1 Weye Mndewa Mulungu, nokulamba.

2 Nokuhuwila weye Mulungu wangu,

sekeunileke nigwe chinyala,

sekeuleke wehi wangu wadeng'helele vondanihumigwe.

3 Wanhu wokugozela, hawagwa chinyala hata imwe,

mbali wogaya bule waja wose wotenda mbuli zihile wezakugwa chinyala.

4 Weye Mndewa Mulungu, unilagusile nzila zako,

unifunze nzila zako.

5 Unilongoze muna ikweli yako na unifunze,

kwaviya weye ni Mulungu wa ulopozi wangu,

nokuhuwila weye siku zose.

6 Weye Mndewa Mulungu, ukumbuke ubazi wako na ulondo wako,

kwaviya vikala uko kwandusila umwaka.

7 Sekeukumbuke uhasanyi na ubananzi wa ubwanga wangu,

weye Mndewa Mulungu, kwa ichimu cha ulondo wako na unovu wako, unikumbuke.

8 Mndewa Mulungu kanoga na kolonga ukweli,

ivo kowafunza wahasanyi nzila zake.

9 Kowalongoza wanyendanyenda muna inzila inogile

na kowafunza nzila yake.

10 Nzila zose za Mndewa Mulungu ni za ulondo na kweli,

kwa waja wokwamha lagano jake na ulamuzi wake.

11 Weye Mndewa Mulungu, kwa ichimu cha zina jako,

unilekelele ubananzi wangu, kwaviya wiiyoha.

12 Chila munhu yomdumba Mndewa Mulungu,

Mndewa Mulungu komfunza nzila ya kusagula.

13 Munhu fana iyo kezatemeligwa mate,

na welesi wake wezaihazi isi.

14 Mndewa Mulungu ni mbwiya wa waja womdumba,

kowafundiza lagano jake.

15 Nomuhuwila Mndewa Mulungu yanitaze siku zose,

yeye konyonzola muna umtego wa wehi wangu.

16 Unilole na uniwonele ubazi,

kwaviya niye nadumwe na nogaya.

17 Moyo wangu wosafagila,

unisegeze muna uzidilwa wangu.

18 Lola unyondenyonde wangu na magayo yangu,

unilekelele uhasanyi wangu wose.

19 Lola wehi wangu viweli wengi,

uwone viya viwonihila kwa usede.

20 Unikalize na unilopole,

sekeunileke nigwe chinyala, kwaviya nokukimbilila weye.

21 Unovu na kwaminika vinilolese,

kwaviya nokuhuwila weye.

22 Weye Mndewa Mulungu, uwakombole wanhu wa Isilaili,

muna yamagayo yawo yose.