1 Mulungu, mdahize mfalume yahumize voilondeka,

mdahize mwana wa mfalume yahumize voilondeka.

2 Yawahumize wanhu wako fana voilondeka,

na yawahumize ngayengaye wako kwa haki.

3 Milima izawatenda wanhu wamwede,

na muna ividundulima wanhu wakale voilondeka.

4 Mfalume yawagombele nyondenyonde,

yawataze wana wa ngayengaye,

na kuwananga wanhu wowagaza wamwenga.

5 Mfalume yakale lusita lose fana zuwa,

na yakale fana mwezi kwa nyelesi zose.

6 Yawe fana mvula yoihumuluka hana yamayani yakanhigwe,

fana mawaga yolagala muna iisi.

7 Wotenda mbuli zinogile wakale goya siku zose za ugima wake mfalume,

na wamwede kwa wingi mbaka mwezi ufe.

8 Yatawale kulawa bahali mbaka bahali,

na kulawa lwanda mbaka uhelelo wa isi yose.

9 Wanhu wokala kuchuwala wotumbala mavindi haulongozi wake,

na wehi wake wezatambala haulongozi wake.

10 Wafalume wa Talishishi na visiwa wezamwing'ha kodi,

wafalume wa Sheba na Seba wezamgalila vitumetume.

11 Wafalume wose wamtumbalile mavindi,

wanhu wa zisi zose wamsang'hanile.

12 Kwaviya kezamkombola munhu yolonda kutazigwa viyopula,

na kezamtaza ngayengaye yelibule munhu wa kumtaza.

13 Kowawonela ubazi ngayengaye na nyondenyonde,

na kuwakombola wanhu wolonda kutazigwa.

14 Kezawakombola kulawa muna ukuzehigwa na kutendiligwa usede,

kwaviya kogesa ng'hani ugima wawo.

15 Mfalume yakale siku nyingi,

Yahokele chitumetume cha zahabu kulawa Sheba,

wanhu wampulile mfalume kwa Mulungu

na kumtemela mate siku zose.

16 Isi ipate ndiya nyingi,

vilima vimeme mavuno fana ya Lebanoni,

na wanhu wawe wengi muna yamabululu fana mayani.

17 Zina jake dikale siku zose,

zuwa dihaka, hishima yake yongezeke.

Wanhu wa zisi zose watemeligwe mate kufosela yeye,

na kumtanga kamweda.

18 Yatogozigwe Mndewa Mulungu, Mulungu wa Isilaili,

yeye muhala yotenda mauzauza.

19 Zina jake kulu ditogozigwe siku zose,

zisi zose zimeme ukulu wake.

Ivo, Ivo!

20 Uhelelo wa mbuli ziyapulile Daudi mwana wa Yese.