1 Weye Mndewa, kuwa hanhu hetu ha kukala,

muna zinyelesi zose.

2 Ing'hali milima hainaoneka,

na ing'hali isi hainalumbigwa,

weye kukala Mulungu wa siku zose.

3 Weye kowabweleza wanhu muna ditimbwisi,

viulonga, "Bweleni mweye wana wa Adamu."

4 Kwaviya miyaka elufu kumwako,

ilinga fana viya igolo ifosile,

fana viya ngonelelo ya ichilo.

5 Kousegeza ugima wawo fana nzozi zikwaga,

nawo walinga fana mayani mabisi imitondo.

6 Imitondo yosuka na kunogeza,

mbali ichigulogulo yoholola na kunyala.

7 Kwaviya ludoko lwako luchinanga,

chodumbizigwa na nhaguso yako.

8 Kuulagusa uhasanyi wetu haulongozi wetu,

kuumanya uhasanyi wetu woufisike.

9 Siku zetu zose chikala muna uludoko lwako,

chokomeleza miyaka yetu kwa kulila.

10 Miyaka yetu ya ugima ni malongo saba,

one chahawa na nguvu, chokala miyaka malongo manane.

Mbali miyaka iyo yose ni magayo na yungwayungwa,

mana siku zofosa himahima na chokwaga.

11 Vino yelihi yovimanya nguvu ya ludoko lwako?

Kwaviya ludoko lwako lukulu, lowatenda wanhu wakudumbe.

12 Uchifundize kuzipeta siku zetu vinogile,

muladi chipate ubala.

13 Weye Mndewa Mulungu, uwe na ubazi.

Vino kwizakalama mbaka zuwaki?

Wawonele ubazi wasang'hani wako.

14 Imitondo uching'he ulondo wako wa kufunya umoyo,

muladi chidahe kwimba kwa deng'ho,

na kudeng'helela siku zose za ugima wetu.

15 Uchideng'heleze siku nyingi kuilinga na siku za magayo zouchigalile,

na kuilinga na miyaka ya manhesa yochipatile.

16 Sang'hano zako ziwoneke kwa wasang'hani wako,

na wana wawo wawone ukulu wako.

17 Mndewa, Mulungu wetu, yachitendele unovu wake,

yazitemele mate sang'hano za makono yetu,

ona, yazitemele mate sang'hano za makono yetu.