1 Sekeugaye kwa ichimu cha wanhu wotenda mbuli zihile,

sekeuwawonele migongo wabananzi.

2 Kwaviya wezanyala fana mayani,

wezadanganika fana mizugwana muna dizuwa kali.

3 Muhuwile Mndewa Mulungu na utende mbuli zinogile,

muladi ukale muna iisi yonikwing'hile na utemeligwe mate.

4 Mdeng'helele Mndewa Mulungu,

nayo kezakwing'ha vinhu viulonda muna umoyo wako.

5 Muleke Mndewa Mulungu yakulongoze,

muhuwile yeye, nayo kezakutaza.

6 Kezatenda unovu wako umelemete fana bung'hulo,

na kuhumiza kwako kwizakuwa fana bung'hulo da zuwa.

7 Humula haulongozi wa Mndewa Mulungu,

mgozele kwa kufunya umoyo,

sekeugaiye wanhu waja wopata muna ugenzi wawo wihile,

viwodaha kufikiza malungilo yawo yehile.

8 Sekeuwe na ludoko na sekeuwe na ng'hasiliki,

sekeugaye, buleivo kwizatenda mbuli zihile.

9 Wanhu wotenda mbuli zihile wezanangigwa,

mbali wanhu womuhuwila Mndewa Mulungu wezaihazi isi iyoweng'ha.

10 Lung'hali lusita ludodo wanhu wotenda mbuli zihile wezasegezigwa,

kwizawazahila, mbali hwizawawona.

11 Wanyendanyenda wezaisola isi,

wezadeng'helela kwa tindiwalo ng'hani.

12 Wanhu wotenda mbuli zihile woilungila mbuli zihile kwa wanhu wotenda mbuli zinogile,

na wawagegedela meno yawo.

13 Mbali Mndewa Mulungu kowaseka wanhu wotenda mbuli zihile,

kwaviya kovimanya uhelelo wawo wahabehi.

14 Wanhu wotenda mbuli zihile wosomola panga na kukwega pinde zawo,

muladi wawakome ngayengaye na wachiwa,

wawakome weli na ugenzi unogile.

15 Mbali mapanga yawo yezakwingila muna imizoyo yawo wenyewo,

na pinde zawo zizabenigwa.

16 Muhavu chinhu chidodo chiyelinacho munhu yotenda mbuli zinogile,

kufosa vinhu vingi viwelinavo wanhu wengi wotenda mbuli zihile.

17 Kwaviya nguvu za wanhu wotenda mbuli zihile zizabenigwa,

mbali Mndewa Mulungu kowataza wanhu wotenda mbuli zinogile.

18 Mndewa Mulungu kowakaliza wanhu welibule ubananzi,

na uhazi wawo wizakuwa wa siku zose.

19 Lusita lwa wihi luhafika, hawezapata chinyala,

na siku za nzala wezakwiguta.

20 Mbali wanhu wotenda mbuli zihile wezanangigwa,

wehi wa Mndewa Mulungu wezanyala fana maluwa ya kumbago,

kweli wezasegela fana yosi.

21 Wanhu wotenda mbuli zihile wokwazima bila kubweleza,

mbali wanhu wotenda mbuli zinogile wolava bila ya ugila.

22 Ivo waja watemeligwe mate na Mndewa Mulungu, wezaihazi isi,

mbali waja woyawaduwile wezanangigwa.

23 Mndewa Mulungu kowakaliza wanhu wotenda mbuli zinogile,

nayo kolanguliza nzila zawo.

24 Yahaikwala hagwa,

kwaviya Mndewa Mulungu komwamha mkono na kumtaza.

25 Nikala mbwanga, sambi namulala,

sinawona munhu yotenda mbuli zinogile kalekigwa na Mulungu,

hebu wanage kupula ndiya.

26 Siku zose, munhu ija koweng'ha kwa makono maidi,

na wanage wezawatemela mate wamwenga.

27 Leka kutenda mbuli zihile na utende mbuli zinogile,

muladi ukale muna iisi yako siku zose.

28 Kwaviya Mndewa Mulungu kolonda haki,

na hawazimiza waminika wake.

Kowakaliza siku zose,

mbali wana wa wanhu wotenda mbuli zihile, wezanangigwa.

29 Wanhu wotenda mbuli zinogile wezaihazi isi,

na wezakala umo siku zose.

30 Wanhu wotenda mbuli zinogile wolonga mbuli za ubala,

na ndimi zawo zohumiza voilondeka.

31 Malagilizo ya Mulungu wawo yamuna imizoyo yawo,

nawo hawezaleka nzila za Mulungu.

32 Wanhu wotenda mbuli zihile wowasepa wanhu wotenda mbuli zinogile,

na wozahila nzila ya kuwakoma.

33 Mndewa Mulungu hezawaguma wanhu wotenda mbuli zinogile muna yamakono ya wehi wawo,

hebu hezawaleka walongelizigwe vihile msemi vondayahumize.

34 Muhuwile Mndewa Mulungu na yamha nzila yake,

nayo kezakuhishimu na kukwing'ha isi,

na kwizawawona wanhu wotenda mbuli zihile viwonangigwa.

35 Nimuwona munhu yotenda mbuli zihile viyowatendela wanhu mbuli za usede,

kaika uchanyha ya wanhu wose fana mibiki mikulu ya Lebanoni.

36 Maabaho nifosa baho, hakalile baho,

nimzahila, mbali simuwone bule.

37 Mulole munhu yotenda mbuli zinogile, munhu goya,

kuna mbuli zinogile kwa munhu yolonda tindiwalo.

38 Mbali wahasanyi wose, wezanangigwa,

na welesi wa wanhu wotenda mbuli zihile wezasegezigwa.

39 Ulopozi wa wanhu wotenda mbuli zinogile wolawa kwa Mndewa Mulungu,

yeye niiyo mtazi wawo lusita lwa magayo.

40 Mndewa Mulungu kowataza na kuwalopola,

kowalava muna yamakono ya wanhu wotenda mbuli zihile na kuwakombola,

kwaviya wokimbilila kutazigwa kumwake.