1 Weye Mulungu, niiyo Mulungu wangu,

nokuzahila kwa moyo wangu wose.

Muhe wangu wokugesa ng'hani fana munhu yeli na ng'hilu,

ng'hilu fana isi inyalile ilibule mazi.

2 Nikuwona hana ihanhu helile,

na niuwona udahi wako na ukulu wako.

3 Kwaviya ulondo wako wofaya ng'hani kufosa ugima,

nizakutogoza kwa mulomo wangu.

4 Nizakutogoza siku zose za ugima wangu,

nizayenula makono yangu kukutogoza na kukupula.

5 Niye nizadeng'helela fana kwiguta ndiya zili na mavuta na zinonile,

mulomo wangu wokutogoza kwa deng'ho.

6 Nokukumbuka muna dikomwa jangu,

nokugesa weye ichilo chose,

7 kwaviya weye niiyo mtazi wangu,

nokwimba kwa deng'ho kwaviya novimanya na hanhu haholile,

fana viya kinda da hasi ya mabawa ya mami yake.

8 Moyo wangu woilumba na weye,

na mkono wako wa kulume wonitaza.

9 Wanhu wolonda kunikoma wezanangigwa,

wezakwingila kuzimu.

10 Wezakomigwa kwa upanga,

wezadigwa na mbwizi.

11 Mbali mfalume kezamdeng'helela Mulungu,

wanhu wose woilaha kwa zina da Mulungu, wezamtogoza Mulungu,

kwaviya milomo ya wavwizi izafudazwa.