1 Nina mbuli kulawa kwa Mulungu kusonhela uhasanyi wa wanhu wotenda mbuli zihile,

hawamdumba Mulungu mbee.

2 Wanhu wotenda mbuli zihile woikombakomba wenyewo,

wogesa uhasanyi wawo hawizamanyika na kwihiligwa.

3 Chila chiwolonga muna imilomo yawo ni uvwizi na wihi,

waleka kuvimanya kukala goya na waleka kutenda mbuli zinogile.

4 Viwogona wogesa kutenda mbuli zihile,

wokala muna inzila ihile,

na hawalema wihi.

5 Weye Mndewa Mulungu,

ulondo wako wokwenela mbaka kuulanga,

waminika wako mbaka kuna yamawingu.

6 Unovu wako ulinga fana milima mikulu,

kuhumiza kwako kulinga fana vilindi va bahali.

Weye Mndewa Mulungu, kowakaliza wanhu na wanyama.

7 Viya viuli mkulu ulondo wako, weye Mulungu!

Kowakaliza wanhu wako fana ndege viyokaliza wanage muna yamabawa yake.

8 Wokwigutizigwa na utajili wa kaye yako,

kowang'wiza kulawa lwanda lwa unovu wako.

9 Kwaviya weye iyo nzasa na mwanduso wa ugima,

bung'hulo jako dochitendeza chiwone.

10 Gendesa ulondo wako kwa waja wokulonda,

weng'he unovu wako waja weli na moyo unogile.

11 Sekeutogole weli na magoda wanikwenhukile,

hebu wanhu wotenda mbuli zihile waniwinge.

12 Uko wanhu wotenda mbuli zihile wagwa,

wagwisigwa hasi, hawadaha kwinuka.