondo wako wa kufunya umoyo,

na kwa ichimu cha ubazi wako mkulu,

usegeze uhasanyi wangu.

2 Usegeze ubananzi wangu,

na unisafye uhasanyi wangu.

3 Kwaviya niumanya ubananzi wangu,

na sidaha kuzimiza uhasanyi wangu lusita lose.

4 Nikuhasanya weye wiidumwe,

nitenda mbuli zihile haulongozi wako.

Ulamuzi wako ugoloka,

kohumiza voilondeka.

5 Niye muhasanyi kwandusila vinyelekwe,

namuhasanyi kwandusila ning'hali munda mwa mami yangu.

6 Weye konogelwa na ukweli wili mgati mwa munhu,

lelo nifundize ubala muna umoyo wangu.

7 Nisafye kwa mfumbasi muladi nyele,

nisunhe muladi niwe mzelu fana pamba.

8 Unitende nihulike deng'ho na ng'henze,

mavuha yangu youhondile yadeng'helele.

9 Uchifise chihanga chako sekeulole uhasanyi wangu,

na usegeze ubananzi wangu wose.

10 Weye Mulungu, unilumbile moyo welile,

na wike moyo ugangamale mgati yangu.

11 Sekeunyase kutali na weye,

sekeunisegezele Muhe wako Yelile.

12 Unibwelezele deng'ho da ukombola wako,

unitende nilonde kutegeleza na unidahize.

13 Maabaho nizawafunza wahasanyi malagilizo yako,

nawo wezabwela kumwako.

14 Unikombole na ubananzi wa kwitila damu,

weye Mulungu wa ukombola wangu,

na mulomo wangu wizakwimba unovu wako.

15 Weye Mndewa Mulungu, unidahize kulonga,

mulomo wangu uzilonge nhogolwa zako.

16 Kwaviya weye hunogelwa na nhambiko, one siivo nihakulavile,

hulonda nhambiko za kutimbula.

17 Nhambiko zimnogeza Mulungu ni kuinyendanyenda,

weye Mulungu, hulema munhu yosama.

18 Uditendele mbuli zinogile bululu da Sayuni,

uzigangamize ng'huta za bululu da Yelusalemu.

19 Baho kwizanogelwa na nhambiko zilondeka,

hamwe na nhambiko zetu za kutimbula,

ng'ombe walume wezalavigwa nhambiko hana ulupango lwako.