1 Kamweda munhu ija yomgesa nyondenyonde,

Mndewa Mulungu kezamkombola siku ya magayo.

2 Mndewa Mulungu kezamwamila na kezamkaliza,

nayo kezapata choyolonda muna iisi.

Mulungu hezamuleka munhu ija muna yamakono ya wehi wake.

3 Mndewa Mulungu kezamtaza yahawa mtamu,

kezamuhonya utamu wake wose.

4 Nilonga, "Weye Mndewa Mulungu, niwonele ubazi,

kwaviya nikuhasanya, unihonye."

5 Wehi wangu wonilonga mbuli zihile,

"Kezadanganika zuwaki muladi zina jake dizimizigwe?"

6 Wawo wokwiza kunilola wolonga uvwizi,

wozahila mbuli zihile kusonhela niye,

muladi wahalawa kunze, wawalongele wanhu wamwenga.

7 Wanhu wose wonihila wonideta,

woilunga kunitendela mbuli zihile.

8 Wolonga, "Matamu yano yamnanahila yezamkoma,

hezakwinuka kaidi muna dikomwa."

9 Mbaka mbwiyangu ng'hani,

yadile hamwe na niye,

kanibiduka.

10 Mbali weye Mndewa Mulungu, uniwonele ubazi,

uning'he muhavu muladi niwalihilizile wehi wangu.

11 Novimanya kuwa weye kunogelwa na niye,

kwaviya mwihi wangu haigodela kunihuma.

12 Weye konitaza kwaviya nolonga ukweli,

konikwenhusa niwe hamwe na weye siku zose.

13 Yatogozigwe Mndewa Mulungu, Mulungu wa Isilaili,

kwandusila umwaka na siku zose.

Ivo! Ivo!