1 Chokwing'ha hewela weye Mndewa Mulungu,

chokwing'ha hewela, kwaviya kwahabehi.

Wanhu wolonga sang'hano zako za mwazanyo.

2 Mulungu kolonga, "Vondalufike lusita loniusagule,

nizahumiza voilondeka.

3 Isi ihagudemeka hamwe na vinhu vake vose,

niye mwenyewo nizakimilila sekeinangigwe.

4 Nowalongela wanhu woigoda, ‘Sekemuigode’

na wanhu wotenda mbuli zihile, ‘Sekemuwe na ditwi kulu.

5 Sekemuwe na ditwi kulu ng'hani,

na sekemulonge kwa magoda.’ "

6 Habule yoyose yolawa ubanzi wa ulawilo wa zuwa hebu ubanzi wa uswelo wa zuwa,

hebu muichuwala yondayadahe kumwinula munhu.

7 Mana Mulungu niiyo msemi,

komuhumulusa munhu na komwinula imwenga.

8 Mndewa Mulungu kamha nhungo muna umkono wake,

imema ludoko lwake fana upele ulawa hovu wouhanganyigwe na vikolezo.

Kougida na wanhu wotenda mbuli zihile wose muna iisi yose wezaung'wa na kuumala.

9 Mbali niye nizadeng'helela siku zose,

nizamwimbila Mulungu wa Yakobo wila wa nhogolwa.

10 Kolonga, "Nizawatenda nyondenyonde wanhu wotenda mbuli zihile,

mbali nizazongeza nguvu kwa wanhu wose wotenda mbuli zinogile."