1 Mweye wanhu wose tegelezeni,

kingeni yamagutwi mweye wanhu womukala muna izisi zose.

2 Mweye wanhu wose tegelezeni,

tajili na ngayengaye.

3 Mulomo wangu wolonga mbuli za kukala goya,

na magesa yangu yana umanyi.

4 Nokinga digutwi jangu nitegeleze simwe za kuvimanya kukala goya,

na kufambula mbuli yangu ifisike kwa wila wa bango.

5 Habali nidumbe lusita lwa magayo?

Habali niwadumbe wanhu wotenda mbuli zihile viwonizinga?

6 Wanhu wotenda mbuli zihile wohuwila utajili wawo,

na woigodela vinhu vawo.

7 Habule munhu yodaha kumkombola ndugu yake,

hebu kumuliha Mulungu kwa ichimu cha ndugu yake.

8 Maliho ya ugima ni makulu ng'hani.

Hadaha kulava chinhu chochose chochifaya,

9 muladi yawe mgima siku zose,

na sekeyadanganike.

10 Chovimanya kuwa hata wabala wodanganika,

iviya wabozi na mambunye wokwaga,

na kuwalekela wamwenga vinhu vawo.

11 Wezadanganika, maabaho maleme yezakuwa kaye zawo na kaye za nyelesi zawo siku zose,

mbali umwaka wakala na isi yawo wenyewo.

12 Munhu hezakala na vinhu vake siku zose,

mbali kalinga fana wanyama wofa.

13 Mbuli zino zowalawilila wanhu wabozi,

na wose wowotogola mbuli zawo za ubozi.

14 Wezalongozigwa fana ng'hondolo mbaka kuzimu,

wezalongozigwa na ifa fana mdimi viyolongoza ng'hondolo,

wanhu wanogile wezawatawala imitondo.

Ng'huli zawo zizawolela mudileme,

kutali na kaye zawo za kuigodela.

15 Mbali Mulungu kezanikombola kulawa kuzimu,

kwaviya kezanihokela.

16 Sekeumdumbe munhu yahawa na vinhu vingi,

lusita vinhu va kaye yake vondavongezeke.

17 Kwaviya vondayadanganike hezasola chochose,

utajili wake hawizamsondelela mudileme.

18 Viyakalile mgima kailongela mwenyewo, "Nimweda,"

na wanhu womtogoza kwa mbuli zinogile ziyatendile,

19 mbali kezailumba na wasaho zake,

hezawona bung'hulo kaidi.

20 Munhu yeli na utajili bila kuvimanya,

kalinga fana wanyama wofa.