1 Weye Mndewa Mulungu, uwaleme waja wonilema niye,

uitowe na waja woitowa na niye.

2 Usole kimililo jako na kingilo jako,

winuke na wize kunitaza.

3 Sola mgoha na zele jako uwatowe waja woniwinza,

longa na moyo wangu, "Niye ni mulopozi wako."

4 Wanhu wousaka ugima wangu,

wagumigwe chinyala,

wabwelezigwe kuchisogo na wapate chinyala,

waja wowopanga kunitendela mbuli zihile.

5 Wawe fana makang'ha yohembelusigwa na mbeho,

wasenga wa kuulanga wowagwisa hasi.

6 Nzila yawo iwe na ziza na utelebu,

kuno wasenga wa kuulanga wa Mndewa Mulungu wowawinga.

7 Wanitegela lwavu bila ya chimu chochose,

wanihimbila kombo bila chimu chochose.

8 Wanangigwe kwa kusinhukiza,

lwavu luwanitegele wenzeke wenyewo,

wagwile muna dikombo ijo na wadanganike.

9 Muhe wangu wizamdeng'helela Mndewa Mulungu,

na kudeng'helela ulopozi wake.

10 Nizamulongela Mndewa Mulungu, kwa moyo wangu wose,

"Habule yalingile fana weye Mndewa Mulungu!

Weye kowakombola ngayengaye kulawa kwa wene nguvu.

Weye kowakaliza nyondenyonde sekewabawigwe."

11 Wasindila wa uvwizi wokwiza,

wolonga nitenda mbuli sizimanyile.

12 Woniliha mbuli zihile kwa zinogile zonitendile,

nisigala na usungu.

13 Mbali wawo viwawile watamu,

niye nivala maguniya, muladi kulagusa nina usungu,

niigaza kwa kuleka kuja.

Nipula kuno nidulika iditwi.

14 Nilila fana viya nomulilila mbwiya hebu ndugu yangu.

Niwegela kwa usungu,

fana munhu yolila ndilo ya mami yake.

15 Mbali nihagaya, wawo wodeng'helela na kuiduganya,

waiduganya wanhu chaka siwamanyile,

wanitowa bila kuleka.

16 Wonikwesela ng'hombali,

wanidundila meno yawo.

17 Weye Mndewa Mulungu, kwizagendelela kulola bila kutenda chochose mbaka zuwaki?

Unikombole kulawa kwa wanhu wawo,

na ugima wangu kulawa kwa wanasimba wawo!

18 Maabaho nizakwing'ha hewela hagati ya mting'hano mkulu wa wanhu,

nizakutogoza hagati ya bumbila kulu da wanhu.

19 Sekeuwaleke wehi wangu wanizehe,

wanhu wonihila bila chimu, sekewaning'ong'e.

20 Hawalonga mbuli za tindiwalo,

mbali wolonga mbuli za uvwizi kusonhela wanhu wahole wa isi.

21 Wonigubulila milomo yawo,

wolonga, "Ehee! Ehee! Chiwona wenyewo kwa meso yetu."

22 Weye Mndewa Mulungu, kuiwona mbuli ino,

sekeunyamale, weye Mndewa,

na sekeukale kutali na niye.

23 Inuka weye Mndewa Mulungu unigombele,

wize weye Mndewa Mulungu ulole mbuli yangu muna ichitala.

24 Weye Mndewa Mulungu, Mulungu wangu, unihumize voilondeka,

sekeuwaleke wehi wangu waniseke.

25 Sekeuwaleke walonge, "Chipata vichilondile!"

Hebu walonge, "Chimdahula munhu ino!"

26 Waleke wanhu wodeng'helela magayo yangu,

wahumigwe wose na wagwe chinyala.

Wawo wose woiwona fana viya wanoga kufosa niye,

wagumigwe chinyala.

27 Mbali waja wolonda kuwona nabule ubananzi,

walandule madizi yawo walonge,

"Mndewa Mulungu mkulu ng'hani!

Kolonda msang'hani wake yamwede."

28 Lulimi lwangu lwizalonga unovu wako,

nizalonga nhogolwa zako imisi na ichilo.