1 Weye Mulungu, utegeleze chonikupula!

Sekewehule mbuli yangu.

2 Nolamba unitegeleze na unidike.

Nilegela kuiyalala,

3 kwa ichimu cha mbuli ziwolonga wehi wangu.

Wehi wangu wonigaza.

Woniwonela ludoko na wonihila.

4 Moyo wangu wobigima,

nodumba kudanganika.

5 Nodumba na nogudemeka ng'hani,

moyo wangu wodunda.

6 Nilonga, "One nihawile na mabawa fana huwa,

nihaguluke nihite kutali nikahumule.

7 One nihitile kutali,

na kukala kuchuwala,

8 nihalopole kuzahila hanhu ha kukimbilila,

muladi nidikimbile beho kulu na vulavumbi."

9 Weye Mndewa Mulungu, uwazaganye wehi wangu na utibule ulonzi wawo,

kwaviya niwona usede na ndwagi muna dibululu.

10 Wozunguluka muna zing'huta za bululu ijo imisi na ichilo,

wihi na magayo vamuna dibululu ijo.

11 Tibwilitibwili damuna dibululu ijo,

ubamanyi na mbuli zihile vokala muna yamagulilo yake.

12 Yaniligile siyo mwihi,

one iwile ivo, nihafunyile umoyo.

Yainule kumwangu siyo ija yonihila,

one iwile ivo, nihaifisile sekeyaniwone.

13 Mbali niiyo weye, munhu fana niye,

miyangu na mbwiyangu ng'hani.

14 Chizowela kulonga zimwe,

vichiilongoze na wamwenga kuhita kuna Ikaye ya Mulungu.

15 Leka ifa iwapate wehi wangu,

wahumuluke kuzimu wang'hali wagima,

kwaviya wamema wihi muna imizoyo yawo.

16 Niye nomtanga Mndewa Mulungu yanitaze,

nayo kezanikombola.

17 Imitondo na imisi na ichigulogulo, nolila kwa kuiyalala,

nayo kodihulika dizi jangu.

18 Konilopola muna ing'hondo inilinayo,

inilungiligwe niye,

ingawa wanhu wengi wonitowa.

19 Mulungu yotawala siku zose kezanitaza

kezanihulika na kuwatagusa,

wanhu waja hawagalula ugenzi wawo,

na hawamdumba Mulungu.

20 Miyangu kagolosa makono kuwatowa mbwiya zake,

kabena lagano jake.

21 Mbuli zake zoguma mulile fana uki,

mbali magesa yake yogala ng'hondo.

Mbuli zake zotelebuka fana mavuta,

mbali zokanha fana mwele ukutwa.

22 Umulekele Mndewa Mulungu magayo yako, nayo kezakutaza,

kezamtenda munhu yotenda mbuli zinogile yagangamale.

23 Weye Mulungu kwizawahulumusa kuzimu wanhu wotenda mbuli zihile.

Wanhu wolonda kukoma na wotenda mbuli zihile,

siku zawo za kuwa wagima zizahunguzigwa.

Mbali niye nizakuhuwila weye.